NYIIGHEEGA 109 - Bibliyeeda Ghaydit

Giiniikghta siida sisawan

¹ Ea ASEETA aaghaambiichi, adisiindi!

² Fuga munyas ea gea naba ng'uyeega geang'ucheewi, nea gwanaba ng'uyeega aba badaydeanyu.

³ Ak ea nineaweesean aba ng'asheega sicheeda, ak geang'ucheewi mwadaagha.

⁴ Nea iijea gawalu bariinyeegeasu ghoahaaktanaan, earapeadi aamoashchi ghawooda aba badahuuka nyaawaan.

⁵ Ng'ata gagoonan gea munyas ghoaghiisa gea miyaas, ea sicheeda ak ghoaghiisa bariinyeegeasu

⁶ Iina siida muy uhuudaanyi; gagasa gweadu siida ahaakta niny madeeda girgweageeda.

⁷ Nea iisiirgweaksa, gagasa eanyas gideaba niidiiy; nea mooshtaanyi bea ghawooda gagasa eanung' ghoah riing'eeda.

⁸ Gagasa gang'ayiit askwearjoojigaaschi; nea gadiyeadaanyi ea dageanda siinuut!

⁹ Ak ea doawa diibigaaschi bananga, nea ghoah gatmoadaanyi masiinung'weanda!

¹⁰ Daneayi diibigaaschi nea gamusiischi; ak gagasa hamita aba heesheageewa eemeega nyaawa!

¹¹ Haleanjeadaanyi sean mideawa gagasa gageanda siida siileeda; nea dageanda rabasta haleanjeeda nyas aba gadiyeeda geatingaaschi!

¹² Gagasa ea manda siida jea ghabwayda niny, ghana siida wassean jea ghabwayda banangaaschi!

¹³ Gagasa ealas uhuuda jeataanyi; nea geehuta gheawunga nyaawa aba seaygeedeaba iyeenya!

¹⁴ Ak geapkaat munyinda ghweanigaaschi aba madeeda NG'UTAMIIDA, nea riing'eeda ghaamwat ea adeegeanda!

¹⁵ Gagasa goobiida madeeda NG'UTAMIIDA galeaga sean; ak gageanda giipkeata nyaawa aba ng'eanyiida!

¹⁶ Aba gideaba moapkaada sinooda ng'asheega miyaas, nea ghahoan siida ng'arng'ar gurooru ea gea barbari ea gameewa.

¹⁷ Ak niny ghabwariiy mooshteayda; ak gagasa ghwanyas mooshteayda! Ak ea magasa ghawooda; ak gagasa gwasheagiida niny!

¹⁸ Hean gookwa mooshteayda gawuurji hang'daanyi, ak ghoabita jeeda guroorooda gawuurji beega, nea gawuurji nagheeda aba jeeda geakaaschi!

¹⁹ Ak ea doawa headaanyi hang'da akwa, nea gawuurji ghealooda rada galeaga sean!

²⁰ Gidabal ghoadaw ASEETA ng'asheesu fuga ahaaktanaan, ghwahit aba heedeaba fiisu rukuuna badaydeanyu ng'asheega munyasiin!

²¹ Nea ang'iing'i, Ea ASEETA was NG'UTAMIIDEANYU sinnean gidigasiidi ang'iing'i aba gheawungaagu; aba gideaba bariinyeagaagu aamiy, lealnean!

²² Aba gideaba aniini geawooschi ng'arng'ar nea geawooschi bwarbwar, ak ea sisawanan ea ghwahita gurooroodeanyu.

²³ Aniini ghaang'ataaydi jirooneeda weesa giishealda bea shing'ada; ak geaghuutaaydanaan deashamga.

²⁴ Gutung'weakeasu ning'arng'ariidi aba giiluuldeaydeaba geaw; nea saseedeanyu ea nirip aba nyoota nagheeda.

²⁵ Ak ea naahuuyi siida sijuuga aba saawa; nea iidaahan goodiindiil iheenga nyaawa.

²⁶ Ea NG'UTAMIIDA, was ASEETEANYU! Weadaan aba giteena bariinyeagaagu!

²⁷ Ak abeeda ghwanal saawa gideaba nih geatindaang'u gil; nea ang'iing'i, Ea NG'UTAMIIDA, gisini ng'asheesu!

²⁸ Saawa gamooriida, nea ang'iing'i gibadiischeesi! Saawa gaweay ak geapwaaspwaas; nea siidaang'u bea gadiyeeda gaygahoosan!

²⁹ Fuga ahaaktanaan gajeapwaaspwaas; gaygookwealda baspaseega nyaawa hang'da!

³⁰ Gaydabadiischeesa NG'UTAMIIDA aba ghuuteanyu; gaydaaghaambiit niny aba bugusta eemeeda saang'a.

³¹ Aba gideaba gayghamiinaada aba geatinga dugwa bea siida bwarbwar, ak gwalealu aba heeda fuga argweaksiina niny miyeeda.