NYIIGHEEGA 146 - Bibliyeeda Ghaydit

Duumsheesiinda ASEETA was Lealnoocheanda

¹ Duumsheesiina NG'UTAMIIDA! Ea gurooroodeanyu duumsheesiina NG'UTAMIIDA!

² Gaydaduumsheesa NG'UTAMIIDA aba damanda sean eandeayeewi eaweega; gaydasarman duumsheesiinda ASEETEANYU damanda duu dandeewa.

³ Adukghusi fuga hees, ghana siida, moamu ghaweanyi.

⁴ Dea ama weah gurooroadaanyi gabiikta jeeda sigeadaanyi; eaweecheanji ng'asheagaaschi gaygoosha.

⁵ Dahoosana dea was ASEETA Yakobo musanyeandaanyi, nea ghaghus NG'UTAMIIDA was ASEATAANYI,

⁶ was dea ghayi bwat humng'eeda ea ng'eanyiida, ea basooda, ea haleanjeeda sean mida jeeda; niny iissa ghoang'waay neajeadaanyi damanda manda muudeanooda.

⁷ Niny iissa ghoadaw fuga sisawan gitoobiiwsa; ak ghoadaw gea bearji jalooda hamita. NG'UTAMIIDA gootin fuga mida ghealooniga

⁸ NG'UTAMIIDA ghwajaat gheanyanga fuga ng'oowi. NG'UTAMIIDA gwadiiw fuga siminighis; NG'UTAMIIDA ghabwariiy fuga doobiiweadi.

⁹ NG'UTAMIIDA ghoahaaghwa rabasta, ak gwadiiw bananeeda ea masinung'weanda; nea naweadinga fuga munyas ghwanung' ghwaschoarda.

¹⁰ NG'UTAMIIDA gaygoombaliischi damanda manda muudeanooda, ASEATAANG'U gil, Ea Sayuni, ea ghoah seaygoojiga sean. Eeduumsheesiina NG'UTAMIIDA!