NYIIGHEEGA 2 - Bibliyeeda Ghaydit

Sugoocheanda siloat bea ASEETA

¹ Ghwasaan anda eemoojiga gwasin ng'asheega munyas, ak gabada buuneeda sinooda ng'asheega munyas?

² Sugoodiga ng'eanyiida gwasisin geat, nea fuga hees gwaneaji ng'asheanjagi, aba badayda NG'UTAMIIDA ea dea siidaanyi simwaar, nea gwayi

³ “Eeheeleewana geat gheambalmeeda nyaawa, ak geanung'wi heeda gheambalmeeda nyaawa.”

⁴ ASEETA abiita humng'eeda, ghwaak reari; ak gabara NG'UTAMIIDA saawa budeay.

⁵ Ak gaygoobalool saawa aba nyarastaanyi, ak ghwanung' ghabeal aba ng'weanindaanyi.

⁶ “Ak aniini ea naambiichi sugoocheandeanyu aaloachi aba uhuuda Sayuneeda was giijeedeanyu ghaydit.”

⁷ Gaydarukwiida diigheanda NG'UTAMIIDA; ak gwayeeshiinean, “Ang'iing'i guwoosi orjeedeanyu, askweareani aniini neajiileey.

⁸ Musean, ak gaydagoonyi eemoojiga jea hearana, nea giimbali muudeanooda ng'eanyiida ghoah daang'u.

⁹ Gaybwarana bileangida gharinyeanda, ak ginyarjeawdi dabicheanda sigeeda.”

¹⁰ Ak ghamneawa, ea sugoodiga, asina fughareeda, ayiing'sheena iisireekuseegwa ea fuga ahaaghwa ng'eanyiida.

¹¹ Agadiyeesiina NG'UTAMIIDA nea ghoabwachi, Asarmasiina nea ghoaboadanyi,

¹² Oang'waanya ng'asheega miyaas, adiidu ghwanyareas ak goorootiisi naweeda, aba gideaba nyarastaanyi gaygabay ghwayeat; ghang'wana fuga mang'awsa headaanyi.