NYIIGHEEGA 105 - Bibliyeeda Ghaydit

ASEETA ea fugaaschi

¹ Abadiischeesiina NG'UTAMIIDA, aguursiina gheawungaaschi, anung' ghwanal buuneeda gadiyoojigaaschi!

² Asarmasiina niny, asarmana giigheambiitaanyi, arukuta gadiyoojigaaschi sean deamdeameadi!

³ Oakghaambiida geat aba gheawungaaschi ghaydit; ak ea dahoosana gurooruunatkeaba fugiga gaseadayi NG'UTAMIIDEAN!

⁴ Agasa NG'UTAMIIDA ea uurdaanyi, agasa gheamamdaanyi galeagasean!

⁵ Oapkaada gadiyoojigaaschi deamdeameadi ghayi sin, deamdeamangaaschi, ea girgweaguutka rugu,

⁶ Ea jeata Abrahamu was siidaang'u bea gadiyeeda, orjooga Yakobo, ghayi loat niny!

⁷ Niny NG'UTAMIIDA gil was ASEETEANYA; girgweaguutkaaschi gwanda ng'eanyiisean.

⁸ Niny ghoapkaat neajeadaanyi damanda manda muudeanooda, aba ng'asheanda ghayi rugu, aba badahuuka seaygooji sagalama,

⁹ aba neajeeda ghayi sin sea Abrahamu, ea habeawoadaanyi sea Isaka,

¹⁰ ak goomajeek aba heeda Yakobo ghoah diigheanda, nea aba Israeli ghoah neajeeda manda muudeanooda,

¹¹ nea gwayeesha, “Ang'iing'i gaydagoonyi ng'eanyiida Ganaani ghoah heedeang'wa jea ahearana.”

¹² Nea damanda duu ea ng'ayeewa mooneeda nyaawa, fuga ng'ay, mida jeenyaawa rabasta,

¹³ ak gwaneayeewa daroar ea daroar, ak ghang'eada sugoocheanduumeanagi ea ghwahita hichpa fih suuk,

¹⁴ ak ea mwanung'waada ghaghabwas sih saawa; ak goowoowsa sugoodiga aba badahuuka nyaawa,

¹⁵ nea gwayeesha, “Adoasachi fugeasu aamwaarji, ak ea adoosawanyi sibangeasu!”

¹⁶ Hean gwajagu geejeeda ghwahidu badayda ng'eanyiida, ak ghabwara darari hamita sean ghus saawa,

¹⁷ hean ghwayiin siida madeanyaawa, was Yosefu, ghayi geeshaayda ghoah soomjeanda.

¹⁸ Geeshangaaschi geerada ea gwasawana aba biingu, ak gearat gheata aba munyaloalajeega gharinga.

¹⁹ Hean nea mii ghoah gil gwasa gidaghayi ramoaran ng'ata gwasin ng'asheanda NG'UTAMIIDA niny.

²⁰ Ng'ata goojeakta sugoocheanda ak geetin niny, ak gageanu sugoocheanda ambal buuneeda ak gootin.

²¹ Ak ghwanung' ghoah siida haw bea gheanyi, nea goombal haleanjeadaanyi sean mideawa,

²² nea ghoadoabiiwda fugaaschi ambaliischi gidagasiida, ak ghoanaal gweargwaaschi weaghuumeeda.

²³ Ak eara Israeli gawa jeeda ng'eanyiida Misri; ak ghoah Yakobo rabascheanda aba ng'eanyiida Hamu.

²⁴ Hean ghwanung' gwaji fugaaschi muuchi, ak ghwanung' gameanyiidi fugaaschi ea ghang'al weajoodiga nyaawa.

²⁵ Ng'ata ghwayam gurooruunatka nyaawa ghwasit fugaaschi, ak gwasima fugaaschi bea gadiyeeda ng'asheega munyas.

²⁶ Ak goojeagu Musa was siidaanyi bea gadiyeeda, sea Haruneeda ghayi loat.

²⁷ Hean ghwayiin gwadeagwajeagaaschi bugusta nyaawa, ea deamdeamanga jeeda ng'eanyiida Hamu.

²⁸ Ak ghwanung' ghwahidu misaneeda badayda ng'eanyiida, ak ghwanung' gamisaniit ng'eanyiida; ama ng'ata ghaheawa saawa ng'asheagaaschi.

²⁹ Ng'ata ghwayam beega nyaawa ghoah foojeanda, nea ghwanung' gameewa ghweayeega nyaawa.

³⁰ Ak ghwanyiit ng'eanyiida nyaawa udagheambagajeamajeega, eara jeesinga ghoorajeega sugoodiga nyaawa.

³¹ Ak gabalool hean ghwahidu ghasheang'anga saang'a, sea nyooka jeeda ng'eanyiida nyaawa.

³² Damanda jea ghoadawa roopta ghoadaw roopta lagheanga, ea dadamandeeda abwaay jeeda ng'eanyiida nyaawa.

³³ Ak ghwalas uhuuda sabiibajeega nyaawa ea shaboogheeta nyaawa, nea gwahirjeaweada geediga moonghajeega nyaawa.

³⁴ Hean gabalool ak ghwahidu deashamga, sea dayeega saang'a bea deashamga manda mooneeda;

³⁵ Ng'ata ghwaak geediga sean bea ng'eanyiida nyaawa, ak ghwaak haghweega ng'eanyiida nyaawa.

³⁶ Ak ghabwar duweachajeega sean bea jeeda ng'eanyiida nyaawa, was haghweega madeeda sean bea uurjeenga nyaawa.

³⁷ Ng'ata gooruudu Israeli nea gwandeawa lapiya ea dahaabu, ak ea manda eara siyagi aba jeeda eemeeda nyaawa dea siruusa.

³⁸ Ak gang'weela fuga Misri damanda beawa, aba gideaba ning'ut muuwda aba badahuuka nyaawa.

³⁹ Hean ghoayaaw shamooghooda gookwealsa fugaaschi, nea gooruudu beasta weeshinda eawa.

⁴⁰ Iidu nea gamusiischi gweadu udamughuushta, ak ghwanung' gwalang'u aba mukaateeyda humng'eeda.

⁴¹ Ak ghabwaash lagheaneeda, ak gwardu beega, ak gagulda aba dareapcheeda gawuurji eenda.

⁴² Aba gideaba ghoapkaat ng'asheandaanyi ghaydit, sea Abrahamu was siidaanyi bea gadiyeeda.

⁴³ Ak gooruuta fugaaschi aba hooseaneega, ea fugaaschi loat aba duumda.

⁴⁴ Ak ghoadaw saawa ng'eanyoojiga eemoojiga; ak gwahearan gadiyoojiga buuneeda.

⁴⁵ Ak abeeda ghoang'waay diigheanyeekaaschi, nea gwasissa mureeda deaweedajeagaaschi. Eakghaambiida NG'UTAMIIDA!