NAHUMU 2 - Bibliyeeda Ghaydit

Giibeedeayda Ninawi

¹ Asi nihidu heedeang'wa siida jea gwanyarjaneegwa. Siida ang'waay dabita; ak giradi naweeda; ak giimajeegi manandaang'u; ak giihaadi uurdaang'u.

² (Aba gideaba NG'UTAMIIDA niideelu uurda Yakobo ea uurda Israeli, aba gideaba fuga ghas buuneeda niing'waay saawa ak goombal damealga nyaawa.)

³ Igeambooda fugaaschi mideawa uurda ea areara, shirikareadaanyi gookwa hang'weaka areeri. Mutukwajeega ghameang'meang' gawuurji beasta nea gagasa ng'ucheeda; nea faraasajeega ghoamu beata ng'ucheeda.

⁴ Mutukwajeega iissa gwaneayi aba naweadinga, iissa gagal hiji ea hoowa aba bugusta mujiini; nea iissa ghwayeata gheaboonyanga, nea iissa ghabeada dadamandeeda.

⁵ Ak gaguursa fuga hees, ak gwatirinyeada damanda beawa, ak gwahalsa geat ghamarda, nea gichea gwadukuta ea nigeawiit eesisin.

⁶ Ghuusiga eeniga siitin, gealga sugoodiga ea ning'ut muuwda;

⁷ nea gatmooda was sugoocheanda ea siing'waay ak geayaat, nea haweagaaschi bea gadiyeeda gooyeawda, ak gagiisanda ghariibajeega, nea gagulgul daghanuunatka nyaawa.

⁸ Ninawi gawuurji leehooda rita beagaaschi. “Amiinaada! Amiinaada!” goojuur; ak ea manda siida yamu geaw.

⁹ Oang'waanya lapiya, eang'waanya dahaabu! Ak haleanjeeda siitiiwi ea maygamuudean, ghana baruureega gida wasean bea sheayeeda haw.

¹⁰ Sinyarja! Nyarjeawda ea nyariida! Gurooruunatka niihiili ak gutung'weaka ea nibwar geat, ak gwasawana mananuunatka sean, ak gheamamuunatka nyaawa sean ea niweeriidi!

¹¹ Gwanda yeenu heeda funya geaw ng'adiida, gwaleeda ng'anyeeka manang'i, heeda eatu ng'adiida diyeanga, heeda mida dayeagaaschi, manda gichea ghwasadi?

¹² Ng'adiida nilajaada ea gwadeay gichea ghwaak dayeagaaschi ak gwahirjeaweada gheatkweaka ak gwanyaksa soorearjeeka banyeega; ak ghoanyiit gwaleadingaaschi banyeega ea heeda abiita aba diyeanga ang'waay.

¹³ Ng'ula, aniini geandi washtaang'u, gwarugu NG'UTAMIIDA bea lugweega, ak gaydaghwarda mutukwajeagaagu bea ng'ucheeda; gaydageanda hamitaang'u aba jeeda ng'eanyiida, ak ea maygudeayiiy gicha ghuusiga giijasoodigaagu.