Mattayo 17 - Bibliyeeda Ghaydit

Yesu ghwayamwa oormeeda

¹ Iing'ata eawooji lah ghwaat Yesu Betaro ea Yakobo ea orjeeda ghaamwat siguura Yohana, ak goodeayi uhuuda giijeeda heeda geaw.

² Ghwayamwa oormeadaanyi aba madeanyaawa, ghameang'meang' gheamamdaanyi ea gawuurji aseeta, nea gaweeriidi hang'weakaaschi ea ghawaar weeshinda.

³ Hean gwardu Musa ea Eliya, ak gabalool sea niny.

⁴ Ng'ata gwayeesha Betaro Yesu, “Ng'utamiida aamiy gideaba aseasa gajeepiidana hiji; iigasayi gaydasin aba hiji udahabeaschooji samwagu, akaleala daang'u gil nea niirja gaba Musa, nea niirja gaba Eliya.”

⁵ Damani duu gabaloolean deagheata ghwahidu shamooghooda eesh ak gwadukuta, ak ghwanyaasha ghuuta jeeda shamooghooda nea gwayi, “Nih Orjeedeanyu aabwariinyi ahoosanani, ooleeysiina iit niny.”

⁶ Iiy giinealanga ng'asheesu goobeedeayi ak ghabwada jeesinga ng'eanyi, nea ghabeal muuchi.

⁷ Gawa Yesu ak ghawaas aba geatindaanyi nea gwayeesha, “Ang'eatng'eada, nea adoabeali.”

⁸ Gatgat gheanyanga nyaawa, ea mwadaaha sih geaghus Yesu nea gaba geaw.

⁹ Iidu nea ghwararang'aana giijeeda, gwayeesha Yesu, “Adiidu goorukusi eara sih iiteaba ng'asheesu oadaayiin ea eaghus ea niduuna Orjeeda Siida jeeda miyeeda.”

¹⁰ Ak ghoanyaash giinealanga, “Anda gwayi ng'oorshoodiga geaghus ghanyi goosheeda ghwaan Eliya?”

¹¹ Ghwasha nea gwayeesha, “Eliya gaygoosheeda ghwaan, ak gwasisin haleanjeeda sean;

¹² ak geayeeshiineegwa, Eliya nigeawiit ghwaan ak ea meanala, ak geesima haleanjeeda sean gasa saawa. Gwasunu eara Orjeeda Siida gaygawa ak gajeesawan aba geatinga nyaawa.”

¹³ Ghwanal giinealanga gideaba gabaloola ng'asheega Yohaneeda Abaatiisachi.

Yesu ghoahaap orjeeda bearji meangeenda

¹⁴ Iidu nea ghwahita heeda eemeeda, gawa Siyagi headaanyi, ak gwatkuy aba madeadaanyi ak gwayeesha,

¹⁵ “Ng'utamiida, eaniyean bwayda orjeedeanyu, aba gideaba goohiili, nea iissa gwasawana muuchi; niny iimiisean gang'adeesa jeeda beasta, ghana galanya jeeda beega.

¹⁶ Muchu geayeadu heeda giinealangaagu ak ghwaraay ghoahaap.”

¹⁷ Ghwalamda Yesu nea gwayeesha, “Ea seaygeeda mandeawana masaweega biissa ea roodeadi, gajeendeaydooscheena ea ghoah eeju? Agooga gaydamilikiidaneegwa ea ghoah eeju? Ayeani heedeanyu.”

¹⁸ Ng'ata goojuursa Yesu niny, ak gwariteaysa meangeenda, ak ghahaap orjeeda aba geeshangiga.

¹⁹ Iidu ghoahuudaada giinealanga ea gaweay heeda Yesu, ak gwayeesha, “Anda aseasa gearaanyi eeruuta?”

²⁰ Gwayeesha Yesu, “Gwasin gheashooyda masaweegeagwa. Geayeeshiineegwa aba huumwa, inyeeda goondeawi masaweega deena ghajiileanda haradaali, gajoamuusa ayeeshiina giijeeni, ‘Loadadawana hiji ak guwi hoowa,’ ak gaygawa, ak ghanyi ea manda ng'asheanda hang'waay majoamuusa sinooda.”

²¹

Yesu gabiikta gabaloola ng'asheega miyeadaanyi

²² Damanda mideayeewa sean aba Galilaya gwayeesha Yesu saawa, “Orjeeda Siida gaygawa ak geayiin geatinga buuneeda,

²³ ak gaygwanuus, ama eaweeteaba samwagu gaygwaduudu.” Hean gagiisan giinealanga muuchi.

Giidaydeayda gwaadeeda gheeda sibata ASEETA

²⁴ Hita Gapernaumu, gaweay heeda Betaro fuga ang'oonyi gwaadeeda mwahita shekeeli ak gwayeesha, “Heapi! Giinealshoocheandeang'wa goodayiida gwaadi?”

²⁵ Gwayeesha, “Ea goodayiida.” Iidu nea nihita ghoah, goosheeda Yesu ghoanyaash niny nea gwayeesha, “Simon, iing'ulayi ang'iing'i gawuurjiin? Sugoodiga muunda ng'eanyiida goong'oonyi gujaweeda ghana gwaadi aba hichpa ana fih? Aba heeda orjooga nyaawa ghana hichpa fih suuk?”

²⁶ Eesha, “Hichpa fih suuk.” Gwayeesha Yesu niny, “Asi iisunu abeeda gaygoobal geat orjooga.

²⁷ Ama abeeda iimajeanyareasa, guwi jeeda basooda ak giibuuti sidageeda ghwarja ghaang' siing'oonya ghweayeega ak gigeanu ghweayeanda madeeda jea eang'waay ak gijaadi ghuuta, ak gaynyasana shekeeli; gigeanu ak giidawi heedeanyu ea headaang'u.”