NYIIGHEEGA 21 - Bibliyeeda Ghaydit

Giigheambiita aba jooriischooda

¹ Ea NG'UTAMIIDA, gaygahoosan sugoocheanda aba uurdaang'u; nea lealeanoadaang'u gaygahoosassa muuchi!

² Ang'iing'i niidawi gidagasa gurooroadaanyi, ak ea muweadani ng'asheega gasa ghuutaanyi.

³ Aba gideaba ninung' goosiipsa niny ghawooda miy; ak ea niyiini uhuudaanyi shiipka dahaabooda miyaas.

⁴ Gamusnyi eaweega; ak giidawi, askwearjoojiga saang'a damanda manda muudeanooda.

⁵ Giigheambiitaanyi aahaw aba lealeanoadaang'u; mureeda ea alooheeda niyiini uhuudaanyi.

⁶ Nea ghawoadaang'u gaygwandeawa damanda manda muudeanooda; ak ginung' gahoosan aba hooseaneega gheamamdaang'u.

⁷ Aba gideaba sugoocheanda iissa ghaghus NG'UTAMIIDA; ak bariinyeagaaschi bea huumwa bea dea mida Humng'eeda majeegeanda.

⁸ Geatindaang'u gaygwahista weajoodigaagu sean; geatindaang'u bea dugwa gayghwanyas fuga sinyi.

⁹ Gaynung' gawuurji duwayda beasta iihiti. Gayghwanukghuta NG'UTAMIIDA saawa aba nyarastaanyi, ak gayghwalasa uhuuda nyaawa beasta.

¹⁰ Gaylasa uhuuda jeacheenga nyaawa aba jeeda ng'eanyiida, ea diibiga nyaawa aba jeeda buuneeda.

¹¹ Nea iibada gideaba gaygwasimaneey ng'asheega munyas, nea gwashisseey ghaang', ea mayghoamu.

¹² Aba gideaba gaynung' gamng'aw; gajageala geatkaagu gheanyanga nyaawa.

¹³ Ea NG'UTAMIIDA, gagasa eakghaambiinyi aba uurdaang'u! Ak gajeesarmana nea geakghaambiichi uurdaang'u.