NYIIGHEEGA 49 - Bibliyeeda Ghaydit

Leendeeda ghusooda baruureega

¹ Ooleeysiina iit ng'asheesu, ea fuga eemoojiga sean! Oaleaydiit, buuneesean abiita badayda ng'eanyiida,

² buuneesean hees ea gea manang'i, dea baruur ea dea bwarbwar duwaawi!

³ Gaygwargu ghuuteanyu weaghuumeeda; nea ng'asheega mida gurooroodeanyu gaygaba fughareeda.

⁴ Gaydaghamwat iiteanyu dayiiy ghwasiildeanga; gaydajaat ghuut ak gearugu gidawas nea ghaabwarji gidoondooriida.

⁵ Ghwasaan inyas gaydabeal eawoojiga sawanadeeda, iineaweesean munyasnacheeka weajoodigeasu,

⁶ fuga ghus baruureega nyaawa nea ghaghwara geat seang'ayda baruureega nyaawa.

⁷ Aba huumwa manda siida ammu gwalealu geaw, ghana ghoamu ghoadaw ASEETA gichea ghoaghiisa eaweagaaschi,

⁸ aba gideaba leadeeda eaweega nyaawa aahaw muuchi, ak gayghwanung'waada mayghoamu ghoadayda gichea gwadeay,

⁹ ak ghwanung' goobiida ng'eanyiida damanda manda muudeanooda ea mwadaaha bung'eeda.

¹⁰ Huumwa, gayghwadaah gideaba eara fuga weaghoodi gameewa, siitasha ea rageananeeda gaygoosha duwaawi ak gwanung'usa baruureega nyaawa fih suuk.

¹¹ Bung'eadinga nyaawa gealga nyaawa gil damanda manda muudeanooda, hoorgeeda giibinda nyaawa aba seaygoojiga sean, earapeadi ghayi aba mwadi ng'eanyiida siguushteawa gheawunga nyaawa.

¹² Siida moamu ghwashng'u aba jeeda miyeenooda, niny gawuurji sea diyeanga meewa.

¹³ Nih naweedeaba fugiga daah geat aba leendeedeani nih muudeanooda fuga daaha geat baruureega nyaawa.

¹⁴ Gawuurji gisilga sirarsa gheeda maloonghajeega; ak gayghoah miyeeda jeagiischoocheanda nyaawa; fuga doobiiweadi gaygoombal saawa damanda lamwajaadawa gwararang'eesa bung'eeda, nea ratooda nyaawa gaygoosha; nea gheeda maloonghajeega gayghoah gheanyaawa.

¹⁵ Nea ASEETA gay gwalealu gurooroodeanyu daheeli uurda gheeda maloonghajeega, aba gideaba gayghwadeaptanaan.

¹⁶ Adiidu gibeali iinyas siida baruureega, nea ghoahaada meanang'oocheanduumeeda aba gheanyi.

¹⁷ Aba gideaba eaweeda jea ghameawa mayghwaat eara gil; baruureagaaschi maygoodeayi jeeda bung'eeda.

¹⁸ Siida eara gwalang'u aba jeedeaba eaweesu, ak geaghwar aba gideaba gamnyeeni,

¹⁹ gaygawa heeda seaygoojiga ghweanigaaschi nimeewa, ak ea maygudu gabiikta ghwadaah weeshinda damanda manda muudeanooda.

²⁰ Hawunda siida moamu ghoadeala niny miyeeda, niny gawuurji sea diyeanga meewa.