NYIIGHEEGA 135 - Bibliyeeda Ghaydit

Duumjeenga giigheambiita ASEETA

¹ Eakghaambiida NG'UTAMIIDA. Eakghaambiida gheawunga NG'UTAMIIDA, oakghaambiida, Ea fuga gadiyeeda NG'UTAMIIDA,

² agoogeeda oamiinaadi aba gheeda NG'UTAMIIDA, aba jeesinga doodoonung'weaka gheeda ASEETEANYA!

³ Oakghaambiida NG'UTAMIIDA, aba gideaba NG'UTAMIIDA aamiy; asarmasiina gheawungaaschi, aba gideaba ghwadoabiiw!

⁴ Aba gideaba NG'UTAMIIDA niloosa geaw Yakobo, nea ghoah Israeli buuneadaanyi bea huumwa,

⁵ Aba gideaba ghaanali aniini gideaba NG'UTAMIIDA aahaw, ea gideaba Ng'utamiideanya ea haweewa aseecheeka sean.

⁶ NG'UTAMIIDA iissa gwasin gida wassean bwariiy, aba humng'eeda ghana aba ng'eanyiida, aba jeesinga baskweega ea bugusta beega sheagi jih.

⁷ Niny dea iissa ghwanung' gwascheeng'na shamooghuutka muudeanooda ng'eanyiida, was dea sin dadamanduutka roopta ak goong'eena jeameeda gijigoongaaschi.

⁸ Ak ghabwar duweachajeega Misri, sean gea buuneeda ea gea diyeanga;

⁹ ak gwasin gwadeagwajeega ea ng'asheega deamdeameadi aba jeadaang'u, Ea Misri, aba badayda Farao ea fugaaschi sean bea gadiyeeda;

¹⁰ was dea bwar eemoojiga saang'a ak gwanuuseada sugoodiga hees uurjeen,

¹¹ Sihoni, was sugoocheanda Amori, ea Ogu was sugoocheanda Bashani, ea darooraka sean bea Ganaani,

¹² ak ghoadaw ng'eanyiida nyaawa gwahearan, ghoah hearaniischooda fugaaschi was Israeli.

¹³ Ea NG'UTAMIIDA, gheawungaagu gaygoobiida damanda manda muudeanooda, Ea NG'UTAMIIDA, giipkeataang'u gaba seaygoojiga sean.

¹⁴ Aba gideaba NG'UTAMIIDA gayghaweat fugaaschi, ak gayghabwayda fugaaschi bea gadiyeeda.

¹⁵ Sanaamajeega eemoojiga lapiya gil ea dahaabu gadiyeeda geatinga buuneeda.

¹⁶ Gwandeawa ghuusiga, ak ea mabaloola, ak gwandeawa gheanyanga, ak ea moang'wearda,

¹⁷ ak gwandeawa iidiga, ak ea mayiing'shi, ak ea manda ghuusiga nyaawa aroosta.

¹⁸ Fuga sean sin gaygawuurji sea niny– Asaha, ea giliwas sih mwas ng'asheesu!

¹⁹ Ea gheeh Israeli, oakghaambiida NG'UTAMIIDA! Ea gheeh Haruni, oakghaambiida NG'UTAMIIDA!

²⁰ Ea gheeh Lawi, oakghaambiida NG'UTAMIIDA! Agoogeeda oobadayi NG'UTAMIIDA, oakghaambiida NG'UTAMIIDA!

²¹ Gagasa eakghaambiit NG'UTAMIIDA aba Sayuni, was dea abiita Yerusalemu! Oakghaambiida NG'UTAMIIDA!