NYIIGHEEGA 118 - Bibliyeeda Ghaydit

Mooshta ASEETA bea badiischooda aba jooriischooda

¹ Abadiischeesiina NG'UTAMIIDA aba gideaba aamiy; aba gideaba bariinyeagaaschi manda muudeanooda!

² Asi dayi Israeli, “Bariinyeagaaschi manda muudeanooda.”

³ Asi dayi gheeh Haruni, “Bariinyeagaaschi manda muudeanooda.”

⁴ Ak ea dayi fugiga bada NG'UTAMIIDEAN, “Bariinyeagaaschi manda muudeanooda.”

⁵ Aba jeeda sawanadeedeanyu geaguursi NG'UTAMIIDA; ak ghwasha NG'UTAMIIDA ghuuteanyu ak ghwanung' deabal geaw.

⁶ NG'UTAMIIDA gwanda meatkweedeanyu mwaydabeal. Siida gaygwasimanean naaha?

⁷ NG'UTAMIIDA gwanda meatkweedeanyu ghaweadan; ak gaydadaah nea geang'weelayi gea sidan nea sijoar.

⁸ Ghang'wana geemng'awsa NG'UTAMIIDA mwasamwa gideaba gayghusa siida.

⁹ Ghang'wana geemng'awsa NG'UTAMIIDA mwasamwa gideaba geaghus fuga hees.

¹⁰ Gwaneaweesean eemoojiga sean; ak ghaalaschi iheenga nyaawa aba gheawunga NG'UTAMIIDA!

¹¹ Saawa gwaneaweesean, ak gwaneaweesiinanean meadajeega sean; ak ghaalaschi iheenga nyaawa aba gheawunga NG'UTAMIIDA!

¹² Gwaneaweesiindanean uudiga, ak gamista beasta halaghweenga; ak ghaalaschi iheenga nyaawa aba gheawunga NG'UTAMIIDA!

¹³ Geegutkutanean muuchi, bwak ea gwaramagu daabeada, ak ghaweadan NG'UTAMIIDA.

¹⁴ NG'UTAMIIDA uurdeanyu gil ea duumdeanyu; ak ea niiw lealeanoodeanyu.

¹⁵ Nyeashta hooseaneega bea jooriischooda geeyiing'sa maheemajeega fuga doobiiweadi: “Geatinda dugwa bea NG'UTAMIIDA gwasina ng'asheega hees,

¹⁶ Geatinda dugwa bea NG'UTAMIIDA siikghaambiit, geatinda dugwa bea NG'UTAMIIDA gwasina ng'asheega hees!”

¹⁷ Maydami, gaydeabiida ng'eanyiida, ak gaydarukwiida gadiyoojiga NG'UTAMIIDA.

¹⁸ NG'UTAMIIDA nilasan muuchi, ak ea mwanung'waadanaan dami.

¹⁹ Jeanean gidaghuudajeega doobiiwnata, ak geasikchi dawa gah ak geabadiischeesi NG'UTAMIIDA.

²⁰ Nih gidaghuuta NG'UTAMIIDA gil; fuga doobiiweadi gea jea gwasigu nea gaweay gah.

²¹ Gaydabadiischooweey aba gideaba nishaahi ghuuteanyu ak ea nihuuwi lealeanoodeanyu.

²² Lagheaneeda heawa deekshoodiga niiw lagheaneeda haw washiin.

²³ Ng'asheanji gwaleabu heeda NG'UTAMIIDA; ak ea daamdaamwaat aba madeeda gheanyangaasa.

²⁴ Nih eaweeda ghayi sin NG'UTAMIIDA; gajeeng'weela nea geehoosasi.

²⁵ Ea NG'UTAMIIDA, geemuscheey lealneasa! Ea NG'UTAMIIDA, geemuscheey nung' eanyagaada!

²⁶ Ak ea deebadiischeesiina dea wuna gheawunga NG'UTAMIIDA! Badiischooda oanyaschi ghang'eada gheeda NG'UTAMIIDA.

²⁷ NG'UTAMIIDA dea was ASEETA, ak niny ea dea gooneasa weeshinda. Ageani damealga geediga bea ghweelmeeda ak gooweayi ea ahita heeda wagiida!

²⁸ Ang'iing'i guwoosi ASEETEANYU, ak gaydabadiischooweey; ang'iing'i guwoosi ASEETEANYU, ak gaydaaghaambiinyi.

²⁹ Abadiischeesiina NG'UTAMIIDA, aba gideaba aamiy; aba gideaba bariinyeagaaschi manda muudeanooda.