NYIIGHEEGA 103 - Bibliyeeda Ghaydit

Bariinyeega ASEETA

¹ Ea gurooroodeanyu, badiischeesiina NG'UTAMIIDA; sea haleanjeeda sean mida jeedeanyu, dabadiischeesiina gheawungaaschi ghaydit!

² Ea gurooroodeanyu, badiischeesiina NG'UTAMIIDA, ak ea adagwarooseey alooheadaanyi sean,

³ ak ea dasamseey ng'asheagaagu sean munyas, ak ghoahaap geeyoonung'weakaagu sean,

⁴ ak gwalealna eaweagaagu jeeda ghwarjeeda, gagoonyi shiipka bariinyeega ea baydeayda;

⁵ hean goolang'uuda alooheeda gwearguumeadaang'u aba gidayang'da eaweagaagu ak geenung' gabiigu gheareemaneanduumeadaang'u gawuurji rabearda.

⁶ NG'UTAMIIDA niny dea sina ng'asheega doobiiweadi ea girgweageeda aba heeda buuneesean sighawas.

⁷ Niny ghwanung' ghwanal Musa naweadingaaschi, nea ghwanal fuga Israeli gadiyoojigaaschi.

⁸ NG'UTAMIIDA gabayiida buuneeda nea gwandeawa dagheerjeanduumeeda, ak ea mii asas nyaras ak gwandeawa bariinyeega huumwa.

⁹ Niny maygoowoowi galeagasean, ak ea mayghoang'waay nyarastaanyi damanda manda muudeanooda.

¹⁰ Ak ea masimaneasa giteaschi sea riing'eegaasa, ghana ghawalda aba heedeanya gawuurji giteena giidiinyeanyeakaasa.

¹¹ Aba gideaba gidasheakta humng'eeda sea ng'eanyiida, nih ea giteena bariinyeagaaschi aba heeda fuga awali gheang'daanyi;

¹² gawuurji gidasheakta heeda ghayeawa sea heeda biyeara nih gidasheagita riing'eegaasa gil aba heedeanya.

¹³ Gawuurji gidabayiideayda ghweanda diibigaaschi nih gidabayiideayda NG'UTAMIIDA fuga awali gheang'daanyi.

¹⁴ Aba gideaba niny ghwanal ratoodeanya; ak ghoapkaat gideaba aseasa geewooschi birjeanda.

¹⁵ Siida askwearjoojigaaschi gawuurji sea nyeega; gawuurji deakghweeda daakghwan bea madamnyeanda;

¹⁶ aba gideaba iissa gwasik jeameeda uhuuda, ak goosha, ak hoorgeadaanyi ea maygudeanal.

¹⁷ Nea bariinyeega NG'UTAMIIDA gwanda heeda fuga bada niny, ghang'eada damanda manda muudeanooda nea doobiiwnataanyi gayghwashng'u aba jeacheenga sean,

¹⁸ aba gideaba fugiga ang'waay neajeadaanyi nea ghoapkaat diigheanyeekaaschi ak gwasin.

¹⁹ NG'UTAMIIDA niyiin hoorgeadaanyi ghaambiidaat humng'eeda, nea sugoocheanduumeadaanyi goombal haleanjeeda sean.

²⁰ Abadiischeesiina NG'UTAMIIDA agoogeeda was malaykajeagaaschi agoogeeda oowooschi daruusi oosinayi ng'asheandaanyi, nea gooleeysiit ghuuta ng'asheandaanyi!

²¹ Abadiischeesiina NG'UTAMIIDA, agoogeeda oowooschi lugoadaanyi sean, agoogeeda oowooschi fugaaschi bea gadiyeeda oosinayi ng'asheega bwariiyiin!

²² Abadiischeesiina NG'UTAMIIDA oogasean oowooschi gadiyeadaanyi, aba ng'eanyiisean ambal niny. Ea gurooroodeanyu, badiischeesiina NG'UTAMIIDA.