NYIIGHEEGA 119 - Bibliyeeda Ghaydit

Deaweedeeda NG'UTAMIIDA

¹ Ghang'wana fuga meeyeateena ghuut naweadinga nyaawa gea badiina jeeda deaweedeeda NG'UTAMIIDA!

² Ghang'wana fuga ang'waay ng'asheagaaschi muuwu, was gea gaseadayi niny aba gurooruunatka nyaawa sean,

³ ak ghabwada mii gwasin giidiinyeanda, ak gwaneayeewa jeeda naweadingaaschi!

⁴ Ang'iing'i nigooneasa deaweedajeagaagu eang'waanya muuchi.

⁵ Gideabali naweadingeasu gamajeegiit aba ging'ooyda diigheanyeakaagu!

⁶ Abeeda aniini majeapwaaspwaasan, iing'ula gheanyangeasu diigheanyeakaagu sean.

⁷ Gaydabadiischooweey aba guroorooda doabiiwaat, iyaanaali geaw deaweedajeagaagu doobiiweadi.

⁸ Gaydang'ula diigheanyeakaagu; ak ea adinung'usean heeda!

Gheawalmeeda deaweedeeda NG'UTAMIIDA

⁹ Gheareemaneeda gayghoamiitaaydaan naweadaanyi? Ak gay gwasissa mureeda nea ghwaat ng'asheandaang'u.

¹⁰ Ak aniini neagaseey ang'iing'i aba gurooroodeanyu sean; adinung'waadanaan daroada diigheanyeakaagu!

¹¹ Ng'asheandaang'u naayiinyi jeeda gurooroodeanyu, ak ea measinneey riing'eeda.

¹² Ea NG'UTAMIIDA, gagasa eakghaambiinyi; anaalaan diigheanyeakaagu!

¹³ Gaydargu aba ghuuteanyu hamurajeega sean bea ghuutaang'u.

¹⁴ Neahoosasi naweeda ng'asheagaagu imuuwwu mwasamwa gideaba geandeawi baruureega muuchi.

¹⁵ Gaydeateemsheesa diigheanyeakaagu, ak geamajeeksi ghaang' naweadingaagu.

¹⁶ Gaydeahoosan geaw aba diigheanyeakaagu; maygwaroosean ng'asheandaang'u.

Hoosassiinda deaweedeeda NG'UTAMIIDA

¹⁷ Sisiina siidaang'u bea gadiyeeda ng'asheega miyaas, ak geabiidi ng'eanyiida ak ghaang'waanyi ng'asheandaang'u

¹⁸ Jaada gheanyangeasu, dadaah ng'asheega deamdeameadi leabu jeeda deaweedeadaang'u.

¹⁹ Aniini geawooschi rabascheanda aba jeeda ng'eanyiida; adufunyanaan diigheanyeakaagu!

²⁰ Gurooroodeanyu ninyar aba gassooda huumeanyekaagu damanyoojiga sean.

²¹ Niiwoowsi fuga ghwarjeeda, ak geamwaashta fuga aheeli geat diigheanyeakaagu;

²² aheelleewean eatoodeaba ghuut ea foolda, aba gideaba naang'waanyi ng'asheagaagu imuuwu.

²³ Eara fuga hees goobiitpiit ak gabaloolanean, nea siidaang'u bea gadiyeeda gaygwasikteawa diigheanyeakaagu.

²⁴ Ng'asheagaagu imuuwu gea ahoosanan gil, ea gea argweakseani.

Giing'ooyda deaweedeeda ASEETA

²⁵ Gurooroodeanyu ninoas geat sea birjeanda; amajeegean aba giduurji ng'asheandaang'u!

²⁶ Neaduukuuni ng'asheegeasu sean ghayi easinyi, ak gishaahi ghuuteanyu; anaalaan deaweedajeagaagu!

²⁷ Nung' danal naweeda huumeanyeakaagu, ak geasikteawi gadiyoojigaagu deamdeameadi.

²⁸ Gurooroodeanyu ninyar aba durumanata goonean uurda deaschi sea ng'asheandaang'u.

²⁹ Sajanaan naweeda ng'uyeega; anaalaan aba alooheeda deaweedeadaang'u!

³⁰ Naaloachi naweeda doabiiwaat, nea ghaayiinyi girgweaguutkaagu madeedeanyu.

³¹ Aniini naanooschi geaw ng'asheagaagu imuuwu, Ea NG'UTAMIIDA; adiidu ginung' eapwaaspwaasan!

³² Gaydafwach dahalsa geaw naweeda diigheanyeakaagu aba gideaba gigoonean fughareeda!

Mooshta gasooda fughareeda

³³ Ea NG'UTAMIIDA, anaalaan naweeda deaweedajeagaagu; ak gaydaang'waay ea ghwahita muudeanooda.

³⁴ Nung' danal ak gaydaang'waay deaweedeadaang'u ak geang'ulayi aba gurooroodeanyu sean.

³⁵ Adoabiiwaan dasik naweeda diigheanyeakaagu, aba gideaba ghaabwariinyi.

³⁶ Nung' ghoang'waay geat gurooroodeanyu sea ng'asheagaagu imuuwu, ak ea adagagal geawunda gheang'da!

³⁷ Yamwa gheanyangeasu adeang'ulayi haleanjeeda marachi gil; ak gigoonyean eaweega aba jeeda naweadingaagu.

³⁸ Amajeeksiina siidaang'u bea gadiyeeda heeleesiindaang'u, aba heedeaba fugiga awali gheang'daang'uun.

³⁹ Lealnanean eatoodeaba ghuut ghaawali; aba gideaba huumeanyekaagu aamiyaas.

⁴⁰ Ng'ula, geagasayi muuchi dasisa mureeda huumeanyeakaagu; goonean eaweega aba doobiiwnataang'u.

Ghusooda deaweedeeda NG'UTAMIIDA

⁴¹ Ea NG'UTAMIIDA, nung' ghwahidu bariinyeagaagu heedeanyu, ea lealeanoadaang'u aba giteaschi sea heeleesiindaang'u;

⁴² Ak gaydasha ng'asheanda fugiga ang'eaweaniin, aba gideaba aniini ghaaghuschi ng'asheandaang'u.

⁴³ Adigeandeawi ghuuteanyu ng'asheanda huumwa earahay, aba gideaba gidaaghuschi gwanda jeeda huumeanyekaagu.

⁴⁴ Ak aniini gaydasissa mureeda deaweedeadaang'u galeaga sean, ea ghoah damanda manda muudeanooda;

⁴⁵ ak aniini gaydawa heeda eabali geaw, aba gideaba naanaali geaw deaweedajeagaagu.

⁴⁶ Ak gaydarukwiida ng'asheagaagu imuuwu aba madeeda sugoodiga, ak abeeda ea majeanung' dabwaspwas;

⁴⁷ aba gideaba ghaanyaschi hooseaneegeasu aba jeeda diigheanyeakaagu; aba gideaba ghaabwariinyi.

⁴⁸ Gaydasissa mureeda diigheanyeakaagu, aabwariinyi, ak gaydasikteawa deaweedajeagaagu.

Masaweega deaweedeeda NG'UTAMIIDA

⁴⁹ Apkaada ng'asheandaang'u irukusi siidaang'u bea gadiyeeda, aba gideaba ninung' daghus.

⁵⁰ Nih gida iissa ghwanung' dahawda gil aba jeeda sawanadeedeanyu aba gideaba neajeadaang'u gagoonan eaweega.

⁵¹ Fuga maduupa ASEETA gafoolan galeaga sean, ak aniini ea maydanung'usa heeda deaweedeadaang'u.

⁵² Naapkaachi huumeanyekaagu bea garayi, Ea NG'UTAMIIDA, ak ghaahawdi.

⁵³ Naanyaschi aba badahuuka fuga mii doobiiweadi, nung'usa heeda deaweedeadaang'u.

⁵⁴ Deaweedajeagaagu niiw duumjeengeasu aba jeeda gheeda rabascheanduumeedeanyu.

⁵⁵ Ak ghaapkaachi gheawungaagu eawa, Ea NG'UTAMIIDA, ak ghaang'waanyi deaweedeadaang'u.

⁵⁶ Nih ghawooda haw gil aba heedeanyu, gideaba ghaang'waanyi huumeanyeakaagu.

Mureeda aba deaweedeeda NG'UTAMIIDA

⁵⁷ NG'UTAMIIDA niny dea goona daghwardeanyu; ak geayeenyi gaydaang'waay ng'asheagaagu.

⁵⁸ Geamuschi baydeaydaang'u aba gurooroodeanyu sean; bwaydanaan aba giteena heeleedaang'u.

⁵⁹ Ak geasikteawi naweadingaagu, ghaasaji geeshteanyu gagal ng'asheagaagu imuuwu;

⁶⁰ Ak ghaalamwajaadi mwaashiing'dani aba ging'ooyda diigheanyeakaagu.

⁶¹ Fuga mii doobiiweadi nisin ghaseeda jea ghaghasanaan, ak aniini ea maygwaroosean deaweedeadaang'u.

⁶² Gaydang'eat bugusta eaweeda ak geabadiischooweey, aba badayda huumeanyekaagu doobiiweadi.

⁶³ Aniini geandi jeedeaba fugiga sean bateeyiin, sea fuga ang'waay huumeanyeakaagu.

⁶⁴ Ea NG'UTAMIIDA, ng'eanyiida ninyiit bariinyeagaagu; anaalaan deaweedajeagaagu!

Majeeknata deaweedeeda NG'UTAMIIDA

⁶⁵ Nisisi siidaang'u bea gadiyeeda ng'asheega miyaas, Ea NG'UTAMIIDA, aba giteaschi sea ng'asheandaang'u.

⁶⁶ Goonean fughareeda ea bareaynata uhuuda, aba gideaba ghaamwaschi diigheanyeakaagu.

⁶⁷ Damanda miiyeesawananean abeeda aniini naaroachi; duuku ghamneawa ghaang'waanyi ng'asheandaang'u.

⁶⁸ Ang'iing'i guwoosi miy nea gisinayi gea miyaas; anaalaan deaweedajeagaagu.

⁶⁹ Fuga ghwarjeeda ninapiisean ng'uyeega ak gaydaang'waay aba gurooroodeanyu sean huumeanyeakaagu.

⁷⁰ Gurooruunatka nyaawa ghwanyiit leendeeda, nea aniini geahoosasi deaweedeadaang'u.

⁷¹ Ak aamiy aba heedeanyu gideaba geesawanan, ak abeeda ghaanaali geaw deaweedajeagaagu.

⁷² Deaweedeeda ghuutaang'u aamiy aba heedeanyu ea ghang'al sagalamnyoojiga dahaabu ea lapiya.

Doobiiwnata deaweedeeda NG'UTAMIIDA

⁷³ Geatingaagu gwasinan ak gwadamalean; goonean fughareeda ak abeeda ghaanaali geaw diigheanyeakaagu.

⁷⁴ Fuga bateey gayghwadaahan ak gang'weela, aba gideaba gidaaghuschi ng'asheandaang'u.

⁷⁵ Aniini ghaanali gideaba girgweaguutkaagu ghwadoabiiw, Ea NG'UTAMIIDA, ea gideaba nilaschaan aba gideaba guwoosi doabiiwaat.

⁷⁶ Geamuscheey ghoah bariinyeagaagu hawdeaydeanyu aba giteaschi sea neajeadaang'u aba heeda siidaang'u bea gadiyeeda.

⁷⁷ Dahina baydeaydaang'u heedeanyu, ak ghaanyaschi eaweega; aba gideaba deaweedeadaang'u dea ahoosanani.

⁷⁸ Fuga ghwarjeeda dea nung' ghabwaspwas, aba gideaba nisimanean ng'asheega munyas aba ng'uyeega; nea aniini gaydeateemsheesa huumeanyeakaagu.

⁷⁹ Nung' fuga bateey gabiigu heedeanyu, ak abeeda ghwanal ng'asheagaagu imuuwu.

⁸⁰ Gurooroodeanyu gideabali ea doabiiwaat aba deaweedajeagaagu, ak abeeda ea meanung' dabwaspwas!

Mooshta aba nyasooda lealeanooda

⁸¹ Gurooroodeanyu nibur aba giimuukghunoadaang'u giimuukghunooda gasooda lealeanoadaang'u; aniini ghaaghuschi aba ng'asheandaang'u.

⁸² Gheanyangeasu nibur aba ng'ulooda ea furdeayda neajeadaang'u; ak geayeenyi, “Gaynung' dahawda eeju aniini?”

⁸³ Aba gideaba aniini neawuurjeewi shearooda jeeda aroosta mii gwaroosean deaweedajeagaagu.

⁸⁴ Askwearjoojiga siidaang'u bea gadiyeeda aahada? Gajargweaksiina eeju fugiga ghabwasaniin?

⁸⁵ Fuga ghwarjeeda nighurghur gadageedeanyu, fuga mwaada geeshta deaweedeadaang'u.

⁸⁶ Diigheanyeakaagu sean huumwa gil; saawa ghaghabwasan aba ng'uyeega; weadaan!

⁸⁷ Saawa gwaramagu gwalaku eaweegeasu aba jeeda ng'eanyiida; ak ea mii danung'waada huumeanyeakaagu.

⁸⁸ Aba jeeda bariinyeagaagu aghuuha eaweegeasu, ak abeeda ghaang'waanyi ng'asheega imuuwu aba ghuutaang'u.

Masaweega deaweedeeda NG'UTAMIIDA

⁸⁹ Ea NG'UTAMIIDA, ng'asheandaang'u gayghwashng'u ak ea majeek aba humng'eeda damanda manda muudeanooda.

⁹⁰ Doobiiwnataang'u gwanda aba seaygoojiga sean; ang'iing'i guwoosi dea ghayi bwat ng'eanyiida, ak gaygoobiida ea ghwashng'u.

⁹¹ Ak aba girgweageadaang'u ghamiinaada nea majeek ea ghoah ghamneawa; aba gideaba haleanjeeda sean fugaagu bea gadiyeeda.

⁹² Gwachi inyeeda deaweedeadaang'u ea mii gidahoosanani, gwachi gaydameewsa jeeda sawanadeedeanyu,

⁹³ Ak ea maygwaroosean huumeanyeakaagu earahay; aba gideaba aba badaydeaba suh nigoonyean eaweega.

⁹⁴ Aniini geabeayeey, lealnean; aba gideaba neasikteawi huumeanyeakaagu.

⁹⁵ Fuga munyas niradaanan nea gagasa ghabwaran; ak geang'ulayi ng'asheagaagu imuuwu.

⁹⁶ Ak ea neajeeng'u gideaba haleanjeeda sean gwanda muudeanoadaanyi, nea diigheandaang'u ea majeek.

Bariinyeega deaweedeeda NG'UTAMIIDA

⁹⁷ Deaweedeadaang'u ghaabwariinyi muuchi! Nih gideasikiideawi askwearda seani.

⁹⁸ Diigheandaang'u iissa gagoonan fughareeda ea ghang'al weajoodigeasu, aba gideaba geandeawi galeaga sean.

⁹⁹ Geandeawi fughareeda ea dang'al giinealshoodigeasu sean, aba gideaba ng'asheagaagu imuuwu gea eapkeadayi.

¹⁰⁰ Geandeawi fughareeda ea dang'al gweargwa aba gideaba naang'waanyi huumeanyeakaagu.

¹⁰¹ Neaheelleewi geeshangeasu gilinyoo ea naweeda muyi, ak abeeda ghaang'waanyi ng'asheandaang'u.

¹⁰² Ak ea mii dayam geaw ak geanung'usi heeda huumeanyekaagu, aba gideaba giinaalaan ang'iing'i.

¹⁰³ Ng'asheagaagu ea inya muuchi aba heedeanyu, ea ghwasuut maleeda aba ghuuteanyu!

¹⁰⁴ Nea aba huumeanyeakaagu ghoanyaaschi fughareeda; ak ghoah gideasissi giliwas naweeda ng'uyeega.

Weeshinda deaweedeeda NG'UTAMIIDA

¹⁰⁵ Ng'asheandaanyi gheaboong'nyeanda geeshangeasu ak ea weeshinda naweedeanyu.

¹⁰⁶ Naayaaji habeawooda ak gaydeamajeek, ak geang'ulayi huumeanyekaagu doobiiweadi.

¹⁰⁷ Aniini sisawanan muuchi; Ea NG'UTAMIIDA, goonean eaweega, aba gidabeada ng'asheandaang'u!

¹⁰⁸ Ea NG'UTAMIIDA, mwasa haleanjeedeanyu bea ghadooweeda bea duumsheesiinda, ak giinaalaan huumeanyekaagu.

¹⁰⁹ Ghaang'waanyi eaweegeasu aba geatindeanyu galeaga sean, ak aniini ea mii gwaroosean deaweedeadaang'u.

¹¹⁰ Fuga sina ng'asheega munyas nisin ghaseeda aba badaydeanyu, ak ea mii daramwas naweeda huumeanyekaagu.

¹¹¹ Ng'asheagaagu imuuwu gideahearanyi gil damanda manda muudeanooda; nih gidahoosan gurooroodeanyu.

¹¹² Neageali gurooroodeanyu sinooda deaweedajeagaagu damanda manda muudeanooda.

¹¹³ Aniini ghaasichi fuga maba fughareanagi, nea aniini ghaabwariinyi deaweedeadaang'u.

¹¹⁴ Ang'iing'i guwoosi heeda eafuysi geaw ea igeamboodeanyu; aniini ghaaghuschi ng'asheandaang'u.

¹¹⁵ Ea fuga sina ng'asheega munyas, ang'amwana heedeanyu, ak abeeda ghaang'waanyi diigheanyeeka ASEETEANYU.

¹¹⁶ Amajeegean aba giteena neajeadaang'u, ak ghaanyaschi eaweega, ak ea adinung'waadanaan eapwaaspwaasan aba gidaaghuschi.

¹¹⁷ Weadaan, ak gaydaba seayu ak gaydang'ula deaweedajeagaagu galeaga sean!

¹¹⁸ Ak giheawi buuneesean ramwas deaweedajeagaagu; nea ng'asheega nyaawa munyas gaba mwadaagha.

¹¹⁹ Buuneesean munyas mida jeeda ng'eanyiida ginung' ghoah haleanjeeda mwadaagha; ak aniini ghaabwariinyi ng'asheagaagu imuuwu.

¹²⁰ Saseadeanyu ghaboadan aba gheawalmeadaang'u, ak aniini ghaawalli girgweaguutkaagu.

Mureeda aba deaweedeeda NG'UTAMIIDA

¹²¹ Neasinyi girgweageeda ea doobiiwnata ea dea hit; adiidu ginung'usean heeda fuga jea ghaghabwasan.

¹²² Rukuni gideaba gayweadaan aniineeda was siidaang'u bea gadiyeeda aba ng'asheega miyaas; adumwasi gideaba gaygwasawanan fuga ghwarjeeda.

¹²³ Gheanyangeasu nibur aba gasooda lealeanoadaang'u, ea giihiita heeleesiindaang'u doabiiwaat.

¹²⁴ Sisiina siidaang'u bea gadiyeeda giteena hawunda bariinyeagaagu, ak giinaalaan deaweedajeagaagu,

¹²⁵ Aniini geawooschi siidaang'u bea gadiyeeda, goonean fughareeda, ak abeeda ghaanali ng'asheagaagu imuuwu!

¹²⁶ Nihita damanda jea gwasina NG'UTAMIIDA gadiyeeda, aba gideaba deaweedeadaang'u siyam.

¹²⁷ Ak ghoah gideabariiysi diigheanyeakaagu ea ghang'al dahaabu, ea ghang'al dahaabooda miy.

¹²⁸ Aba gideaba ghaang'waanyi huumeanyeakaagu sean; ak ghoasichi giliwas naweeda ng'uyeega.

Gasooda sisinda mureeda aba deaweedeeda NG'UTAMIIDA

¹²⁹ Ng'asheagaagu imuuwu ea deamdeameadi; ak ghoah gida ang'ooysa gurooroodeanyu.

¹³⁰ Sikiideayda ng'asheagaagu gweatu weeshinda; nea ghoanaal siida dasha.

¹³¹ Ghaajaachi ghuuteanyu nea geagasayi, aba gideaba geagasayi muuchi diigheanyeakaagu.

¹³² Yamsean geaw ak gibwaydanaan, gawuurji giteaschi sea fuga bwariiy gheawungaagu.

¹³³ Amajeega geeshangeasu gwadeaschi sea neajeadaang'u, ak ea adumwasi goombalan gidamuy.

¹³⁴ Aghuuhaan aba ghabasta buuneeda, ak abeeda ghoang'waay huumeanyeakaagu.

¹³⁵ Nung' ghoabwaay gheamamdaang'u siidaang'u bea gadiyeeda, ak giinaalaan deaweedajeagaagu.

¹³⁶ Gheanyangeasu gooreamna ghealooniga beega, aba gideaba buuneeda mwaang'waanya deaweedajeagaagu.

Doobiiwnata deaweedeeda NG'UTAMIIDA

¹³⁷ Ea NG'UTAMIIDA, ang'iing'i guwoosi dea doabiiwaat, nea girgweaguutkaagu ea doobiiweadi.

¹³⁸ Ang'iing'i nigooni ng'asheagaagu imuuwu nea giidoabiiwi ea aba alooheeda sean.

¹³⁹ Bariinyeegeasu aba headaang'u ninung' ghwayeat nyarasteanyu, aba gideaba weajoodigeasu niroosa ng'asheagaagu.

¹⁴⁰ Neajeadaang'u gaba huumwa nea siidaang'u bea gadiyeeda ghabwariiy.

¹⁴¹ Aniini geawooschi mwanang' ak geefoolan, ak eara gwasa ea maygwaroosean huumeanyeakaagu.

¹⁴² Doobiiwnataang'u ea doabiiwaat damanda manda muudeanooda nea deaweedeadaang'u gaba huumwa.

¹⁴³ Ninyasan sawanadeeda ea giiseaneega, nea diigheanyeakaagu ea gea aabwariinyi.

¹⁴⁴ Ng'asheagaagu imuuwu ea doobiiweadi damanda manda muudeanooda; goonean fughareeda ak abeeda gaydeabiida ng'eanyiida.

Mooshta nyasooda lealeanooda

¹⁴⁵ Geaguuru aba gurooroodeanyu sean; shaaha ghuuteanyu, Ea NG'UTAMIIDA! ak gaydaang'waay deaweedajeagaagu.

¹⁴⁶ Geaguurneey ang'iing'i; lealnean, ak gaydaang'waay ng'asheagaagu imuuwu.

¹⁴⁷ Ghaang'eachi nea mii ghaghar gayeew ak geamuscheey weeta; aniini ghaaghuschi ng'asheagaagu.

¹⁴⁸ Ghaang'wearu eaweesean, nea geateemsheesi heeleesiindaang'u.

¹⁴⁹ Iinya ghuuteanyu aba giteena bariinyeagaagu; Ea NG'UTAMIIDA, aba doobiiwnataang'u aghuuha eaweegeasu.

¹⁵⁰ Nineekiisean fuga ghabwasan muuchi; ak ea nisheagiida deaweedeadaang'u.

¹⁵¹ Nea ang'iing'i guwoosi neeki, Ea NG'UTAMIIDA, ak diigheanyeakaagu sean gaba huumwa.

¹⁵² Ghang'eada garayi ghaanali aba ng'asheagaagu imuuwu aba gideaba ghayi gisini goobiida damanda manda muudeanooda.

Musooda weeta

¹⁵³ Ng'ula sawanadeedeanyu ak gilealnean, aba gideaba mii gwaroossean deaweedeadaang'u

¹⁵⁴ Weadaan ak gilealnean; goonean eaweega aba giteaschi sea heelleesiindaang'u!

¹⁵⁵ Lealeanooda ea sheageewa fuga munyas, aba gideaba magasa deaweedajeagaagu.

¹⁵⁶ Baydeaydaang'u aahaw, Ea NG'UTAMIIDA; goonean eaweega aba giteena doobiiwnataang'u.

¹⁵⁷ Fuga ghabwasan ea saang'a ea weajoodigeasu, ak ea mii dasajaadawa ng'asheagaagu imuuwu.

¹⁵⁸ Geang'ulayi fuga mandeawana masaweega ak ghaanyareaschi, aba gideaba mwaang'waanya diigheanyeakaagu.

¹⁵⁹ Ng'ula gidaabwariiydi huumeanyeakaagu! Goonean eaweega aba giteena bariinyeagaagu.

¹⁶⁰ Mooneeda ng'asheandaang'u huumwa gil; nea giliwas hamureadaang'u doobiiweadi gayghwashng'u damanda manda muudeanooda.

Giighaydita deaweedeeda NG'UTAMIIDA

¹⁶¹ Fuga hees nighabwasan mwadaagha, nea gurooroodeanyu ghamiinaada nea gwasissa mureeda ng'asheagaagu.

¹⁶² Aniini geahoosasi ng'asheandaang'u nea geawuurjeewi siida nyas easanga saang'a.

¹⁶³ Ghaasichi muuchi ng'uyeega ak ghaabwariinyi deaweedeadaang'u.

¹⁶⁴ Iissa jeeda askwearda geaduumsheeseey niba ispwa aba huumeanyekaagu doobiiweadi.

¹⁶⁵ Gaba hoyyoo muuchi fuga bwariiy deaweedeadaang'u; ak ea manda gichea gwaruusa.

¹⁶⁶ Ea NG'UTAMIIDA, aniini ghaaghuschi lealeanoadaang'u, ak geasinyi diigheanyeakaagu.

¹⁶⁷ Gurooroodeanyu ghoang'waay ng'asheagaagu imuuwu; ak ghaabwariinyi muuchi.

¹⁶⁸ Naang'waanyi deaweedajeagaagu ea ng'asheega imuuwu, aba gideaba naweadingeasu sean gwanda madeadaang'u.

Musooda weeta

¹⁶⁹ Ea NG'UTAMIIDA, nung' ghwahidu shookeasu headaang'u; goonean fughareeda aba giteena ng'asheandaang'u.

¹⁷⁰ Gagasa ghwahidu mooshteanyu bea ghawooda madeadaang'u; lealnean aba giteaschi sea ng'asheandaang'u.

¹⁷¹ Ghuuteanyu darukuna duumsheesiinda aba gideaba giinaalaan deaweedajeagaagu.

¹⁷² Ghuuteanyu gaygwasarman ng'asheandaang'u, aba gideaba diigheanyeakaagu ea doobiiweadi.

¹⁷³ Geatindaang'u gagasa ea hidaat aba weeteanyu, aba gideaba naaloachi huumeanyeakaagu.

¹⁷⁴ Ea NG'UTAMIIDA, neagasayi lealeanoadaang'u, nea deaweedeadaang'u ea gida aabwariinyi.

¹⁷⁵ Gagasa dandeawa eaweega, ak abeeda geaduumsheeseey, ak abeeda ghaweadan huumeanyekaagu.

¹⁷⁶ Ak ea neaneayeati gisilleanda roat; gasa siidaang'u bea gadiyeeda; aba gideaba mii gwaroosean diigheanyeakaagu.