MIKA 1 - Bibliyeeda Ghaydit

¹ Ng'asheanda NG'UTAMIIDA ghwahidu heeda Mika aba mujiineeda Moresheti damanda waseewa sugoodiga Yuda geaba Yotam ea Ahasi, ea Hesekiya, ak geehiimsa ng'asheega Samariya ea Yerusalemu.

Gutuunooda heareega aba Samariya ea Yerusalemu

² Oaleaydiit, buuneeda, oogasean bea eemoojiga; aleaydiit, Ea ng'eanyiida, ea haleanjeeda sean mida jeeda; ak gagasa gamuuwu Ng'utamiida was ASEETA aba badahuukeagwa, was Ng'utamiida jea gwaleabu gheanyi ghaydit sibata ASEETA.

³ Aba gideaba ng'ula, NG'UTAMIIDA ghwahidu nea gwaleabu heeda abiita, ak gayghwararang'aan ak gooleapsa ng'eanyi heeda was heayeeniga mida jeeda ng'eanyiida.

⁴ Ak giijeega gaygwanyara aba hing'eadaydaanyi nea moangoachihajeega gajeabwaashaada, gawuurji mughoondooda mida madeeda beasta, gawuurji beega weay nea gagal burgadeeda.

⁵ Suh seaniin gweagu giidiiyda Yakobo ea riing'eega gheeh Israeli. Giidiinyeanda Yakobo naaha? Neada ea mii Samariyahi? Ak riing'eega gheeh Yuda ea naaha? Neada ea mii Yerusalemu?

⁶ Ak gaydanung' ghoah Samariya dulgwajeanda aba nyarjeawda aba ng'eanyiideesh, nea gawuurji heeda jea eehisteawa sabiibajeega; ak gaydahisa lagheangaaschi moangoachi, nea geanyarji sindeecheekaaschi.

⁷ Haleanjeadaanyi sean was sanaamu gajeenyarjeaweada, nea gidageatindaanyi sean gajeaghwarda aba beasta, nea haleanjeadaanyi sean was sanaamu gaydanung' ghwanyas salgheang'da aba gideaba ghoawaam gidageatinda aba hiseadayda, ak gaygabiiksa gidageatinda ghoah dea hiseadayda.

⁸ Aba badaydeaba ng'asheesu gaydagutu heareega nea geayeawdi, gaydawa nea neajakti eaghwada nea geawooschi dawiish; nea geayeawdeaydi fureayooda, ak geanyahuusheati shageerooda.

⁹ Aba gideaba deaneaduutkaaschi maygaheaba; ak ea nupka ea ghwahidu Yuda, ea nihidu gidaghuuta dooshta fugeasu, ea ghwahidu Yerusalemu.

Weajoodiga gwaneekiisa Yerusalemu

¹⁰ Adoorukwiidi ng'asheesu aba Gadi, adiidu gooyeawdi; aba Bet-le-afra abeerbeersheena aba jeeda birjeanda.

¹¹ Ang'ata aweayeena agoogeeda was fuga Shafiri, aba baspaseega nea goowooschi dawiiri; fuga abiita Saanani adagwardu jarooda; shooka fuga Beteseli gaygageandeawa heedeang'wa heeda jea gamng'awsa.

¹² Aba gideaba fuga abiita Maroti ghoamuughu weeta, aba gideaba gidamuy nirarang'aana heeda NG'UTAMIIDA ea ghwahidu ghuuta dooshta Yerusalemu.

¹³ Rasiina Faraasajeega mutukwajeega, fuga abiita Lakishi; oowooschi fuga ghayi ang'eat riing'eeda aba hudeaba Sayuni, aba gideaba headaang'u nidaajiit giidiinyeanyeeka fuga Israeli.

¹⁴ Asi gajadawa Moreshet-gati haleanjeeda mugeayda; gealga Akisibu gayghoah gichea gwareengani sugoodiga Israeli.

¹⁵ Ak gaydabiikta deadu weajoocheanda badahuukeagwa, fuga mida Maresha; nea giigheambiita Israeli ghwaan heeda Adulamu.

¹⁶ Sisiina geaw mearumeeda nea gireaghwi buudeagaagu, aba badayda diibiga ahoosanyi; sisiina geaw mearumeeda uurji dea soombiida, aba gideaba gayghabeawa headaang'u diibigaagu ak gaweay soomjeandumeeda.