NYIIGHEEGA 29 - Bibliyeeda Ghaydit

Ghuuta NG'UTAMIIDA gwandeawa uurda

¹ Oatawa NG'UTAMIIDA, ea diibiga ASEETA; oatawa NG'UTAMIIDA giigheambiita ea uurda.

² Oatawa NG'UTAMIIDA giigheambiita gheawungaaschi aghadoawana NG'UTAMIIDA aba alooheeda ea ghaydidanda.

³ Nyeashta NG'UTAMIIDA gwanda badayda beega, ASEETA ghaambiidaat ninung' ghwanya daghata humng'eeda; NG'UTAMIIDA gwanda badayda beega saang'a

⁴ Daghata NG'UTAMIIDA gwandeawa uurda daghata NG'UTAMIIDA ea ghaambiidaat;

⁵ Daghata NG'UTAMIIDA gwahirjeaweada gubooyeeka, NG'UTAMIIDA gwahirjeaweada gubooyeeka Lebanoni;

⁶ ghwanung' gwadeambiiriida meayda, Lebanoni ea Siriyoni ak ghwanung' gawuurji meayda muweasta.

⁷ Nyeashta NG'UTAMIIDA gooruudu ng'ushapta beasta;

⁸ Daghata NG'UTAMIIDA ghwanung' gwaduumduum dareapcheeda, NG'UTAMIIDA gooduumduum dareapcheeda Gadeshi.

⁹ Daghata NG'UTAMIIDA iissa ghwanung' gwaji mayeanda, ghwanung' gwaduumduum mareamboojiga, ak ghwanung' ghoabitpit seenga geediga dareabeeta, nea gwayi sean aba jeedeaba gheanyi sibata ASEETA “Giigheambiita gaba ASEETA!”

¹⁰ NG'UTAMIIDA goopteada aba badayda roopta haw; NG'UTAMIIDA goopteada aba uhuuda hoorgeeda gheambalmeeda ghoah sugoocheanda damanda manda muudeanooda.

¹¹ NG'UTAMIIDA gayghoadaw fugaaschi mureeda! Gidabal ghoadaw NG'UTAMIIDA fugaaschi ghawooda aba hoyyoo!