NYIIGHEEGA 1 - Bibliyeeda Ghaydit

GITAABOODA MADEEDA (Nyiigheega 1–41 ) Hooseaneega huumwa

¹ Ghang'wana siida mwaada geeshta ng'asheega fuga mii doobiiweadi, ghana ghamiinaada aba naweeda fuga riing'eega, ghana goobideada aba seedooyda fuga juuga buuneeda;

² nea gidabwariiy ea deaweedeeda NG'UTAMIIDA gil, nea deaweedeadaanyi iissa gwasikteawa askweari ea eawa.

³ Ak gaygawuurji geeta sing'eapsa ghuuta eeniga beega, ak gwajiila haghweagaaschi aba damandaanyi, ak eara seendoadaanyi ea masisa. Nea aba gadiyoojiga sean sina, iissa ghwanyagaada.

⁴ Ak ea masunu aba heeda fuga mii doobiiweadi, saawa gawuurji looyda ghuuta jeameeda.

⁵ Asi fuga munyas mayghamiinaada aba damanda girgweageeda, ghana fuga riing'eega aba jeeda fuga doobiiweadi bwat geat.

⁶ Aba gideaba NG'UTAMIIDA ghwanal naweeda fuga doobiiweadi, nea naweeda fuga mii doobiiweadi gayghwaroat.