NYIIGHEEGA 104 - Bibliyeeda Ghaydit

Duumsheesiinda ASEETA bwat ng'eanyiida

¹ Ea gurooroodeanyu badiischeesiina NG'UTAMIIDA! Ea NG'UTAMIIDA was ASEETEANYU, ang'iing'i guwoosi haw muuchi! Ang'iing'i niikwealsi geaw mureeda ea giigheambiita,

² niikwealsi geaw weeshinda gawuurji hang'da, niibwargiidi humng'eeda gawuurji maheemajeanda,

³ Ak ghwayiin daranajeega ghoorajeagaaschi geawi jeeda beega, nea ghwanung' ghoah shamooghuutka mutukwajeandaanyi, nea ghamwanmwan aba badayda meang'eega jeameeda,

⁴ ak gwasin jeameeda ghoah giijasoodigaaschi, nea ghwanung' ghoah beasta ea ng'ushapta beasta fugaaschi bea gadiyeeda.

⁵ Hean giyiini ng'eanyiida badayda sindeataanyi, ak abeeda ea majeetuumduum.

⁶ Ng'ata giikweali beega saang'a gawuurji hang'da; abeeda beega ghamiinaada aba iheenga giijeega.

⁷ Nea iiwoowsi gamng'aw; ak aba nyeashta giighweandandeadaang'u gamng'aw.

⁸ Ghang'adaana iheenga giijeega, ea ghwahidu moangoachi was heeda ghayi iloosi saawa.

⁹ Ak gisini moonghooda mayghwanaawa, ak abeeda ea mwaamu gabiikta gwadukuta ng'eanyiida.

¹⁰ Ak ginung' gwardu gheanyanga eeniga gulsa moangoachihajeega; ak gagulda aba dageascheeda heayeeniga,

¹¹ ak ghwanung' ghwaleayda diyeanga sean bea dareabeeta; nea ghabwar siingiiga muwooshta nyaawa.

¹² Nea murdajeega goobiita dariidaka humng'eeda ak goobitpisa damealga ak gwasarman.

¹³ Nea aba humng'eeda gwaroobassa giijeega roopta nea gwalang'u ng'eanyiida aba miyeenoadaang'u.

¹⁴ Iissa giiruudu nyeega jea ghwaak dugwa, ea booga jea ghwaak buuneeda, ak abeeda ghwanyas hamita aba jeeda ng'eanyiida,

¹⁵ ea difaayeeda jea goohoosan guroorooda siida, ea nagheeda jea ghwanung' gaweeshiit gheamamdaanyi, ea mukaateeyda jea ghwanung' gamajeegiit guroorooda siida.

¹⁶ Nea geediga NG'UTAMIIDA ghwaleayda aba beega saang'a was gubooyeeka Lebanoni ghayi hista.

¹⁷ Ak ea heeda siniisa dariidaka ghoorajeega nyaawa; nea udoombalalajeega gwasissa ghooriidaanyi uhuuda hoonyaweega.

¹⁸ Giijeega geawi heeda abiita nooga dareabeeta gil; nea lagheanga hees ea heeda mang'awiisa gwaleang'walajeega.

¹⁹ Ak gwasin sheeda gooheeldooschi damanyoojiga; nea aseeta ghwanal damandaanyi jea gamikteawa.

²⁰ Ang'iing'i gisini misaneeda, ak ghoah eawa, nih damanda badiina ng'eanyi diyeanga sean bea dareabeeta.

²¹ Dayeega ng'anyeeka ghoamuum aba gasooda diyeanga, ak gagasa daghwarda nyaawa aba heeda ASEETA.

²² Hean nea goorearu aseeta, gaweay heechea gaweay ak gwalil aba jeesinga gwaleadinga nyaawa.

²³ Siida iissa gwarita gawa gadiyeadaanyi ea heeda gadiydooscheewa ea ghoah shing'ada.

²⁴ Ea NG'UTAMIIDA aba giteena seang'ayda gadiyoojigaagu! Ak gisini sean aba weaghuumeadaang'u; ng'eanyiida ghwanyiit haleanjeadaang'u iisini.

²⁵ Hoowa gwanda basooda, ak aahaw nea bwarak, ak ea heeda mida diyeanga weelweel mwoamu eeyiida diyeanga mideawa eaweega gea manang'i ea gea hees.

²⁶ Nih heeda siga maleambajeega heesi nea gidida was Lewiatani ghayi iisini gwadeangana jeedean.

²⁷ Suh seaniin ghoamuukghuneey ang'iing'i, adawa hamita nyaawa aba damanda hit.

²⁸ Iissa iidawi saawa, hean ghoawaam; nea iiyaawi geatindaang'u, hean ghwanyas haleanjeeda saang'a miyaas.

²⁹ Nea iifunyi gheamamdaang'u, ghang'ut saawa muuwda; nea iigeandi eaweega nyaawa, gameewa ak gabiikta jeeda sigeeda nyaawa.

³⁰ Iiguusi gurooroadaang'u gabiikta gamajeekcheewiidi; ak gibiikti nung' ghamiidu oormeeda ng'eanyiida.

³¹ Giigheambiita NG'UTAMIIDA gidabal ghwashng'u damanda manda muudeanooda, gidabal gahoosan NG'UTAMIIDA aba gadiyoojigaaschi,

³² dea ama ang'weersa ng'eanyiida ghaboadan, ama waas giijeega gwardu aroosta!

³³ Gaydasarmasa NG'UTAMIIDA damanda duu dawoos majeek; gaydahoosasa ASEETEANYU iidu danda.

³⁴ Gidabal ghamwas niny gideateemsheesi, aba gideaba aniini geahoosanyi aba heeda NG'UTAMIIDA.

³⁵ Fuga riing'eega gagasa ealas uhuuda aba jeeda ng'eanyiida nea fuga sina ng'asheega munyas gidabal ea mudugwanda earahay! Ea gurooroodeanyu, badiischeesiina NG'UTAMIIDA! Badiischeesiina NG'UTAMIIDA.