NAHUMU 1 - Bibliyeeda Ghaydit

¹ Ng'asheega siitahaach aba badayda Ninawi. Gitaabooda ng'asheega siihiimsa Nahumu aba ng'eanyiida Elkoshi.

Nyarasta NG'UTAMIIDA aba badayda Ninawi

² NG'UTAMIIDA was ASEETA dea lacha ghuut haleanjeeda ak gawaliida mureandooda, NG'UTAMIIDA gawaliida mureandooda ak aang'waan; NG'UTAMIIDA iissa gawaliida mureandooda aba heeda weajoodigaaschi nea gwanyareeksa fuga fuurji.

³ NG'UTAMIIDA mii asas nyaras ak gwandeawa uurda haw, ak NG'UTAMIIDA gaygageanda giidiinyeanda aba giduurji sean. Nea naweadingaaschi siga gwanda shaarara ea jeameeda, nea shamooghuutka ea birjeanda geeshangaaschi.

⁴ Niny iissa goojuursa basooda ak ghoaghajaam, iissa ghoaghajaam eeniga sean; Bashani ea Garmeli gagajeamiidi, nea deakghweeda Lebanoni ghwasis.

⁵ Giijeega iissa ghaboadan aba madeadaanyi, nea gwanyara heayeeniga; ak geegatkat ng'eanyiida aba madeadaanyi, ng'eanyiida ea haleanjeeda sean mida jeeda.

⁶ Gayghoamu ng'eaha ghamiinaada aba madeeda nyarastaanyi? Gayghoamu ng'eaha ghamilikghta beasta nyarastaanyi? Nyarastaanyi geahiidaayda beasta, ak gwanyara lagheanga aba badaydaanyi.

⁷ NG'UTAMIIDA aamiy, ak ea gheeda majeek gil aba eaweeda sawanadeeda; ak ghwanal fuga salsa ak gwadiiy niny.

⁸ Nea aba guldeayda haw gaygwaduulu heeda abiita weajoodigaaschi, ak ghwaat geeshta weajoodigaaschi ea ghwahita jeeda misaneeda.

⁹ Agooga ghoapkaachi naaha aba badayda NG'UTAMIIDA? Niny gayghoahiit muuchi; niny mayghawalda nibiyeenya aba badahuuka weajoodigaaschi.

¹⁰ Ak gawuurji halaghweenga siimughuush niyaak beasta, ak gawuurji mbarariida gajeami.

¹¹ Neada headaang'u ea mii gwarina siida, gasa gwasin ng'asheega munyas aba badayda NG'UTAMIIDA, ak gwarugu ng'asheega munyas?

¹² Asi gwayi NG'UTAMIIDA, “Eara gwandeawa uurda haw nea ghabwada seang'ayda, gajeasach ak geanung' goosha. Earapeadi neasawanyeegwa, maygudu dabiikta dasawaneegwa.

¹³ Ak ghamneawa gaydahirja yookeadaanyi aba heedeang'wa ak gaydang'acheaweada munyaloalajeega rateegwa.”

¹⁴ Ea nigooneegwa NG'UTAMIIDA diigheanda aba badaydaang'u: “Ak ea maygwanda jeacheengeagwa dea jea gooyeawda aba gheawungeagwa; ak gaydasaja gheeda aseecheeka nyaawa sea sanaamooda nyaawa sing'oora, ea dea siimu eaghwarda. Ak gaydasineey bung'eadaang'u, aba gideaba guwoosi muy.”

¹⁵ Ng'ula, aba uhuuda giijeeda geeshanga siida eadu ng'asheega miyaas, was dea ruku hoyyoo! Ang'waanya ghweelmoojigaagu, Ea Yuda, ahiida habeawajeagaagu, aba gideaba maygudu gabiikta fuga munyas ghapka headaang'u, aba gideaba nigeawiit eeheeli.