NYIIGHEEGA 10 - Bibliyeeda Ghaydit

Mooshta ASEETA bea doobiiwnata

¹ Ea NG'UTAMIIDA ghwasaan inyas gimiinaadi nea guwoosi sheagi? Ghwasaan anda gifunyi geaw damanda sawanadeeda?

² Nea aba ghwarjeeda siida mii doabiiwaat iissa siida ng'arng'ar geesawan; nung'waada eaghas aba munyasnacheeka nyaawa sin.

³ Aba gideaba siida muy iissa ghaghwara geaw gidida gasa gurooroadaanyiin, nea siida shit ghaang' iissa ghaheawa NG'UTAMIIDA nea gafool.

⁴ Siida muy iissa aba ghwarjeeda mida madeeda gheanyangaaschi ea magaseadayi niny; fughareadaanyi sean iissa gwayi, “ASEETA mandana.”

⁵ Naweadingaaschi sean ea miyaasiin damanyoojiga sean; girgweaguutkaagu gwanda humng'eeda heeda mwadaaha; ak gooleechiisa ghuut weajoodigaaschi sean.

⁶ Iissa gwayi aba gurooroadaanyi, “Aniini majeegeandanean aba jeacheenga sean maydabussiinyi gidamuy.”

⁷ Ghuutaanyi ghwanyiit mooshteayda, ea munyinda ea ghabasta; hing'eadayda ng'ushaptaanyi nyariida ea munyinda.

⁸ Iissa ghahabwaas ng'eanyi aba gharang'weaka nea gwaradiischi; nea aba heeda fuysa geaw ghabwar siida mandeawana giidiinyeanda. Gheanyangaaschi iissa ghwaradaan siida ng'arng'ar,

⁹ iissa ghahabwaas ng'eanyi aba heeda funyaat gawuurji ng'adiida mida radiida; ak ghwaradaan ghoang'waay siida ng'arng'ar, manda uurda, ak ghoang'waay siida ng'arng'ar ak goongiirsa jeeda gheareedangaaschi.

¹⁰ Fuga manda uurjeenga geabwaay goobargiishi aba ng'eanyi; fuga munyas mideawa uurjeenga nijoar saawa.

¹¹ Gwayi aba gurooroadaanyi, “Niroosa ASEETA, ak ghafuy gheamamdaanyi, mayghwadaah eara gil.”

¹² Ng'eada, Ea NG'UTAMIIDA, Ea ASEETA gatkada geatindaang'u; adagwarooseey fuga ng'arng'ari.

¹³ Ghwasaan anda siida muy gafool ASEETA, ak gwayi aba gurooroadaanyi, “Maynung' gwasin gadiyeeda?”

¹⁴ Ang'iing'i nidaahi fuga gasa haleanjeeda ea gea sawana, ak giyiini geatingaagu; siida manda uurda iissa gagoonyi gurooroadaanyi, aba gideaba nuwoosi siida weeda bananeeda.

¹⁵ Hirja geatinda siida muy, nea siida muy giwaldi mureandoadaanyi ea eamudu gasa munyindaanyi ea eamudu gwanda.

¹⁶ NG'UTAMIIDA sugoocheanda gil damanda manda muudeanooda; eemoojiga gaygoosha aba jeeda ng'eanyiidaanyi.

¹⁷ Ea NG'UTAMIIDA, niyiinyi gidagasa fuga munyas; gajamajeega gurooruunatka nyaawa, ak gayghamwada iitaang'u.

¹⁸ Ak gisisi ng'asheega doabiiw bananeeda ea dea sighabwas, siida sisna sigeeda adagwasin ng'asheega munyas.