NYIIGHEEGA 31 - Bibliyeeda Ghaydit

Mooshta ASEETA bea ghusoadaanyi

¹ Neafachsi headaang'u ea NG'UTAMIIDA, ak ea mwaabwaspwasi damanda manda muudeanooda. Weadaan aba doobiiwnataang'u,

² Ghamwada iitaang'u, ak gilamwaji weadaan, ak gihuuwi aba heedeanyu lagheaneeda mideawa uurda, gealga hilooga jea ghaweadan.

³ Ang'iing'i guwoosi gwaleedeanyu ea ghamardeanyu majeek; ak aba gheawungaagu giidoabiiwjaan nea giihaaghwanaan,

⁴ Aruunanean jeeda ghaseeda sifunyanaan, aba gideaba ang'iing'i guwoosi dea eamng'awsi.

⁵ Ghaayiinyi gurooroodeanyu geatingaagu; ak niighuuyaan Ea NG'UTAMIIDA was ASEETA doabiiwaat.

⁶ Ghaasichi fuga bada sanaamooda ng'uyeega, nea aniini ghaaghuschi NG'UTAMIIDA.

⁷ Gaydahoosan, nea geang'weelayi aba bariinyeagaagu bea huumwa, aba gideaba nidaahi sawanadeedeanyu, ak ea ning'ulayi gideasawaneati,

⁸ ak ea mii iinaan geatinga weajoocheanda; ak ea ninung' ghamiinaada geeshangeasu aba heeda bwara.

⁹ Ea NG'UTAMIIDA, bwaydanaan aba gideaba geandi jeeda sawanadeeda; gheang'deanyu nibur aba giiseaneega, eara gurooroodeanyu ea saseedeanyu.

¹⁰ Aba gideaba eaweegeasu niisha aba giiseaneega, ea gweanyeekeasu aba miyeanda; uurdeanyu ghaboadan aba munyindeanyu, nea geakeasu ea nigajeamiidi.

¹¹ Naahuuyi siida sifool aba jeeda weajoodigeasu, ak ghaanung' ghabeal giischeewdeanyu, nea geawooschi siida nung' ghabeal fuga eaduupcheewi; nea fuga daahan aba naweeda gamng'aw.

¹² Mudeapkaadan geawuurjeewi musta mudeapkaat; ak ea neawuurjeewi dabicheanda nyar.

¹³ Asaha, naayiinyi gwanda meang'shooda fuga saang'a– ak gwanda muuwda meadajeega sean!– Hean nea gabaloola badaydeanyu, gwasin milmilanda jea gageandeawa eaweegeasu.

¹⁴ Nea aniini ghaaghuscheey ang'iing'i, NG'UTAMIIDA, ak geayeenyi, “Ang'iing'i guwoosi ASEETEANYU.”

¹⁵ Eaweegeasu gwanda geatingaagu; aghuuhaan aba geatinga weajoodigeasu ea gea ghabwasan.

¹⁶ Ng'ula siidaang'u bea gadiyeeda aba weeshinda gheamamdaang'u; aghuuhaan aba bariinyeagaagu bea huumwa!

¹⁷ Ea NG'UTAMIIDA, adeapwaaspwaasan aba gideaba neaguurneey, abwaaspwaasa fuga miidoobiiweadi, ak ghwasiinda aba gheeda maloonghajeega.

¹⁸ Dukuta ghuusiga fuga ng'uyyeega ruku ng'asheega ghwarjeeda aba badayda siida doabiiwaat aba weashweashta ea foolaweega.

¹⁹ Aba giteena hawunda alooheadaang'u, ak giidawi fuga bada gheawungaagu, ghayi isisi fuga mang'awsa headaang'u aba madeeda buuneeda!

²⁰ Ak gifunyi aba heeda bea seayu iibiiti, sheageewa gadiyoojiga munyas bea buuneeda; ak giyiini heeda bea seayu iihaaghwi ang'iing'i, sheageewa sheang'nyeeda weajoodiga nyaawa.

²¹ Eakghaambiida NG'UTAMIIDA; aba gideaba niihiimu bariinyeagaaschi bea huumwa damanda eandeewi jeeda mujiineeda sineaweesa.

²² Ak geayeenyi aba jirjireegeasu, “Aniini sihoanan dasheagiida madeeda gheanyangaagu.” Ak ang'iing'i ea niyiinyi mooshteanyu bea ASEETA, damanda eayeawusiinaneey aba weeta.

²³ Abwariinya NG'UTAMIIDA, oogasean oowooschi fugaaschi ghaydidi! NG'UTAMIIDA iissa ghoahaaghwa fuga doobiiweadi, nea ghwalas siida ghwarjeeda aba gidida deaschiin.

²⁴ Adaruusiita ak ghoahhang'waanyi guroorooda agooga oogasean oamuughu NG'UTAMIIDEAN.