NYIIGHEEGA 25 - Bibliyeeda Ghaydit

Mooshta ASEETA bea giidoobiiwda ea haghweeda

¹ Ea NG'UTAMIIDA, mooshteanyu geagealu headaang'u.

² Ea ASEETEANYU, aniini ghaaghuscheey, ak ea adaabwaspwaschi; adagahoosan weajoodigeasu aba joordeanyu.

³ Asaha, fuga amuukghuneey mayghabwaspwas eara akaleala; dabwaspwasa fuga sean heawaneey mwadaagha;

⁴ Ea NG'UTAMIIDA, nung' danal naweadingaagu; anaalaan naweadingaagu.

⁵ Adoabiiwaan aba jeeda huumeandaang'u, ak giinaalaan, aba gideaba ang'iing'i guwoosi ASEETA lealeanoodeanyu; aniini ghaamuukghneey ang'iing'i askwearda sean.

⁶ Ea NG'UTAMIIDA, apkaada baydeaydaang'u ea bariinyeagaagu bea huumwa, aba gideaba nibay gwanda ghang'eada garayi.

⁷ Adiipkaadi giidiinyeanyeeka gheareemaneanduumeedeanyu, ghana munyindeanyu, apkaadaan aba giteena bariinyeagaagu bea huumwa, Ea NG'UTAMIIDA, aba bariinyeagaagu!

⁸ NG'UTAMIIDA aamiy; ak ea doabiiwaat, ak gayghoanaal fuga riing'eega naweeda.

⁹ Fuga ng'eeni gajadoabiiwa aba girgweageeda, ak ghoanaal fuga ng'eeni naweadaanyi.

¹⁰ Naweadinga sean bea NG'UTAMIIDA bariinyeega huumwa gil ea doobiiwnata, aba heedeaba fugiga ang'waay neajeadaanyi ea ng'asheagaaschi muuwu.

¹¹ Ea NG'UTAMIIDA, aba gheawungaagu, samsean munyindeanyu, aba gideaba aasaang'a.

¹² Ng'eaha siida moora NG'UTAMIIDA? Gayghoanaal aba naweeda jea ghwaat.

¹³ Siida sunu gayghwanyagaada galeaga sean, nea diibigaaschi gaygwahearan ng'eanyiida.

¹⁴ Duupcheeda NG'UTAMIIDA gwanda heeda fuga awali gheang'da, ak gayghwanung' ghwanal saawa neajeadaanyi.

¹⁵ Gheanyangeasu geageali heeda NG'UTAMIIDA, ak gaygageandeawa geeshangeasu jeeda gheareedanga.

¹⁶ Ea NG'UTAMIIDA yamni geaw, ak gibwaydanaan; aba gideaba geabeayi geaw ak geesawanan.

¹⁷ Aba jeeda sawanaduutka gurooroodeanyu, gigeandeawanean jeeda sawanaduutkeasu.

¹⁸ Ng'ula ghabasteanyu ea sawanadeedeanyu, ak gisamsi riing'eegeasu sean.

¹⁹ Ng'ula weajoodigeasu aba gideaba aasaang'a, ghwastan aba sicheeda ng'waan.

²⁰ Ahaaghwana eaweegeasu, ak giihaapchaan; adaabwaspwaschi, aba gideaba geamang'awsi headaang'u.

²¹ Alooheeda ea doobiiwnata gagasa ghoahaaghwanaan, aba gideaba aniini ghaamuukghneey ang'iing'i.

²² Ea ASEETA, lealni Israeli, aba jeeda sawanaduutkaaschi sean.