NYIIGHEEGA 41 - Bibliyeeda Ghaydit

Mooshta ASEETA bea siida miyaan

¹ Ghang'wana siida apkaat siida bwarbwar! Gaygwalealu NG'UTAMIIDA eaweeda sawanadeeda;

² gayghoahaaghwa NG'UTAMIIDA nea ghoadaw eaweega; ak geeguura siida siitaw ghawooda aba jeeda ng'eanyiida; ak ea maygwanung'usa saawa heeda ak gwasawan weajoodiga nyaawa.

³ Gayghaweat NG'UTAMIIDA niny aba badayda bulaliidaanyi nea ghamnyaan; ak aba jeeda miyeandaanyi giihaabi miyeanyeakaaschi sean.

⁴ Ak geayi aniini, “Ea NG'UTAMIIDA bwaydanaan; ahaabwaan, aba gideaba neasineey riing'eeda!”

⁵ Weajoodigeasu gwarukuna badaydeanyu ng'asheega munyas, “Gayghami eeju, ak ghwaroat gheawungaaschi?”

⁶ Nea iihidu siyagi aba jeenyaawa gooloong'sean gwarugu ng'uyeega; ak iirita jarooda, gwarukuta aba hiji wassean.

⁷ Fuga sean sidan gaba nih meang'sheesa niirja aba badaydeanyu; nea gafurda ng'asheega munyas jea gabusean.

⁸ Hean gwayi saawa, “Niibisa badaydaanyi geeyooda muy; ak ea maygudu ghang'eat aba heeda lila.”

⁹ Eara siideanyu eaduupcheewi muuchi was dea aaghuschi, was dea eambuutooscheewi, niyamsean geaw aba heedeanyu ak ghabwaran.

¹⁰ Ak ang'iing'i, NG'UTAMIIDA, eaniyean bwaydanaan, gatkadean ak gaydawalda!

¹¹ Ak aba ng'asheanji ghaanali gideaba gibwariinyaan, aba gideaba weajoocheandeanyu mayghwaak badaydeanyu iijoaran.

¹² Ak aniini aba jeeda doobiiwnateanyu ea nigatkachean, ak ea niyiinyaan madeeda gheanyangaagu damanda manda muudeanooda.

¹³ Asi eakghaambiida NG'UTAMIIDA was ASEETA Israeli, eakghaambiida ghamneawa ea ghoah damanda manda muudeanooda! Amin! Amin!