NYIIGHEEGA 22 - Bibliyeeda Ghaydit

Shooka sawanadeeda ea sarmeeda giigheambiita

¹ ASEETEANYU, ASEETEANYU, ghwasaan anda ginung'usean heeda? Ghwasaan anda guwoosi sheagi aba weeteanyu, aba ng'asheega sawanadeedeanyu?

² Ea ASEETEANYU, geayeawdi askweari, ak ea mishaahi; ea damandeaba eawa, ak ea mwaanyasi hawdeayda.

³ Ak ang'iing'i guwoosi Ghaydit, nea ang'iing'i giimbaliischi nea ghoaghaambiinyi Israeli.

⁴ Gheambaghweanigaasa ghayi ghaghusnyi ang'iing'i; saawa ghaghusnyi, ak gilealu saawa.

⁵ Gooyeawuseey ang'iing'i, ak geelealu; ak ghaghusnyi ang'iing'i, ak ea mabwaspwasa.

⁶ Ak aniini geawooschi diyeayda, meawoosi siida; dea juuga buuneeda, nea gafool eemeeda.

⁷ Fuga sean daahan gabareewean budeay, iissa gooleechiisean ghuut, nea goodiindiil iheenga nyaawa.

⁸ “Gwayeena, ang'iing'i gighusi NG'UTAMIIDA; abeeda dalealneey niny, nung'waada gwalealu niny siisi, aba gideaba niny ghabwariiy siisi!”

⁹ Ang'iing'i guwoosi dea aruunanean jih; ak ginung' daba seayu nea ghaaghuschi gidinga iyya.

¹⁰ Ak aba ang'iing'i geejaknean aba jeata sijiilan, nea dea nijiilanean iyya guwoosi ASEETEANYU.

¹¹ Adisheagiidanean aba gideaba sawanadeeda eaneeki ak ea manda siida jea ghaweadan.

¹² Weajoodiga saang'a gwaneaweesean aniini gawuurji jiirgwa, gawuurji jiirgwa meanyi bea ng'eanyiida Bashani;

¹³ goobareaysean ghuusiga nyaawa, gawuurji ng'adiida amuum nea ghabwaashaada gida.

¹⁴ Aniini neajageadaydi beega, ak geakeasu sean ea niheeldooschi; gurooroodeanyu niwuurji hideeda, nyar aba daghateanyu;

¹⁵ muwookteanyu nighajaamiit ea gawuurji rabagiida, nea ng'ushapteanyu ea ninoas geat sea gharooshkeasu; ak giyiinyaan jeeda birjeanda miyeeda.

¹⁶ Aba gideaba nineaweesean gudajeega; ak ea nineaweesean mughuusheanda fuga munyas; ak ea niingoor geatingeasu ea geeshanga–

¹⁷ Ghaamuuschi dayiida geakeasu sean– weajoodigeasu gang'ulean nea ghwaak badaydeanyu;

¹⁸ saawa gwalaja hang'weakeasu, ak eara hang'weakeasu gang'alealeesa.

¹⁹ Nea ang'iing'i, NG'UTAMIIDA, ea adisheagiidi! Guwoosi uurdeanyu, lamwajaana weadaan!

²⁰ Weada gurooroodeanyu aba ng'uta, weada eaweegeasu aba uurda gudeeda!

²¹ Lealnean aba ghuuta ng'adiida, gurooroodeanyu sawana aba gujakeaba muweaksu!

²² Gaydarukwiisa gheawungaagu buweadeegeasu; nea aba jeeda eemeeda gaydaaghaambiinyi.

²³ Agoogeeda bada NG'UTAMIIDA, oakghaambiida niny! Oogaseaneeda oowooschi jeata Yakobo, oakghaambiida niny, aghadoawana niny oogasean oowooschi jeata Israeli!

²⁴ Aba gideaba mii gafool ghana ghaghasghas sawanadeeda siida sisawan; ak ea mii ghafunya gheamamdaanyi, nea niny ghwayiiy, iyayeawusa niny.

²⁵ Headaang'u gwaleabu giigheambiiteanyu aba jeeda eemeeda saang'a, gaydaadayda haleanjeeda aarachi aba madeeda fuga awali gheang'daanyi.

²⁶ Fuga ng'eeni barbari gaygweagiischi ea gwalang'u, fugiga gasa NG'UTAMIIDA gayghoaghaambiit niny! Gidabal goobiida gurooruunatkeagwa damanda manda muudeanooda!

²⁷ Muudeanooda sean bea ng'eanyiida gayghoapkaat ak gaygwayamsa geat NG'UTAMIIDA; ak buuneesean bea eemoojiga gayghabwat niny.

²⁸ Aba gideaba gheambalmeeda gaba NG'UTAMIIDA; ak niny ea dea ambal eemoojiga.

²⁹ Niny dea jea gwahiiysa geat fuga ghwarjeeda sean bea ng'eanyiida; madeadaanyi gaygwahiing'sa geat ng'eanyi buuneesean jea gaweay jeeda birjeanda; ea siida moamu ghoaghu eaweagaaschi.

³⁰ Niny gaygagadiyeesa jeacheangaaschi; buuneeda gaygwarukwiida iita NG'UTAMIIDA aba seaygeeda jea ghwahidu,

³¹ Ak gaygwarukwiisa doobiiwnataanyi fuga miyeeji gideaba niny dea ghayi sin.