MIKA 6 - Bibliyeeda Ghaydit

NG'UTAMIIDA goorgweaksa fuga Israeli

¹ Oaleaydiit nih ginyah NG'UTAMIIDA gil: Ng'eada, weada geaw aba madeeda giijeega, nea ghwayiiy ghuutaang'u heayeeniga.

² Agooga giijeega, oaleaydiit, girgweageeda NG'UTAMIIDA, ea agooga sindeecheeka ng'eanyiida majeekcheewi; aba gideaba NG'UTAMIIDA gwandeawa girgweageeda sea fugaaschi, ak gaygabalool sea fuga Israeli.

³ “Ea fugeasu, neasineegwa naaha? Ak ea neabuurjeegwa aba ana ng'ashaan? Asi ashaaha!

⁴ Aba gideaba geascheeng'naneegwa ng'eanyiida Misri, nea gearuunaneegwa gheeda soomjeandumeeda; ak ghaanung' gawa madeadaang'u Musa, ea Haruni, ea Miriyamu.

⁵ Ea fugeasu, eapkaada gidanyaashta Balaki was sugoocheanda ng'eanyiida Moabu, ea gidashaayda Balaamu was orjeeda Beori ea gidaghayi bunu aba Shitimu ea ghoah Gilgali, ak ghoanali gitoabiiwda gadiyoojiga NG'UTAMIIDA.”

Gidagasa NG'UTAMIIDA

⁶ “Gaydeasa naaha NG'UTAMIIDA iijea daneekiisa, ak ghaahiinyi geaw aba madeeda ASEETA mida humng'eeda? Heapi gaydaneekiisa niny nea geayeasi haleanjeeda sisabwa geadi bea ghadooweeda sighwarda, ghana meayda bea gwanyagi?

⁷ Heapi NG'UTAMIIDA gaygagasa sagalamnyoojiga lagweendiga, ghana sagalamnyooji damwan mughuush bea eeniga nagheeda? Gaydaadayda duweacheedeanyu aba giidiinyeandeanyu, jeata saseedeanyu aba riing'eeda gurooroodeanyu?”

⁸ Ea orjeeda siida, niny ghoahiimneey gea miyaas; ak NG'UTAMIIDA gagasa naaha aba headaang'u gagasa gideaba gaysina gitoabiiw, ak gibwariinyi baydeayda, ak guwi nea giyaadi geaw ng'eanyi aba heeda ASEATAANG'U?

⁹ NG'UTAMIIDA gooyeawda aba badayda mujiini– ak siida mideawa weaghuumeeda gayghoawal gheawungaagu: “Oaleaydiit, Ea eemeeda ea gea bwat geat aba mujiini!

¹⁰ Neada ea niroosean giidiiwshooda munyinda mida jeeda gealga fuga munyas, ea giisiiteeniida giishoanyaat neada ea sicheedea?

¹¹ Gaydaamu deaw siida miy nea geandeawi giisiiteeniida muy ea shageeda lagheanga siiteeniida bea reengaweega?

¹² Aba gideaba meanang'oodigaagu gooreedi fih haleanjeeda; nea fugaagu bea ng'eanyiida gabaloola ng'uyyeega, nea ng'ushapta nyaawa gaba reengaweega aba ghuusiga nyaawa.

¹³ Asi naang'eachi bayiigeagwa, nea ghoahuuyi fuga sisach aba badahuuka riing'eegeagwa.

¹⁴ Gajagiischeena ak ea maylang'uuda, ak gaygwanda headaang'u jalooda aba jeedeang'wa; gajadayiida, ak ea majadiiwa, nea gidiidiiwi gaydaadaw ng'uta.

¹⁵ Gayhista ak ea mwaylaja; gaymuura saytuunajeega ak ea mwajeamwaarda nagheeda; gaymuura haghweega, ak ea mayleaha difaayi.

¹⁶ Aba gideaba noang'waanyi deaweedajeega Omri, ea gadiyoojiga sean bea gheeh Ahabu; ak ghoayaachi geeshta girgweaguutka nyaawa; nea ghaanung' ghwaaknyi salgheang'da, nea fugaagu bea ng'eanyiida ghoah gea jea eemachiida; ak gajasareana giing'weaka buuneeda.”