NYIIGHEEGA 48 - Bibliyeeda Ghaydit

Sayuni, mujiineeda ASEETA

¹ NG'UTAMIIDA niny dea hawi ak ea dea siikghaambiit muuchi aba jeeda mujiineeda ASEETEANYA! aba giijeadaanyi ghaydit,

² nea geawundaanyi aamiy muuchi ak ea hooseaneega ng'eanyiisean, giijeeda Sayuni, sheagi mida wiilooda ng'eanyiida ghayeawa, was mujiineeda sugoocheanda haw.

³ ASEETA ghoahaaghwa gealgaaschi ak ghoahiimu gideaba niny igeambooda gil.

⁴ Aba gideaba sugoodiga nibwat geat, ak ea nupka sean ng'ucheeda.

⁵ Hean ghwadaah, ak ghahamng'eanyi, ghwadakghuyan ak gamng'aw;

⁶ hean ghang'ut muuwda saawa aba hoowa, ak ghwanya ng'weaninda uurji dea gatmooda bearji lajooda.

⁷ Aba jeameeda heeda ghayeawa gwanyarja maleambajeega Darshishi.

⁸ Nea aba gisiyiing'di, ea gisidaakti aba jeeda mujiineeda NG'UTAMIIDA bea lugweega, mujiineeda ASEETEANYA, gaygoomajeek ASEETA damanda manda muudeanooda.

⁹ Ea ASEETA, sisikteawi bariinyeagaagu, aba jeedeaba gheang'u sibateeweey.

¹⁰ Aba giduurji gheawungaagu, Ea ASEETA, ea giduurji giigheambiitaang'u ea ghwahita muudeanooda ng'eanyiida. Aba geatindaang'u bea dugwa gisini nea giidoabiiwi;

¹¹ asi dahoosana giijeeda Sayuni! nea dang'weela haweega Yuda aba badayda girgweageadaang'u!

¹² Aneayeena aba Sayuni, aneaweesiina, ak gooyiidayi ghoorajeagaaschi geawi,

¹³ ang'ula ghamardaanyi ak goong'ulayi ghoorajeagaaschi; ak goorukusi seaygeeda jea ghwahidu.

¹⁴ Gideaba nih ASEETA, ASEETEANYA gil damanda manda muudeanooda. Gayghoah haghweadoocheandeanya damanyoojiga sean jea ghwahidu.