NYIIGHEEGA 39 - Bibliyeeda Ghaydit

Duukuunooda siida sawana

¹ Asi geayeenyi, “Gaydafur naweadingeasu, ak ea measini riing'eeda aba ng'ushapteanyu; gaydarat ghuuteanyu aba damanda duu gwandeewa siida muy madeedeanyu.”

² Abeeda meabalooli geayi saw, mandanean hooseaneega; ak ghwaraanya sawanadeedeanyu,

³ ak ghoah gurooroodeanyu beasta aba jeedeanyu. Ak gideateemsheati, ghwayeat beasta; hean geabalooli aba ghuuteanyu.

⁴ “NG'UTAMIIDA, nung' danal muudeanooda eaweegeasu, ea mooneeda askwearjoojigeasu giteena; ea gidayang'da nuweaknata eaweegeasu!

⁵ Ng'ula, gidanuwaasta askwearjoojigeasu igoonyean bea giibinda, ak gawuurji eaweegeasu gili mii gili aba madeadaang'u. Aba huumwa giliwas sih ghamiinaada nea gawuurji jeameeda mwadaagha.

⁶ Siida iissa gawa nea gagal hoowa ea hoowa gawuurji jirooneeda! Iissa gwasin ng'ooweata mwadaagha marachi gil; iissa ghoawaam haleanjeeda ak ea mwanala siida jea gageanda!

⁷ “Ak ghamneawa, ghaamuughu naaha NG'UTAMIIDA” Aniini ghaaghuscheey.

⁸ Lealnean aba riing'eegeasu sean adinung' gafoolan siida dasha.

⁹ Naasiindi ak ea maydajaat ghuuteanyu aba gideaba ng'asheesu gisini ang'iing'i.

¹⁰ Geandeawanean lasoadaang'u; aba gideaba niriikghta dami aba lasooda ilaschaan aba geatindaang'u.

¹¹ Iissa girgu ng'asheega ng'weani nea gilasi siida sin riing'eeda, ak gawuurji muguyga ghwaak gidida bwariiyiin; aba huumwa giliwas siida gawuurji jeameeda.

¹² “Ea NG'UTAMIIDA, iinya gidaamwaashchi, ak gighamwadi iitaang'u iinya shookeasu; beeni weadaan iyeayeawdi! Aba gideaba aniini geawooschi rabascheandaang'u ng'ata, bareanyeanda, geawuurjeewi ghweanigeasu sean.

¹³ Nung'waada ading'ulean ghanyi danyas hooseaneega gilimwanang' heeda mii dameawa ak ghaaroachi ea mudu danda.”