MIKA 5 - Bibliyeeda Ghaydit

¹ Ak ghamneawa gajawaamwa gharmucheeka, Ea huda gharmucheeka; niny nineaweeseasa gayghwalas madeang'da siida ambaliischi bea Israeli aba bileangida.

ASEETA gwaheeleesa gideaba siida jea goombaliischi gaygwaleabu Betlehemu

² Nea ang'iing'i, Ea Betlehemu Efrata, uwoosi mwanang' aba bugusta dooshinga Yuda, aba headaang'u gaygwarinanean dea jea goombal fuga Israeli, nea gumdoadaanyi ghang'eada ghayi garayi, damanda manda muudeanooda.

³ Asi gaygoodiing'da saawa ea ghwahita damanda jeata aba dea gwachi bearji lajooda; ak abeeda buuneeda mwaatkwa was buweadeagaaschi gaygabiiksa fuga Israeli.

⁴ Ak gayghamiinaada ghoahaaghwa hawandaanyi aba uurda NG'UTAMIIDA, aba jeeda sugoocheanduumeeda gheawunga NG'UTAMIIDA was ASEATAANYI. Ak saawa gaygoobiitpiit aba gideaba ghamneawa gayghwanyas hawunda, ea ghoah muudeanooda ng'eanyiida.

⁵ Ak gayghoah hoyyoo, inyas ghapka fuga Ashuru ng'eanyiideanya ak ghoalaapta ng'eanyi ng'eanyiideanya, abeeda gajeanung' ghang'eat jeagiischoodi ispwa gaweay badaydaanyi ea sugoodi sis;

Giitinda ea ghoorjooda

⁶ ak gajeembal ng'eanyiida Ashuru aba ng'uta, ea ng'eanyiida Nimrodi aba ng'uta sifagu; nea ghoaghuuheasa aba fuga Ashuru inyas ghapka jeeda ng'eanyiideanya ak ghoala moonghoodeanya.

⁷ Nea gheaptanga Yakobo gaygoobiida bugusta fuga saang'a gawuurji rahooda leabu heeda NG'UTAMIIDA, gawuurji shiishiiyda aba badayda nyeega, nea makghusa buuneeda ak ea mwoamu ukghuna orjooga buuneeda.

⁸ Ak gheaptanga Yakobo gaygoobiida bugusta eemoojiga, aba bugusta fuga saang'a, gawuurji ng'adiida aba bugusta diyeanga dareabeeta, nea gawuurji dayeenda ng'adiida aba bugusta hawanda gisilga, sik bugusta, ak gooleapsa ng'eanyi nea ghabwaashaada, ak ea manda siida jea ghaweat.

⁹ Geatindaang'u gajeamiina aba badayda weajoodigaagu, ak weajoodigaagu sean gajeasach.

¹⁰ Ak askweardida, nih ginyah NG'UTAMIIDA gil, gaydaghuuta faraasajeagaagu aba headaang'u nea geanyarji mutukwajeagaagu;

¹¹ ak gaydanyarjeawi mujiinajeega ng'eanyiidaang'u nea geanyarji ghamardida;

¹² ak gaydaghuuta beeneediga aba geatindaang'u, ak ea manda dea jea gwaruku ramooranga;

¹³ ak gaydasach haleanjeadaang'u was sanaamu, ea daranajeagaagu mida headaang'u, ak ea maygutghadoawana haleanjeeda iisini aba geatingaagu;

¹⁴ ak gaydaloata aseecheekaagu siguura Asherimu aba bugustaang'u nea geanyarji mujiinajeagaagu.

¹⁵ Ak gaydawalda mureandooda aba nyarasta nea ghaayaagi ghoorjooda eemoojiga mandeawana mureeda.