NYIIGHEEGA 44 - Bibliyeeda Ghaydit

Mooshta ASEETA bea weeta

¹ Ea ASEETA siyiinyi aba iidigaasa, nea gwayeeshiineasa ghweanigaasa, ng'asheega iisini damanda nyaawa, aba garayi.

² Ang'iing'i gihoani eemoojiga aba geatindaang'u, ak ginung' goobiida saawa; ang'iing'i gisawani fuga bea ng'eanyiida ak ginung' goobiida fugaagu;

³ nea fugaagu ea moang'waanyana ng'eanyiida ng'utkeaka nyaawa, ak ea majooriischeewana uurjeenga nyaawa; gwasin geatindaang'u bea dugwa, ea gheambalmeadaang'u, ea weeshinda gheamamdaang'u aba gideaba gibwariinyi saawa.

⁴ Ea ASEETA, ang'iing'i guwoosi NG'UTAMIIDEANYU ea ASEETEANYU was dea adaw Yakobo lealeanooda.

⁵ Aba uurdaang'u gajeabwaanya weajoodigaasa; aba gheawungaagu gajealaapta ng'eanyi fuga bwareasa.

⁶ Aba gideaba maydaghus ghuweang'deanyu nea ng'uteanyu ea mayghaweadan.

⁷ Nea ang'iing'i guwoosi dea weadeasa aba heeda weajoodigaasa, ak gea sideasa ea ninung' ghabwaspwas.

⁸ Geaghwari geat ASEETA askwearda sean, ak gajeebadiischeesiina gheawungaagu damanda manda muudeanooda.

⁹ Ak ghamneawa nijaktaneasa ak giibwaaspwaascheasa, ak ea mudadeaydooscheewana lugoodeanya.

¹⁰ Giighuumdaneasa bwadaw eeheeleewana weajoocheanda; nea gea sideasa ghwanyas easanga.

¹¹ Giidaydaneasa eewuurjeewana gisilga eayaageasa, ak giidearseasa jeeda eemoojiga.

¹² Gishaaydi buuneadaang'u ak ea manyageeseey gil, ak ea minyasi gil aba haleanjeeda ishaaydaawi.

¹³ Ninung' eahuuwa fuga sijuuga aba heeda giischeewdeanya, budeayeeka ea foolda aba heeda fuga neaweeseasa.

¹⁴ Ninung' eahuuwa ghwasiildeanga aba heeda eemoojiga, aba gideaba goodiindiil iheenga fuga bea ng'eanyiida.

¹⁵ Askwearda sean gwanda baspaseegeasu madeedeanyu, nea nyigooda ea nidukuta gheamamdeanyu,

¹⁶ aba ng'asheega foolda bea fuga ang'eawean nea gafursiinyi sea weajoodigeasu ea dea walda mureandooda.

¹⁷ Ng'asheesu seaniin ninyaseasa ak ea miyeefooleey ak ea miyeenung'useey heeda ghana eenung'usiina heeda neajeadaang'u.

¹⁸ Ak ea miyeenung'waada gabiikta bwadaw gurooruunatkaasa, nea geeshangaasa ea miighang'amwa naweadaang'u,

¹⁹ ak ginung'useasa heeda aba bugusta fureayoonga ak giikwealseasa misaneeda haw.

²⁰ Amadeepa ea nirooseasa badita ASEETEANYA, ghana eekeala geatingaasa aseeta rabasta,

²¹ Heapi ASEETA maygwasikteawa ng'asheanji? Aba gideaba niny dea nal makcheameeda guroorooda.

²² Manda, aba badaydaang'u geabwareasa askwearda sean, geehindaneasa gisilga weay eenuuseada.

²³ Ng'eada, NG'UTAMIIDA anda gili” Diiwa geaw! Adihistaneasa damanda manda muudeanooda!

²⁴ Ghwasaan anda gifunyaneasa gheamamdaang'u? Nea gwarooseey gidasisawaneati ea gidasighabwastaneasa?

²⁵ Aba gideaba gurooruunatkaasa nihiiy geat ea ghwahita ng'eanyi; sasanuukaasa ninoas ng'eanyi.

²⁶ Ng'eada, beeni weadeasa! Lealneasa aba giteena bariinyeagaagu.