NYIIGHEEGA 32 - Bibliyeeda Ghaydit

Duukuunooda ea samsiinda

¹ Ghang'wana siida sisamsa riing'eeda nea geegeanda giidiinyeanyeekaaschi.

² Ghang'wana siida mayiita NG'UTAMIIDA giidiinyeanyeekaaschi manda jeeda gurooroadaanyi munyinda.

³ Damanda mearukunani riing'eedeanyu hean ghwanyar saseedeanyu ak ghaamnyaanyi askwearda sean.

⁴ Aba gideaba askweari ea eawa ghabwatanaan geatindaang'u ak ghaghajaamiit gheawoocheandeanyu ea dawuurji ng'eanyiida ghajaam damanda geayda.

⁵ Ak aniini gearukuneey riing'eedeanyu, ak ea mii dafuy munyindeanyu ak geayeenyi “gaydamwas giidiinyeanyeekeasu aba heeda NG'UTAMIIDA”; ak gisamsean aba gidaroat aba riing'eedeanyu.

⁶ Asi giliwas sih bada ASEETA damwaashnyi ghawooda; nea damanda sawanadeeda, bea guldeayda beega saang'a, ea mayghwahita headaanyi.

⁷ Ang'iing'i guwoosi igeamboodeanyu, ang'iing'i giihaaghwanaan damanda sawanadeeda, gajaneaweesean duumjeenga lealeanooda.

⁸ Gaydaanaalnyi nea ghaahiimneey naweeda jea laabwa gaydeargweakseey nea gang'uleey gheang'deanyu.

⁹ Adiwuurjeewi faraasi ghana digeeda dasha, sighus eerata ghealooda ea laweachkweeda, ama sunu ghanyea mayneekiisiina.

¹⁰ Nea siida muy gayghwanyas sawanadeeda haw; ak siida ghus NG'UTAMIIDA gaygwaneaweesa bariinyeega huumwa.

¹¹ Ahoosasiina NG'UTAMIIDA; ang'weela, agoogeeda oowooschi doobiiweadi oochuura nea goong'weelayi, ea oogaseaneeda mideawa gurooruunatka miyaas.