Mattayo 4 - Bibliyeeda Ghaydit

Gidasisimsimda Yesu

¹ Ng'ata ghwaat Yesu Guroorooda ea ghoahiita dareapcheeda ak gwasimsim meang'nyeandeenda.

² Gooluulda geaw eawooji haradam, eawa ea askweari, amadu huuydeanda ghwayeachi.

³ Ghwahidu headaanyi gichea gwasimsim ak gwayeesha, “Iiwoosi Orjeeda ASEETA giyami lagheang'su ghoah mukaate.”

⁴ Ghwasha nea gwayeesha, “Geang'waar gideaba, Siida moamu goobiideewa ng'eanyiida mukaate ak ghwahit, geaghus ng'asheanda rinna ghuuta ASEETA.”

⁵ Ng'ata ghwaat meang'nyeandeenda mujiineeda Ghaydit ak goodiing'da uhuuda gheeda sibata ASEETA heeda geaw

⁶ ak gwayeesha, “Iiwoosi Orjeeda ASEETA, gijaksi geaw ng'eanyi; aba gideaba geang'waar, ‘Gaygoojeagu malaykajeagaaschi aba badaydaang'u,’ ak ‘gayghwadeabwaneey geatinga nyaawa ea mwalasa geashtaang'u lagheaneeda.’”

⁷ Gwayeesha Yesu, “Geang'waar gicha gideaba, ‘Adisimsimi Ng'utamiida was ASEATAANG'U.’”

⁸ Ng'ata ghwaat gicha meang'nyeandeenda ak goodiing'da uhuuda giijeeda geaw muuchi, ak goohiimsa darooraka sean bea muunda ng'eanyiida ea miyeenoadaanyi,

⁹ gwayeesha, “Haleanjeeni seaniin gaydagoonyi iibeadi ak gighadoawanyaan.”

¹⁰ Hean gwayeesha Yesu, “Ng'amwana hiji Shataani! aba gideaba geang'waar, ‘Ghadoawana Ng'utamiida was ASEATAANG'U ak gibwadi niny nea gaba geaw.’”

¹¹ Hean ghwanung'wa heeda meang'nyeandeenda ak ghapka malaykajeega ak gagadiiyeesa.

Yesu ghoang'eat gadiyeadaanyi aba Galilaya

¹² Hean nea ghwayiiy gideaba Yohana gwanda ghealooniga, gawa Galilaya;

¹³ ghabeawa Nasareti ak gawa goobiida Gapernaumu mida ghuuta basooda, mida ng'eanyiida Sabuloni ea Naftali,

¹⁴ ak abeeda gwasa ng'asheanda ghayi rugu sibaneeda siguura Isaya nea gwayi;

¹⁵ “Ng'eanyiida Sabuloni ea ng'eanyiida Naftali, Naweeda gal basooda, giigheawda Yordani, Galilayeeda Eemoojiga

¹⁶ fugiga ghayi abiita jeeda misaneedean nidaah weeshinda haw, Nea gea ghayi abiita ng'eanyiida ea jirooneeda miyeeda, ea niibwaay weeshinda.”

¹⁷ Ghang'eada damandida ghoang'eat Yesu rukwiideayda ng'asheega ASEETA nea gwayi, “Aduukuunana aba gideaba sugoocheanduumeeda humng'eeda nineekiit.”

Yesu gaguursa fih ang'wan lealu ghweayeega

¹⁸ Damanda neayeewa aba ghuuta basooda Galilaya, ghwadaah orju iyeenya bea ghaamwadagi, nea Simoneeda siguura Betaro gil ea orjeeda ghaamwat siguura Andreya, nea ghoabuuta gheareedanga nyaawa jeeda basooda; aba gideaba fuga lealu ghweayeega.

¹⁹ Gwayeesha, “Ayeani geeshteanyu ak gaydanung' ahuwa fuga jea gwalealu buuneeda.”

²⁰ Gwanung'usa heeda gheareedanga nyaawa aba geeshangiga ak ghwaat geeshta.

²¹ Gawa mwadi ak ghwadaah orju iyeenya bea ghaamwadagi, nea Yakobo gil orjeeda Sebedayo ea Yohana orjeeda ghaamwat, nea gwanda jeeda maleambooda sea Sebedayoyda was ghweanda nyaawa nea gwasin gheareedanga nyaawa, ak gaguursa.

²² Deagheata gwanung'usa heeda maleambooda ea ghweanda nyaawa ak ghwaat geeshta.

Yesu goonealshi nea gwarukwiida ng'asheanda ASEETA nea ghoahaap fuga miyeani

²³ Gwaneayeewa jeeda ng'eanyiida sean bea Galilaya, nea goonealshi aba jeeda ghoorajeega nyaawa siinealshacheewa, nea gwarukwiida giijasta miy bea sugoocheanduumeeda, nea ghoahaap geeyoonung'weaka sean ea sawanaduutka mideawa buuneeda.

²⁴ Gageawiit iitaanyi aba ng'eanyiisean bea Shaamu, geeyeassa fuga sean miyeani, bearji heeluutka geeyoonung'weaka ea gea mideawa sawanaduutka, ea gea bearji meangeenda, ea gea ahiili, ea gea abitu damealga, ak ghoahaap.

²⁵ Ghwaat geeshtaanyi eemeetuw leabu ng'eanyiida Galilaya ea Dekapoli ea Yerusalemu ea Yudeya ea giigheawda Yordani.