NYIIGHEEGA 33 - Bibliyeeda Ghaydit

Duumda giigheambiita

¹ Ahoosasiina NG'UTAMIIDA, agoogeeda oowooschi doobiiweadi! giigheambiita ghwadoabiiw aba heeda fuga miyaasiin gurooruunat.

² Abadiischeesiina NG'UTAMIIDA aba gidoondooriida, aba ginaandeeda mideawa gheareedan damanamughuush ak goosarmanyi alooheeda!

³ Asarmasiina niny duumda eesh, abwarana gearinda nea goochuurji.

⁴ Aba gideaba ng'asheanda NG'UTAMIIDA ea doabiiwaat; nea gadiyoojigaaschi sean gwasina doobiiwnata.

⁵ Niny ghabwariiy doobiiwnata ea girgweageeda, ng'eanyiida ghwanyiit bariinyeega huumwa bea NG'UTAMIIDA.

⁶ Aba ng'asheanda NG'UTAMIIDA geesin humng'eeda, ea lugoadaanyi sean aba aroosta ghuutaanyi.

⁷ Ghabwada geat beega basooda gawuurji gili mida jupajeanda; ak ghwayiin beega saang'a bea bugusta basooda jeeda gijigooda.

⁸ Ng'eanyiisean daawala NG'UTAMIIDA, fuga sean abiita ng'eanyiida damiinaada aba gheawalmeadaang'u!

⁹ Aba gideaba niny ghayi gwarugu ak gwasa; ak ghwanya ghuuta ak gamajeegiit.

¹⁰ NG'UTAMIIDA iissa ghwalalakta girgweageeda eemoojiga; ak gwahista fughareenga buuneeda.

¹¹ Girgweageeda NG'UTAMIIDA ghamiinaada damanda manda muudeanooda, gidagasa gurooroadaanyi ghwahita seaygoojiga.

¹² Ghang'wana eemeeda was ASEETA NG'UTAMIIDA, nyaawa, fuga loat ghoah hearaniischoadaanyi!

¹³ NG'UTAMIIDA gang'ulu nea gwanda humng'eeda, ak gang'ula buuneesean;

¹⁴ ghang'eada hoorgeadaanyi abiita iissa gang'ula buuneesean mida ng'eanyiida,

¹⁵ ninyeeda sin gurooruunatka nyaawa sean, nea gang'ula gadiyoojiga nyaawa sean.

¹⁶ Manda sugoocheanda jea ghaghu aba gideaba gwandeawa lugooda saang'a; nea siida mwaay iissa ea mwaghu aba hawunda uurdaanyi.

¹⁷ Faraasi marachi gil aba nyasooda jooriischooda, ak ea moamu ghoaghu siida aba hawunda uurdaanyi.

¹⁸ Ng'ula gheang'da NG'UTAMIIDA gwanda heeda fuga bada, was geah amuuku bariinyeagaaschi bea huumwa.

¹⁹ Niny iissa ghoaghuuha eaweega nyaawa miyeeda, ak ghoaghu saawa damanda geejeeda.

²⁰ Gurooruunatkaasa gafurda NG'UTAMIIDA; niny dea weadeasa gil ak ea igeambooda.

²¹ Aba gideaba gurooruunatkaasa gaygahoosassa niny, aba gideaba geaghuschi gheawungaaschi ghaydit.

²² Ea NG'UTAMIIDA, bariinyeagaagu deabiidana heedeanya, gawuurji gidasifurdeaydaneey ang'iing'i.