NYIIGHEEGA 144 - Bibliyeeda Ghaydit

Sugoocheanda gabadiischeesa ASEETA aba jooriischooda

¹ Gagasa eebadiischeesa NG'UTAMIIDA, was lagheaneedeanyu, was dea anaal geatingeasu ng'ucheeda ea mooringeasu bearjeeda;

² niny siida eaduupcheewi ea hilgweandeanyu majeek, niny gheenyu majeegi ea lealnoocheandeanyu, niny igeamboodeanyu ak ea dea eafuysi geawi, was dea joara eemoojiga ak ghwayiin hiing'eadaydeanyu.

³ Ea NG'UTAMIIDA, neada siida ea naaha inyas gayng'ula, ghana siida inyas gayduupa?

⁴ Siida gawuurji jeameeda, nea askwearjoojigaaschi gawuurji jirooneeda ng'ata.

⁵ Ea NG'UTAMIIDA, hiing'ni humng'eadaang'u ghwahiing'aan! Ang'waanya giijeega ak gaygooruudu aroosta!

⁶ Nung' ghwayeat dadamandeeda ak ginung' ghwadarda saawa, hista geatkaagu ak gihoani!

⁷ Adoabiiwa geatingaagu aba humng'eeda, ak gilealnean nea giighuuhanaan beega saang'a, ang'aamwaan geatinga rabasta,

⁸ ghuusiga nyaawa gwarugu ng'asheega mwahida nea geatinda nyaawa bea dugwa ea geatinda dugwa bea ng'uyeega.

⁹ Gaydasarmaneey duumdeesh Ea ASEETA; aba ginaandeeda mideawa fuweega atamanamughuush gaydasarmaseey,

¹⁰ ang'iing'eeda adawi sugoodiga jooriischooda, ang'iing'eeda ilealu Dawdi was siidaang'u bea gadiyeeda.

¹¹ Lealnean aba ng'uta weajoocheanda ng'waan, ak giighuuyaan aba geatinga rabasta, was gea ruku ng'uyeega aba ghuusiga nyaawa, nea iissa ghamiinda geatinga nyaawa bea dugwa bea ng'uyeega.

¹² Gagasa gwahitiisa heeda orjoagaagu ea gawuurji geediga hees, nea gawuurji haweagaagu daranajeega gireayda silagu jea eadeasa gheeda sugoocheanda;

¹³ Gagasa ghwanyiit gijigoongaasa, mida heeluutka sean bea booga siitiiw nea gagasa gwaji gisilgaasa sagalamnyoojiga niba damanamughuush aba madameagaasa;

¹⁴ ak gagasa gwaji dugwaasa muhooga saang'a nea mahoosuuna nea mameewa; ak gagasa ea manda shooka sawanadeeda aba naweadingaasa!

¹⁵ Ghang'wana eemeeda nyasa badiischooda sunu! Dahoosana eemeeda was ASEETA NG'UTAMIIDA!