NYIIGHEEGA 107 - Bibliyeeda Ghaydit

GITAABOODEABA MUUT (Nyiigheega 107–150 ) Giigheambiita alooheeda ASEETA

¹ Oakghaambiida NG'UTAMIIDA, aba gideaba aamiy; aba gideaba bariinyeagaaschi manda muudeanooda!

² Ak ea dayi fuga nilealu NG'UTAMIIDA, was fuga lealna jeeda sawanadeeda

³ ak ghoawaam aba darooraka sean ghang'eada heeda ghayeawa ea ghwahita heeda biyeara, ghang'eada wiilooda ng'eanyiida ghayeawa ea ghwahita wiilooda ng'eanyiida biyeara.

⁴ Hean gwaneayeewa dareapcheeda aba naweeda dareabeeta ak ea mwanyasa mujiineeda jea goobiida;

⁵ ak ghwaak jalooda ea muwooshta, ak gamis gurooruunatka nyaawa.

⁶ Ng'ata gooyeawusa NG'UTAMIIDA aba jeeda sawanadeeda nyaawa, ak gwalealu aba jeeda sawanadeeda nyaawa;

⁷ Goosheedeawa aba naweeda doabiiw, ak abeeda gaweay ea ghwahita mujiineeda jea goobiida.

⁸ Asi dabadiischeesiina NG'UTAMIIDA aba bariinyeagaaschi, aba gadiyoojigaaschi deamdeameadi aba heeda buuneeda!

⁹ Aba gideaba ghwanung' gwalang'u siida bearji muwooshta, nea dea bearji jalooda goolang'u aba haleanjeeda miyaas.

¹⁰ Fuga mida jeeda misaneeda jirooneeda miyeeda, fuga ghealooniga sawana sirata gharinga,

¹¹ aba gideaba ghaheawa ng'asheega ASEETA, ak gafool girgweageeda dea Haw bea Humng'eeda.

¹² Ak ghwahiiy geat gurooruunatka nyaawa aba sawanadeeda, ak goobeedeayi ak ea manda siida weat.

¹³ Hean gooyeawusa NG'UTAMIIDA aba jeeda sawanaduutka nyaawa, ak ghoahaawda aba sawanaduutka nyaawa;

¹⁴ ak gwalealna jeeda misaneeda jirooneeda miyeeda, ak gwanyarjeaweada munyaloalajeega nyaawa.

¹⁵ Ak ea dabadiischeesiina NG'UTAMIIDA aba bariinyeagaaschi, ea deamdeamangaaschi aba heeda buuneeda!

¹⁶ Aba gideaba ninyarja gidaghuudajeega lagheanga oomng'i, ak ghwalach nibiyeenya gharinga.

¹⁷ Fuga dasheahi aba ramaseanyeeka nyaawa, aba giidiinyeanyeeka nyaawa iissa gwasawan geat.

¹⁸ Gurooruunatka nyaawa ghwasit giliwas heeluutka hamita, ak ea niriiksa miyeeda.

¹⁹ Hean gooyeawusa NG'UTAMIIDA aba jeeda sawanadeeda nyaawa, ak gwalealu saawa aba jeeda sawanadeeda nyaawa;

²⁰ ak ghwanung' gawa ng'asheandaanyi, ak ghoahaap saawa, ak gwalealna saawa jeeda nyariida nyaawa.

²¹ Ak ea dabadiischeesiina NG'UTAMIIDA aba bariinyeagaaschi, aba gadiyoojigaaschi deamdeameadi aba heeda buuneeda!

²² Ak ea daadawa haleanjeeda ghadooweeda bea badiischooda, nea gwarugu gadiyoojigaaschi aba sarmeeda!

²³ Fuga weay jeeda basooda nea gwading'da maleambooda, nea gwasina gadiyeeda nyaawa aba jeeda beega saang'a;

²⁴ saawa ghwadaah gadiyoojiga NG'UTAMIIDA, ea deamdeamangaaschi aba jeeda beega sheagi jih.

²⁵ Aba gideaba gwarugu, ak ghwanung' ghwahidu jeameeda ng'waan, ak ghwanung' gwadiyeada laweajajeega basooda.

²⁶ Geehisa humng'eeda, ak gabiigu ng'eanyi jeeda beega sheagi jih; ak goosha meaynata nyaawa aba jeedeaba beadi;

²⁷ ak gwateemban nea ghwadas hiji ea hiji gawuurji siida boogideat, nea goosha fughareenga nyaawa.

²⁸ Hean gooyeawusa NG'UTAMIIDA aba jeeda sawanadeeda nyaawa, ak gwalealu aba jeeda giiseaneega nyaawa;

²⁹ ak ghwanung' ghahawda jeameeda ak gwayi saw, nea laweajajeega basooda geanung' ghwasiinda.

³⁰ Ng'ata gahoosan aba gideaba nihawda ak gweadu ea ghoahiidu heeda jea ghwararang'aana gasa saawa.

³¹ Asi dabadiischeesiina NG'UTAMIIDA aba bariinyeagaaschi, ea aba ng'asheagaaschi deamdeameadi aba heeda buuneeda!

³² Asi deakghaambiida niny aba jeeda fuga bwat geat, nea geaghwar niny aba jeeda gweargwa bwat geat.

³³ Niyam eeniga ghoah eeshtearajeanda, nea ghoah gheanyanga eeniga ng'eanyiida bearji muwooshta,

³⁴ ng'eanyiida haghweega saang'a ghwanung' ghoah bugharjeanda balang'da, aba munyinda fuga abiita jeeda.

³⁵ Ak ghwayam eeshtearajeanda ghoah dabaschoojiga beega, ak ghoah ng'eanyiida ghajaam gheanyanga eeniga beega.

³⁶ Ak hoowa ghwanung' goobiida fuga jalooda, ak ghoang'eat sinooda mujiineeda jea goobiida jeeda;

³⁷ ng'ata gwahista booga aba jeesinga madameega, ak gwahista sabiibu ak gwaji haghweega.

³⁸ Hean gabadiischeesa ak ghwasaang'ayiit muuchi; ak ea mwanung' ghwasuunya dugwa nyaawa.

³⁹ Hean nea ghwasuunya ak gagiisan aba ghabasta, ea minighista, nea gagiisan,

⁴⁰ ng'ata gafool fuga hees sawan saawa ak gooneayi aba dareapcheeda manda naweeda;

⁴¹ ak goodiing'u siida bwarbwar gwasheagiida sawanadeeda, nea ghwanung' gawuurji hawanda gisilga.

⁴² Nea fuga miyaasiin gurooruunat gayghwadaah ak gahoosan; aba giliwas munyinda gaygwadukuta ghuutaanyi.

⁴³ Siida weaghoot dang'ula ng'asheesu; nea gwasikteawa bariinyeega NG'UTAMIIDA.