NYIIGHEEGA 148 - Bibliyeeda Ghaydit

Ng'eanyiisean daduumsheesiina ASEETA

¹ Eakghaambiida NG'UTAMIIDA! Oakghaambiida NG'UTAMIIDA ghang'eada humng'eeda Oakghaambiida niny aba heetiyeada!

² Oakghaambiida niny, malaykajeagaaschi sean, oakghaambiida niny, lugweagaaschi sean bea humng'eeda!

³ Oakghaambiida niny, aseeta ea sheeda, oakghaambiida niny, oogasean was miinga meeng'meeng'i!

⁴ Oakghaambiida niny, agoogeeda oowooschi humng'eeda sheagi, ea agooga beega mida humng'eeda!

⁵ Anung'waada saawa ghoaghaambiit gheawunga NG'UTAMIIDA! Aba gideaba gwarugu ak geabwat haleanjeeda sean.

⁶ Ak goomajeek saawa damanda manda muudeanooda; aba diigheanda mwoamu eayam.

⁷ Oakghaambiida NG'UTAMIIDA aba ng'eanyiida, ea ichipkeega basooda ea gireangoojiga,

⁸ beasta ea roopta lagheanga, gapkeanda ea dung'usta, jeameeda shaarara ghoahiit diigheandaanyi!

⁹ Giijeega ea heayeeniga sean, geediga haghweega ea gubooyeeka sean!

¹⁰ Diyeanga ea dugwa sean, diyeanga badiina ng'eanyi ea dariidaka ng'eetiida!

¹¹ Sugoodiga ng'eanyiida ea buuneesean, fuga hees ea fuga sean ambaliischi bea ng'eanyiida!

¹² Gheareemanga ea haweega, gweargwa ea diibiga!

¹³ Ak ea daaghaambiida saawa gheawunga NG'UTAMIIDA, aba gideaba gheawungaaschi nea gaba geaw nighaambiit; alooheadaanyi ghwanaawa ng'eanyiida ea humng'eeda.

¹⁴ Ak ea niidiing'u gujaweeda fugaaschi, duumsheesiinda fugaaschi sean ghaydidi, aba fuga Israeli neekeewa niny. Oakghaambiida NG'UTAMIIDA!