NYIIGHEEGA 143 - Bibliyeeda Ghaydit

Mooshta ASEETA bea weeta

¹ Ea NG'UTAMIIDA, iinya mooshteanyu bea ghawooda; aleeysiina iit mearmearaniischoodeanyu! Aba doobiiwnataang'u shaaha ghuuteanyu aba doobiiwnataang'u!

² Aduwi jeeda girgweageeda ak giirgweaksi siidaang'u bea gadiyeeda; aba gideaba manda siida mideawa eaweega ak ea doabiiwaat aba madeadaang'u.

³ Aba gideaba weajoocheanda nimaseawnean; ak ea nijaksa ng'eanyi eaweegeasu; ak ghwanung' deapteada aba jeeda misaneeda dawuurji fuga ghayi goola gameewa.

⁴ Ak gurooroodeanyu ea niihiil aba jeedeanyu; nea gurooroodeanyu mida jeedeanyu ea nihal geaw.

⁵ Naapkaachi eawoojigeaba garayi, ak geateemsheesi ng'asheega sean ghayi iisini, ak gahoona uhuudeanyu gadiyoojiga sin geatingaagu.

⁶ Ghaamiindi geatingeasu deagealu headaang'u; gurooroodeanyu ghwaak muwoash aba badaydaang'u gawuurji ng'eanyiida ghajaam.

⁷ Ea NG'UTAMIIDA, lamwaja shaaha ghuuteanyu gurooroodeanyu nibealbeal! Adufunyanaan gheamamdaang'u, ak ea adeawuurjeewi fuga abiita jeeda Shoomanda.

⁸ Nung' dayiiy bariinyeagaagu sakteayda, aba gideaba aniini ghaaghuscheeyi ang'iing'i. Anaalaan naweeda jea dasik, aba gideaba geagatkachi gurooroodeanyu gagalu headaang'u.

⁹ Ea NG'UTAMIIDA, lealnean aba heeda weajoodigeasu! Geamang'awsi headaang'u funyaan!

¹⁰ Anaalaan sinooda gida ibwariinyi, aba gideaba ang'iing'i guwoosi ASEETEANYA! Gagasa ghoadoabiiwan gurooroadaang'u miy aba naweeda doabiiwaat!

¹¹ Aba alooheeda gheawungaagu Ea NG'UTAMIIDA, ahaaghwana eaweegeasu! Aba doobiiwnataang'u ang'aamwanaan jeeda sawanadeeda!

¹² Ak aba bariinyeagaagu nung' ghwasiinda weajoodigeasu, ak gilasi uhuuda fuga sean sawanan, aba gideaba aniini geawooschi siidaang'u bea gadiyeeda.