MIKA 7 - Bibliyeeda Ghaydit

Seawshooda fuga Israeli

¹ Deashageadi! Aba gideaba neawuurjeewi haghweega siimughuush bea geayda, geawuurjeewi sabiibooda siimughuush iing'ata lajita: ak ea manda eara damealeanda jea eayaak, ak ea manda eara haghweega madeeda gasa gurooroodeanyu.

² Siida bada ASEETA niroat aba badayda ng'eanyiida, ak ea manda siida doabiiwaat aba jeeda buuneeda; iissa ghabwada jeesinga ng'eanyi sean aba giihiideayda foojeanda, ak gaba nih ak shageata orjeeda ghaamwat aba gheareedanga.

³ Geatinga nyaawa gwanda badayda ng'asheega munyas, ak gwasin muuchi; sugoocheanda ea siida haw aheeldooschi buuneeda gagasa seawshooda, eara siida haw siiwal gheang'da gagasa gurooroadaanyi gwasin ng'asheanda muy; ak hean gwanapsiinyi.

⁴ Siida miy aba jeenyaawa gawuurji ng'eamga, nea dea doabiiwaat aba jeenyaawa ea hilgweanda halaghweenga. Eaweeda furiischoocheanda nyaawa, bea ghoorjoadaanyi nihidu; ak ghamneawa hirbabandeeda nyaawa ea nihidu.

⁵ Adibwati giischeewoocheanda, nea adighasi siida iduupcheewi; fura gidaghuudajeega ghuutaang'u aba gideaba adaghwanal gatmooda iideaydooscheewi iita;

⁶ aba gideaba orjeeda gayghoabwaaspwaas ghwaan aba ng'uyeega, nea huda gayghang'eat gagaleada sea ghaamwat, gatmooda orjeeda gaygwasheang'nyi sea ghamasiyeeda; weajoocheanda siida fugeaba gheanyi gil.

⁷ Ak aniini, gaydang'ula NG'UTAMIIDA, nea ghaamuughu ASEETA lealeanoodeanyu; ASEETEANYU gaygooleeysean iit.

NG'UTAMIIDA gweadu lealeanooda

⁸ Adihoosani aba badaydeanyu, Ea weajoocheandeanyu; inyas ghaabeadi, gaydamiinaada gicha; inyas geapteadi aba jeeda misaneeda, NG'UTAMIIDA gayghoah weeshinda aba heedeanyu.

⁹ Gaydamilikteaysa ghoorjooda NG'UTAMIIDA aba gideaba neadiiysi niny, eeyi bwak ea ghaweadan aba weeteanyu ak goorgweaksean. Ak gaygweanean jarooda heedeesh; ak gaydadaah doobiiwnataanyi.

¹⁰ Hean weajoocheandeanyu gayghwadaah, ak gaygwadukuta niny baspaseega ninyeeda eeshiinean, “NG'UTAMIIDA was ASEATAANG'U gwanda yeenu?” Gheanyangeasu gaygang'ula niny; ak ghamneawa gajealaapta ng'eanyi gawuurji sheang'weeda mida naweadinga.

¹¹ Eaweeda jea eadeasa ghamardaang'u! eaweecheanji gajeenung' goosiipta moonghooda.

¹² Eaweedida gajeapka headaang'u, nea geeleabu ng'eanyiida Ashuru ea Misri, ghang'eada Misri ea ghwahita Eenda, ghang'eada basooda ea ghwahita basooda ghang'eada giijeeda ea ghwahita giijeeda.

¹³ Ak ng'eanyiida gayghwanyas salgheang'da aba badahuuka fuga mida jeeda, aba haghweega sinaweega nyaawa.

Baydeayda NG'UTAMIIDA aba badayda Israeli

¹⁴ Ahaaghwana fugaagu aba bileangidaang'u, hawanda hearaniischoadaang'u, was dea apteada nea gaba geaw aba jeeda dareabeeta mida jeeda shiidaneeda ng'eanyiida; nung' ghoajeada saawa aba jeeda ng'eanyiida Bashani ea Gileyadi gawuurji eawoojigeaba garayi.

¹⁵ Gawuurji eawoojiga ghayi irini jeeda ng'eanyiida Misri gaydeahiimsa ng'asheega deamdeameadi.

¹⁶ Eemoojiga gayghwadaah ak gayghabwaspwas aba uurjeenga nyaawa sean; gaygoong'oonyi ghuusi; iidiga nyaawa gaygamiinyiidi;

¹⁷ gajeemeash birjeanda gawuurji ichibooda, gawuurji diyeanga badiina jeesinga bea badayda ng'eanyiida; gajeeriina heeda sifuysa geat, ak gajeebiiksa NG'UTAMIIDA was ASEETEANYA nea geaboadan, ak gajeabeal aba badaydaang'u.

¹⁸ ASEETA uurjeewaneey aneeda, dea inyas samiisa giidiinyeanyeeka nea nung'weadayi ramaseanyeeka aba gheaptanga jea gwahearan? Mayghwanyareas ea ghwahita damanda manda muudeanooda aba gideaba niny gahoosan aba bariinyeega huumwa.

¹⁹ Gaygabiikta gicha ak ghabwaydaneasa, gayghoalaapta ng'eanyi giidiinyeanyeekaasa ak gaygwajaksa riing'eega nyaawa sean jeeda beega sheagi jih bea basooda.

²⁰ Ak ang'iing'i gajahiimsiina Yakobo doobiiwnataang'u ea bariinyeagaagu bea huumwa Abrahamu, gawuurji gidaghayi iyeaksiindi habeawooda ghweanigaasa aba askwearjoojiga ghayi bea garayi.