NYIIGHEEGA 42 - Bibliyeeda Ghaydit

GITAABOODEABA IYEENYA (Nyiigheega 42–72 ) Mooshta ASEETA bea siida mang'aw

¹ Gawuurji gidagasiida mayeanda beega eeniga gulda, gwasunu eara gurooroodeanyu gagaseey ang'iing'i, Ea ASEETA.

² Gurooroodeanyu gwayeesa muwoash ASEETA, was ASEETA majeek Gaydoan eeju ak geadaahan aba madeeda ASEETA?

³ Dabeakeasu niiw daghwardeanyu askweari ea eawa, nea gwayeeniisean buuneeda galeaga sean, “Gwanda yeenu ASEATAANG'U?”

⁴ Ng'asheesu ghoapkaachi; ak ghabwaasha gurooroodeanyu, aba damanda eadeayeewi eemeeda jeeda gheeda ASEETA, ak ghaadoabiiwji saawa nea gaweay goojuur aba hooseaneega ea sarmeeda badiischooda, ea giigheambiita ASEETA nea gwanda eemeeda jeeda ghweelmeeda.

⁵ Gurooroodeanyu ghwasaan inyas gihiinyi geaw, nea gigiisani aba jeedeanyu? Ghusa ASEETA; aba gideaba gaydabiikta daaghaambiit niny, lealnoocheandeanyu ea ASEETEANYU.

⁶ Gurooroodeanyu sijaksa ng'eanyi aba giiseaneega, ak ghaapkaacheey ang'iing'i aba ng'eanyiida Yordani ea aba giijeega Hermoni, ea Misari.

⁷ Niijeagu laweajajeega beega guldeayda beega nihidu gwaneekiit nea gaguursa guldeayda suuk laweajajeega ea lasita ilaschaan ninyasan.

⁸ Nea askweari gayghwanung' NG'UTAMIIDA ghwahidu bariinyeagaaschi bea huumwa; nea eawa gaydasarman duumdaanyi bea giigheambiita, ak ghaabwachi ASEETA was eaweegeasu.

⁹ Gaydayeesha ASEETA, was lagheaneedeanyu was gwaleeda, “Ghwasaan inyas mudu apkaadaan? Ghwasaan inyas geawi nea geagiisanyi nea gwasawanan weajoocheanda?”

¹⁰ Weajoodigeasu goong'eawiidanean gili jea gwahirjeaweada geakeasu, nea gwayeeniisean askwearda sean, “Gwanda yeenu ASEATAANG'U?”

¹¹ Gurooroodeanyu ghwasaan inyas geejakseey ng'eanyi, nea ghaahamnyi ng'eanyi aba jeedeanyu? Ghusa ASEETA; aba gideaba gaydabiikta gicha daaghaambiit niny, lealnoocheandeanyu ea ASEETEANYU.