NYIIGHEEGA 4 - Bibliyeeda Ghaydit

Mooshta ASEETA bea shing'ada aba gassooda weeta

¹ Shaaha ghuuteanyu iyeaguurneey Ea ASEETEANYU bea doobiiwnateanyu! Damanda eandeewi jeeda sawanadeeda giweachaan. Bwaydanaan ak giyiinyi mooshteanyu bea ASEETA.

² Ea buuneeda, mureedeanyu gajoapwaaspwaasa ea ghoah eeju? Gajabwariinya ng'asheega marachi gil ea ghoah eeju nea googaseadayi ng'uyeega?

³ Ak ghoanali gideaba NG'UTAMIIDA niloosa geaw fuga doobiiweadi, NG'UTAMIIDA gayghwayiiy iyeaguursi.

⁴ Anyareasa nea adoosinyi riing'eeda, ooteemsheesiina aba gurooruunatkeagwa aba bulaleengeagwa ak ghoapichi ng'eanyi.

⁵ Oatayda lukghumajeega doabiiw, ak ghoaghuschi NG'UTAMIIDA.

⁶ Gwanda fuga saang'a eena, “Gayghoahiimneasa ng'eaha ng'asheega miyaas? NG'UTAMIIDA, aboong'neasa weeshinda gheamamdaang'u.”

⁷ Ninyiin hooseaneega jeeda gurooroodeanyu, ea ghwanaawa damanda siitawa booga saang'a ea difaayi.

⁸ Aba hoyyoo gaydawiil geaw ak geabay danyas ruweanga, aba gideaba ang'iing'i NG'UTAMIIDA gibeahi geaw, ak iissa ginung' daba seayu.