Mattayo 26 - Bibliyeeda Ghaydit

Geamwaal gichea eenuusta Yesu

¹ Iidu nea ghoahiit Yesu ng'asheesu seaniin gwayeesha giinealangaaschi,

² “Moanali gideaba iing'ata eawooji iyeenya abeeda gajea ghweelmeeda Basaaka gil, ak gajeatayda Orjeeda Siida eengoor.”

³ Aba damandida gabassa geat Ashoohoodiga hees ea gweargwa seamooda gheeh Gayafa nea ashoohoocheanda haw gil.

⁴ Gabaloola gichea ghoang'waayda Yesu aba seachta ak geenuus.

⁵ Iidu gwaneaji gideaba “Adeesinyi ng'asheanji eaweeda ghweelmeeda aba gideaba gajiidu ghwadaakghuyan eemeeda.”

Yesu geayeasha nagheeda aba Betaniya

⁶ Damanda mideewa Yesu gheeh Simoneeda siguura siida bearji udamusuura,

⁷ ghwahidu headaanyi gatmooni eatu gideeshteayda nyiit nagheeda ng'andit guuyi sakghwiilo biissa gaba sheayeeda haw, ghwahidu nea goobiitpiit gheata agiischooda, ak goodalealsa uhuuda nagheedida ng'andidiin.

⁸ Daah giinealanga ng'asheanji gwanyareesi, nea gwayi, “Darariini gaba naaha?

⁹ Nagheani gwachi iisishaayda gayghwanyas lapiyeeda saang'a jea eataw fuga barbari.”

¹⁰ Gwajeeng'u Yesu gidabaloola jeesinga nyaawa ak gwayeesha, “Ghwasaan anda gooteawiichi gatmooda? Niny gwasinnean ng'asheanda miy.

¹¹ Aba gideaba fuga barbari goondeaydooscheewi galeagasean, amaduuku aniini ea majeendeayeena galeagasean.

¹² Gatmooni goodalealsean nagheeda ng'andit aba gideaba gwasisinan aba bunyiteanyu.

¹³ Aba huumwa geayeeshiineegwa, heeda wassean aba muunda ng'eanyiida sirukwiideaysa Giijasi Miyiin, gili sin gatmooniin, gajeebaloola aba giipkeataanyi.”

Yuda ghamwas ghwala bwadaw Yesu

¹⁴ Muchu gawa Yudayda Iskariyote nea gaba jeedeaba giinealangiga atamaniyeenyean heeda ashoohoodiga hees.

¹⁵ Hita gwayeesha, “Gajagoonean naaha iyaalaapchi bwadaw niny ak geagoonyeegwa?” Geeyiitiisa geatinga shiliingaji diktam ea damanamughuush.

¹⁶ Ghang'eada damandida gagaseadayi gheata gichea ghwalaapta bwadaw.

Yesu ghwaak hamita Basaaka sea ginealangaaschi

¹⁷ Eaweeda madeeda nea miighwahidu ghweelmeeda mukaatajeega miigamatawiidi, gaweay giinealanga heeda Yesu ak gwayeesha, “Gigasayi eesineey hamita Basaaka aba yeenu?”

¹⁸ Gwayeesha niny, “Aweayeena mujiini gheapa sih ak gooyeeshi, ‘Gwayi Giinealshoocheanda, nigul damandeanyu ak geagasayi daak hamita Basaaka sea giinealangeasu aba jeedeaba gheang'u.’”

¹⁹ Gwasinda giinealanga ng'asheega gidarukusiinda Yesu ak ghoang'eat sinooda Basaaka.

²⁰ Was shing'ada goopteada Yesu sea giinealangaaschi atamaniyeenya nea gweagiischi.

²¹ Damani agiischeewean, gwayeesha, “Aba huumwa, geayeeshiineegwa, siyagi aba jeedeang'wa gayghwalaabwan bwadaw.”

²² Gagiisan giinealanga muuchi, ak gaba siisi anyaashta nea gwayeesha, “Siida aniini Ng'utamiida?”

²³ Ghwasha nea gwayeesha, “Siida jea dang'uta buurda sea niny nih siida jea ghwalaabwan bwadaw gil.

²⁴ Orjeeda siida gaygawa, gawuurji gidaghayi sing'oorsiinda, amadu ea dashageada siidida jea ghwala bwadaw Orjeeda Siidean! Siisi ghang'wana gwachi ea meeji.”

²⁵ Gwayeesha Yudayda jea ghwala bwadaw, “Rabi, aniini ghanea?” Gwayeesha niny, “Girgu ang'iing'i.”

Hamita Ng'utamiida

²⁶ Damanda agiischooda gageanu Yesu mukaate ak gang'usha, ak ghabwanach, ak ghoadaw giinealangaaschi nea gwayeesha, “Oang'waanya ak ghoayaaji, nih saseedeanyu gil.”

²⁷ Ng'ata gageanu gikoombe, ak gabadiischeesa, ak ghoadaw nea gwayeesha, “Aleayda bayoogi oogasean.

²⁸ Aba gideaba suh foojeandeanyu bea neajeeda gil, ak geahiida aba badahuuka fuga saang'a aba geandeayda riing'eeda.

²⁹ Gaydayeeshiineegwa maygudu dabiikta dali gicha difaayeeda sabiibu ea eaghus dabiikta dali gicha gea eashish sea agooga aba jeeda sugoocheanduumeeda Bwaabwa.”

³⁰ Iing'ata sarmeeda duumda, ghang'eatng'eat gaweay uhuuda giijeeda saytuunajeega.

Yesu gabean gwarugu sheang'da Betaro

³¹ Gwayeesha Yesu saawa, “Eaweani bea ghamneawean gajastaan oogasean aba gideaba geang'waar, ‘Gaydabwar jeagiischoocheanda, ak gayghwadarda hawanda gisilga.’

³² Iimuchu nea ghang'ata duunoodeanyu gaydeasheedeawaneegwa dawa Galilaya.”

³³ Ghwasha Betaro nea gwayeesha niny, “Eara ghamwachmwachnyi buuneeda ak gwanung'useey heeda, aniini maydanung'useey heeda earahay.”

³⁴ Gwayeesha Yesu niny, “Aba huumwa geayeeshiineey eaweani bea ghamneawean heeda mii googuuleewa nghaghooda, gajea nishaang'nyaan niba samwagu.”

³⁵ Gwayeesha Betaro, “Eara ghoah miyeeda eemeewdeayeena maydashaang'nyi earahay.” Ghwanyaashtunu giinealanga sean.

Yesu ghamwaash ASEETA aba Getsemani

³⁶ Iidu goodeayi Yesu ea saawa jeeda madamnyeanda mwanang' siguura Getsemani, ama ng'ata gwayeesha giinealangaaschi, “Oopiitpiida aba hiji dawa hoowa damwaash ASEETA.”

³⁷ Ghwaat Betaro sea orju iyeenya bea Sebedayo, ak ghang'ut giiseaneega ea gwadeawiit.

³⁸ Miighoah gil gwayeesha, “Guroroodeanyu ea giisaneat muuchi ea ghwariikghta dami, Oopiitpiida aba hiji nea ghoang'wearu sea aniini.”

³⁹ Hean gawa mwadi gilimwanang' ak gwatkuy ak gakula gheamamdaanyi ng'eanyi ak ghamwaash ASEETA nea, gwayi, “Ea Bwaabwa, iimuusi ginung' ghwasajaadawanaan bayoogi, ea adaghoah gida eagasiidi aniini, nung' ghoah gidigasiidi ang'iing'i.”

⁴⁰ Ghang'eat gawa heeda giinealanga ak ghwahita nea nilil. Gwayeesha Betaro, “Heapi miimuusi gideaba gajang'wearni eara jeemba aseedeanagi eesa aniini?

⁴¹ Oang'wearni nea ghoamwaashchi ASEETA ea moapiitani jeeda simsimda; guroorooda ghwanyawa gagasa, amadu ea ng'arng'ar saseeda.”

⁴² Gabiikta deabiyeenya ak ghamwaash ASEETA nea gwayi, “Ea Bwaabwa, iimay ghwasajaadawanaan bayoogi ea eeghus daleayda nung'waada gwasa gidigasiidi ang'iing'i.”

⁴³ Gabiikta gicha heeda giinealanga ak ghwahita nea nilil aba gideaba nidurmaniidi gheanyanga nyaawa aba ruweanga.

⁴⁴ Gabiikta gwanung'usa heeda ak gawa ghamwaash ASEETA deaba samwagu nea gwarugu ng'asheega gwachi.

⁴⁵ Ng'ata gabiigu heeda giinealangaaschi ak gwayeesha, “Abisiina alila nea goofuufchi? Adaaha nihidu damanda ak Orjeeda Siida gajeayiin geatinga fuga riing'eega.

⁴⁶ Ang'eatng'eada, eeweaya; oang'wearda siida jea ghwalaabwan bwadaw nukwa nineekiit.”

Ging'ooyda Yesu

⁴⁷ Damanda duu gwandeawa hoowa nea gabalool ghwahidu Yuda nea gaba jeedeaba giinealangiga atamaniyeenyean, nea goodeanyi sea eemeeda mideawa ng'utkeaka ea gulupkeaka nea goojeagu ashoohoodiga hees ea gweargwa.

⁴⁸ Iidu siidida jea ghwala bwadaw Yesuun abeeda ea nigeawiit ghoadaw gwadeagooda nea gwayeesha, “Siidida jea dasamiin ajeeng'ni gideaba niny gil, abeeda ghoang'waanyi.”

⁴⁹ Hean gwaneekiisa Yuda Yesu ak gwayeesha, “Seayu Siida haw!” Amwahit ghwasam.

⁵⁰ Gwayeesha Yesu niny, “Ea orjeeda siida eaduupcheewi, ghwasaan anda gindi hiji?” Ng'ata ghwahidu fugiga ak ghoang'waay Yesu.

⁵¹ Gageanu orjeanagi aba jeedeaba orjoogiga gwachi mideawa Yesuun, ak ghoahaakta geadi ak gafagu ng'utaanyi, ak ghwalas soomjeandida bea ashoohoocheanda hawiin, ak ghwalach iita.

⁵² Gwayeesha Yesu niny, “Adealda ng'utaang'u jeeda labaldaanyi, aba gideaba siida bwarda ng'uta, eara niny gajeabwara ng'uta.

⁵³ Moanali gideaba gwachi ghaamuuschi damus Bwaabwa ea mii ghoah gil gaygoojeagu lugooda saang'a bea malaykajeega?

⁵⁴ Abeeda gaygwasamwataan Ng'ooruutka ayi nih gidamiisa ghoawda baloolda gil?”

⁵⁵ Damandida gwayeesha Yesu eemeeda, “Asi agooga ghoapkaanyi oang'waanyaan nea gooyeadu ng'utkeaka ea gulupkeaka ghoanung' dawuurji mareanghweanda? Eawoojisu geabiiti gheeda sibata ASEETA nea geanealshi ak ea moong'oanyean!

⁵⁶ Ghamneawa ea nisa ng'asheesu seaniin gwasa Ng'ooruutka ghayi bea sibaneeda.” Iidu gwanung'usa heeda giinealanga ak gwasalda.

Yesu aba madeeda girgweageeda

⁵⁷ Hean gageanu fuga gwachi ang'waay Yesu ak ghwaat gheeh Gayafeeda was ashoohoocheanda haw, nea nibatiisa geat ng'oorshoodiga ea gweargwa.

⁵⁸ Ghwaat geeshta Betaro nea gameaji ea sheagi ea ghwahita seamooda gheeda ashoohoocheanda haw, gaweay jeeda gheeda nea goodeayi furiischoodiga nea gagasa ghwadaah gichea eesin.

⁵⁹ Hean gagasa Ashoohoodiga hees ea gweargwa sean bea gheeda girgweageeda ng'asheanda ng'uyyeega jea eemuuwu aba badayda Yesu jea iidu eenuuksa,

⁶⁰ iidu ea mudu ghwanyas ng'asheanda jea eenoas earapeadi buwa mushoodiga saang'a bea ng'uyyeega. Hean iidu aba huuydeanda ghwahidu fih iyeenya

⁶¹ ak gwayeesha, “Siisi ghayi gwayi, ‘Ghaamuuschi danyarja gheawi Sibata ASEETEAN ak geabiikti dadeas gicha aba askwearjooji samwagu.’”

⁶² Ghang'eat Ashoohoocheanda haw ak ghoanyaash, “Heapi mwayshaaha eara ng'ashaan? Fiisu gamuuwu naaha aba badaydaang'u?”

⁶³ Ghwasiinda Yesu. Gwayeesha Ashoohoocheanda haw, “Eaniyean aksiina ASEETA majeek habeawooda rukuneasa ang'iing'i ea guwoosi Gristo, Orjeeda ASEETA.”

⁶⁴ Gwayeesha Yesu niny, “Girgu ang'iing'i. Asi gaydayeeshiineegwa, ghang'eada ghamneawa gajadaaha Orjeeda Siida nea goopteada aba meatkweeda geatinda dugwa hoauur, nea ghoana badayda shamooghuutka humng'eeda.”

⁶⁵ Aba damani ghabwaashaada ashoohoocheanda haw hang'weakaaschi ak gwayi, “Niing'eawi ASEETA. Gudeegassa mushooduspwa naaha gicha? Asi ghamneawa nukwa siyiinyi giing'weakaaschi.

⁶⁶ Gooyeenyiin agooga aba girgweageedeang'wa?” Ghwasha saawa nea gwayeesha, “Gammiisa gideaba gajeenuus.”

⁶⁷ Hean geeng'uriisa ng'usheega gheamamdaanyi, nea geabwar diigeanga; nea suurja gagul,

⁶⁸ nea gwayeesha, “Ea Gristo! heapi daaha ea jea nala siida lasnyi?”

Betaro ghwashaang' Yesu

⁶⁹ Aba damandida Betaro goopteada aba seamooda. Hean gaweesa hudagi bea gadiyeeda ak gwayeesha, “Eara ang'iing'i gindeaydooscheewi Yesuheeda Galilaya.”

⁷⁰ Ghwashaang' Betaro aba madeeda buuneeda nea gwayeesha, “Aniini mwaanali eara gidirgu.”

⁷¹ Iidu nea gwariteawa gidaghuuta gabiikta ghwadaah hut nuut bea gadiyeeda ak gwayeesha, fuga ghwanyawa mida hoowa, “Siisi gwachi gwandeayi sea Yesuheeda Nasareti.”

⁷² Gabiikta ghwashaang' Betaro nea ghwaak habeawooda nea gwayeesha, “Aniini siisi mwaanali.”

⁷³ Ng'ata gheadi nuwaas gaweay fuga gwachi mida hoowa heeda Betaro ak gwayeesha, “Aba huumwa eara ang'iing'i guwoosi siyagi aba jeedeaba fugiga aba gideaba ghoahiimu baloaldaang'u.”

⁷⁴ Damani ghamwaashta geaw Betaro nea ghwaak habeawooda nea gwayeesha, “Aniini siisi mwaanali.” Deagheata googuul nghaghooda.

⁷⁵ Hean ghoapkaat Betaro ng'asheega heeta rukusa Yesu, bea gideaba, “Damanda miigooguula nghaghooda gajea nishaang'nyaan niba samwagu.” Gwarita jarooda ak gooyeawda.