NYIIGHEEGA 141 - Bibliyeeda Ghaydit

Mooshta ASEETA bea shing'ada

¹ Ea NG'UTAMIIDA, geaguurneey, asi lamwajaana hini heedeanyu! Aleeysiina iit ghuuteanyu, iyeaguurneey!

² Nung' gawuurji mooshteanyu bea ghawooda geediga ng'andidi aba madeadaang'u, nea gawuurji geatingeasu eagatkachi gawuurji lukghumajeegeaba shing'ada!

³ Ea NG'UTAMIIDA, iina ghuuteanyu furiischoocheanda, iina muuchka ghuuteanyu furiischoocheanda!

⁴ Adiigeali gurooroodeanyu heeda ng'asheanda muy, ak ea adeasinayi ng'asheega mwahida sea fuga sina ng'asheega munyas; nea adaayaaji hamichoojiga nyaawa bea ghweelmeeda!

⁵ Ghang'wana ghwalasan siida miy nea gwareekusean aba ng'eeninda, nea adeamwaar uhuudeanyu aba nagheeda fuga munyas; aba gideaba ghaamwaashchi ghawooda galeaga sean aba badahuuka fuga sina ng'asheega munyas.

⁶ Damanda siitawa saawa fugiga jea goorgweaksean, ak abeeda gayghwanal gideaba ng'asheanda NG'UTAMIIDA gaba huumwa.

⁷ Geaka nyaawa gajeataarda aba ghuuta gheeda maloonghajeega, gawuurji ghweenga sibwaashaada ea gamaning'iidi!

⁸ Nea gheanyangeasu geagealneey ea NG'UTAMIIDA was ASEETA; ak geamng'awsi headaang'u; adinung'usean heeda nea geandi jeeda washta!

⁹ Ahaaghwanaan aba ghaseeda iin madeedeanyu, ea aba gadagoojiga fuga munyas!

¹⁰ Nung' goobeedeaysa fuga munyas sean goobeedeaysa jeesinga naweadinga, nea ghaang'ati aniini nea geabeayi seayu.