NYIIGHEEGA 18 - Bibliyeeda Ghaydit

Sarmeeda Dawdi bea jooriischooda

¹ Ea NG'UTAMIIDA, aniini ghaabwariinyeey ang'iing'i guwoosi uurdeanyu.

² NG'UTAMIIDA niny lagheaneedeanyu hawi, ea hilgweandeanyu, ea lealnoocheandeanyu, ASEETEANYU, ea lagheaneedeanyu was dea eamng'awsi, igeamboodeanyu eadiinyi, ak ghoahaaghwanaan ak ghwanung' daba seayu.

³ Gaydaguursa NG'UTAMIIDA, miisa giigheambiita, ak ghaaghuuyi aba heeda weajoodigeasu.

⁴ Ghealooniga miyeeda nineaweesean, ning'udanaan guldeayda muy bea muuwda.

⁵ Ghealooniga gheeda maloonghajeega nineaweesean, ghaseeda miyeeda gagalnean.

⁶ Aba jeeda sawanadeedeanyu geaguursi NG'UTAMIIDA, ak geayeawusi ASEETEANYU ghaweadan. Ak ghwayiiy ghuuteanyu aba gheanyi sibata niny, ak ghwahita shookcheandeanyu iidigaaschi.

⁷ Amadu gwaduumduum ng'eanyiida nea ghaboadan, nea gwaduumduum sindeeta giijeega nea gwasin geaw, aba gideaba ninyareas.

⁸ Ak gwardu aroosta aba sareenuukaaschi, nea gwarina ghuutaanyi beasta ajeada; ak ghwayeat ghuurga was rarayga leabu headaanyi.

⁹ Ghwanung' ghwahiiy geaw humng'eeda ak ghwararang'aan, ak gamisaniit muuchi hing'eadayda geeshangaaschi.

¹⁰ Gwading'da badayda geeruubajeanda ak ghang'eata; ak ghang'eata nea ghwalamwajaada ak ghwanaawa meang'eega jeameeda.

¹¹ Ghwanung' ghoah misaneeda headaanyi jea gafuysa geaw, nea ghoah maheemajeanda jea gwaneaweesa shamooghuutka durumani nyiit beega.

¹² Ghwayeat dadamandeeda aba madeadaanyi ak ghwahidu shamooghuutka roopta lagheanga ea rarayga beasta.

¹³ Ak ghwanya ghuuta NG'UTAMIIDA aba humng'eeda, ak ghwanya daghata ASEETA mida humng'eeda, sea roopta lagheanga ea rarayga beasta.

¹⁴ Ak gwahista geatkaaschi ak ghwanung' ghwadarda, nea ghwanung' ghwayeat dadamandeeda, ak ghoadaarda saawa.

¹⁵ Hean geadaah uuta basooda, ak geanung' ghwadaajiit sindeeta ng'eanyiida, Ea NG'UTAMIIDA, aba gidireekusiindi ang'iing'i, aba ginyaashta jeameeda sareenuukaagu.

¹⁶ Ak ghwaan nea gwaleabu humng'eeda, ak ghoang'waanyan, ak gooruunanean jeeda beega saang'a.

¹⁷ Ak gwalealnean aba heeda weajoocheandeanyu, ea heedeaba fugiga sidaniin; aba gideaba saawa gaburdeawean uurda.

¹⁸ Ak geang'ucheewi eaweeda sawanadeedeanyu; ak NG'UTAMIIDA ea dea aaghuschi gil.

¹⁹ Ak gooruutanean ea ghoahiitanaan heeda eabeayi seayu; ak gwalealnean aba gideaba ghabwariinyan.

²⁰ NG'UTAMIIDA ghoamwaaran aba giteena doobiiwnateanyu; aba gisam alooheeda geatingeasu ghoah gidagoonan.

²¹ Aba gideaba naang'waanyi naweadinga NG'UTAMIIDA, ak ea mii danung'wa heeda ASEETEANYU.

²² Girgweaguutkaaschi gwanda madeedeanyu, ak ghanyea mii danung'waada diigheanyeekaaschi.

²³ Ak aniini geawooschi doabiiwaat aba madeadaanyi, nea ghaasaji geaw munyinda.

²⁴ Ak ea nigoonan NG'UTAMIIDA giteena doobiiwnateanyu, aba giteena alooheeda geatingeasu aba madeadaanyi.

²⁵ Nea aba heeda siida doabiiwaat iissa guwoosi doabiiwaat, nea aba heeda siida miy iissa giihiimu geaw gideaba guwoosi miy;

²⁶ nea siida niimmiidu geaw gajahiimni geaw gideaba guwoosi ghaydit; nea aba heeda siida muy gajahiimni gideaba guwoosi ng'waan.

²⁷ Aba gideaba ang'iing'i gaylealni fuga sisawan, nea gheanyanga ghwarjeeda gayhiing'ni.

²⁸ Aba gideaba ang'iing'i giiyeadi gheaboonyaneedeanyu; NG'UTAMIIDA was ASEETEANYU ghoabwaay misaneedeanyu.

²⁹ Aba gideaba aba weataang'u gaydabwar lugooda; ak aba ASEETEANYU gaydaamu danaawa ghamarda.

³⁰ ASEETA naweadaanyi ea doabiiwaat; neajeeda NG'UTAMIIDA iissa gaba huumwa; niny igeambooda fuga sean mang'awsa headaanyi.

³¹ Ak ea ng'eaha dea was ASEETA, meakghusa NG'UTAMIIDA? Ak ea ng'eaha dea was lagheaneeda meakghusa ASEETEANYA?–

³² ASEETA dea rateewean ghealooda majeegi, ak ghwanung' gaba seayu naweedeanyu.

³³ Ak ghwanung' gawuurji geeshangeasu gea mayeanda, ghwanung' damiinaada aba heedeanyu diyeada nea geabeayi seayu.

³⁴ Niny ghoanaal geatingeasu ng'ucheeda, ak ghoamu geatingeasu gagis ghuweang'da oomu.

³⁵ Ak ea nigoonyean igeambooda lealeanooda leabu headaang'u, geatindaang'u bea dugwa ghoang'waanyan, nea weataang'u ea ninung' daheedu.

³⁶ Ak gisisi dageascheeda heeda aalaabwaadi, ak ea mii ghwadarasha geeshangeasu.

³⁷ Gaydaat geeshta weajoodigeasu ak ghaang'waanyi; ak ea maydabiikta bwadaw ea dahuuyda.

³⁸ Gaydabwar ea ghwaraay ghamiinaada; ak gaygoobeedeaysa jeeda geeshangeasu.

³⁹ Ak ang'iing'i ea nirachaan aba ghealooda uurda aba ng'ucheeda; ak ginung' dajoar weajoodigeasu.

⁴⁰ Ak ea ninung' goofuursean weajoodigeasu badahuuka, nea giika sidaniin ghaalaschi uhuuda.

⁴¹ Googuul nea gagasa weeta, ak ea manda siida jea ghaweat; ak gaguursa NG'UTAMIIDA, ak ea mwasha ghuusiga nyaawa.

⁴² Ak ghaabwardaaydi saawa birjeanda madeeda jeameeda, ak geahisi jarooda gawuurji sheang'weeda naweeda.

⁴³ Ak ea niweachaan aba ng'alealeeda buuneeda; ak ginung' dawa madeeda eemoojiga; ak ghaweadan fuga mwaanali.

⁴⁴ Hean nea ghwanyas iiteanyu gwasinnean mureeda; ak ghapka rabasta heedeanyu nea gwatkunyean.

⁴⁵ Ak eara rabasta gabur iheenga nyaawa, ak gwariteawa jeesinga ghoorajeega nyaawa nea ghaboadanaada.

⁴⁶ NG'UTAMIIDA dea majeek gil, eebadiischeesiina lagheaneedeanyu;

⁴⁷ niny dea nung' daamu dawalda mureandooda gil ak ghwajoar eemoojiga ak ghwayiin hing'eadaydeanyu;

⁴⁸ ak ghoaghuuhan aba heeda weajoodigeasu; asaha, ak goodiing'danean danaawa fuga was weajoodigeasu; ak ghoaghuuhan aba heeda siida ghwarjeeda.

⁴⁹ Asi, NG'UTAMIIDA, gaydabadiischooweey aba jeeda eemoojiga, nea geasarmanyi giigheambiita gheawungaagu.

⁵⁰ Ak ghoadaw sugoocheandaanyi lealeanooda haw, ak goohiimsa bariinyeagaaschi bea huumwa siidaanyi amwaar, heeda Dawdi sea jeacheangaaschi damanda manda muudeanooda.