NYIIGHEEGA 40 - Bibliyeeda Ghaydit

Duumda giigheambiita

¹ Ghaamuughu NG'UTAMIIDA nea ghaamilikghti; ak gwahiing'sean geaw ak ghwayiiy shookeasu.

² Ak gooruunanean jeeda shoomanda miyeeda, gageandeawanean jeeda sheang'weeda dabascheanda, ak ghwanung' ghamiinaada geeshangeasu aba uhuuda lagheaneeda haw ak goomajeek geeshangeasu.

³ Hean ghwayiin ghuuteanyu duumdeesh, was duumda giigheambiita ASEETEANYA. Gayghwadaah fuga saang'a ak ghabeal, ak ghwayiin ghusooda nyaawa heeda NG'UTAMIIDA.

⁴ Ghang'wana siida nung' ghoah NG'UTAMIIDA dea jea ghaghus, ak ea mayamsiina geaw fuga ghwarjeeda, ghana fugiga ramwasta ak ghabwat aseecheeka ng'uyeegean!

⁵ Ea NG'UTAMIIDA, was ASEETEANYU, nisineasa ng'asheega saang'a deamdeameadi; nea ng'asheega ibadayi sinooda aba badahuukaasa ea mwoamu eeyiida manda siida jea eamu eegalaneey! Gwachi iyeagasayi darukwiida nea geabalooli aasaang'a mwoamu eeyiida

⁶ Lukghumajeega ea haleanjeeda ghadooweeda mii bwariinya; ak ea nijaadi iidigeasu. Haleanjeeda ghadooweeda sighwarda ea haleanjeeda sighadoawanda aba badayda riing'eeda ghanyea migassi.

⁷ Ng'ata geayeenyi, “Asaha, aniini naawunyi; aba jeeda gitaabu sing'oorsa ng'asheega easinyi aniini.

⁸ Aniini ghaabwariinyi dasin gida ibwariinyi, Ea ASEETEANYU; deaweedeadaang'u gwanda jeeda gurooroodeanyu.”

⁹ Nearukwiidi iita doabiiw bea lealeanooda aba jeeda eemeeda saang'a bwatgeat; ak ginali, mii dadukuta ghuuteanyu Ea NG'UTAMIIDA.

¹⁰ Aniini mii dafuy ng'asheagaagu bea lealeanooda aba jeeda gurooroodeanyu, ak ea nearukuti doobiiwnataang'u ea lealeanoadaang'u miidafuy bariinyeagaagu ghana huumeandaang'u aba jeeda eemeeda saang'a bwatgeat.

¹¹ Nea ang'iing'i, Ea NG'UTAMIIDA, adiweadanaan baydeaydaang'u, nung' ghoahaaghwanaan bariinyeagaagu bea huumwa ea doobiiwnataang'u!

Mooshta ASEETA aba weeta

¹² Aba gideaba nineaweesean ng'asheega saang'a munyas; ng'asheegeasu munyas ninyasan, ea daraay daang'wearda; aasaang'a ea gaburdeawa buudeega uhuudeanyu; ak ea nimi gurooroodeanyu.

¹³ Ea NG'UTAMIIDA, mwasa lealnean, Ea NG'UTAMIIDA, weadaan nea gilamwaji!

¹⁴ Dabwaspwasa, ak ea danyga sean fuga gasa gwanuus gurooroodeanyu; deakghuumda bwadaw ak ghabwaspwas gea gasa gurooroodeanyu!

¹⁵ Gidabal fugiga juukeaniin ghabwaspwas aba joorda nyaawa, gea eeniisean, “Ang'iing'i, Ang'iing'i!”

¹⁶ Dahoosana nea gang'weeliiseey ang'iing'i; fuga sean bwariiy lealeanoadaang'u dayeena galeagasean, “NG'UTAMIIDA aahaw!”

¹⁷ Nea aniini geawooschi bwarbwar nea geawooschi ng'arng'ar; ak NG'UTAMIIDA ghoapkaadan aniini. Ang'iing'i guwoosi lealnoocheandeanyu ea ASEETEANYU; lamwajaana beeni weadaan!