Mattayo 16 - Bibliyeeda Ghaydit

Gassooda ng'asheega deamdeameadi

¹ Gaweay heeda Farisaayajeega ea Sadukayajeega ak gwasimsim nea gamus gideaba, eadaaha gwadeagooda leabu humng'eeda.

² Ghwasha nea gwayeesha saawa, “Iissa iihita shing'ada gooyeenyi, ‘Jeameeda numuji gajea miy aba gideaba humng'eeda ea areara.’

³ Iighar gayeew iissa gooyeenyi, ‘Askweareani gaygwarukusa, aba gideaba humng'eeda ea areara nea ghwanung' eabeal.’ Ghoamuuschi anala damanyoojiga iyoong'ulayi humng'eeda, nea moamuusi anala gwadeagwajeega damanyoojiga.

⁴ Seaygeeda munyas mealuuleadi ak gagasa gwadeagooda, ak ea mwajeataw geaghus gwadeagooda ghayi bea Yona.” Ng'ata ghwanung'wa heeda ak ghang'eat gawa.

Gidamwataw bea Farisaayajeega ea Sadukayajeega

⁵ Gaweay giinealanga ea ghwahita giigheawda, nea niroosa eadita mukaatajeega.

⁶ Gwayeesha Yesu, “Ang'ula nea gooshageachi geat aba gidamwataw bea Farisaayajeega ea dea Sadukayajeega.”

⁷ Gwasheang'nyi saawa nea gabwa geat, nea gwayi, “Miyeeyeana mukaatajeega.”

⁸ Gwajeeng'u Yesu gidabaloola saawa ak gwayeesha, “Ghwasaan anda agooga goosheang'nyi sea fuga manang'i masawi, aba gideaba moondeawani mukaatajeega?

⁹ Mii anala eara ghamneawa? Moapkaadi eara mukaatajeegiga amuut aba fugiga as sagalamnyooji muudiin, ak gooweamsi gheaptanga sooscheew hada?

¹⁰ Ghana mukaatajeegiga asispwa silakiisa fugiga asagalamaji ang'waniin, heapi ghoawaamnyi sooscheew hada nyiit gheaptanga?

¹¹ Gayghoawataan ea moapkaadi gideaba meabaloolani ng'asheega mukaatajeega? Asi ashageada geat aba gidamwataw bea Farisaayajeega ea Sadukayajeega.”

¹² Gwajeeng'u gideaba gwachi mabaloolana gideaba mayeeshiina ashageada geat aba gidamwataw, gabaloola giinealshooda Farisaayajeega ea Sadukayajeega.

Betaro goodeaga geaw Yesu

¹³ Muchu nea gawa Yesu ng'eanyiida Gaysariyayda Filipi, ghoanyaash giinealangaaschi nea gwayeesha, “Buuneeda gwayeena Orjeeda Siida ng'eaha?”

¹⁴ Geeyeesha, “Buuneeda mwaatkwa gwayeena Yohaneeda Abaatiisachi, suurja gwayeena Eliya, suurja gwayeena Yeremiya ghanea siyagi gil aba jeeda sibanga.”

¹⁵ Gwayeesha, “Ama agooga gooyeenayi aniini geewooschi ng'eaha?”

¹⁶ Ghwasha Simoneeda was Betaro nea gwayeesha, “Ang'iing'i guwoosi Gristo, Orjeeda ASEETA majeek.”

¹⁷ Ghwasha Yesu nea gwayeesha niny, “Ging'wani ang'iing'i, Simoneeda Bar-Yona! Aba gideaba ng'asheanji moadaajiida saseeda ea foojeanda nih ghoahiimneey Bwaabeeda mida humng'eeda.

¹⁸ Ak geayeeshiineey, ang'iing'i guwoosi Betaro, ak badaydeaba lagheaneani gaydadeeksa ganiiseedeanyu, ak eara uurda miyeeda ea mayghoamu ghwajoar.

¹⁹ Ak aniini gaydagoonyi gichea atinana sugoocheanduumeeda humng'eeda, ak gidiradi aba hiji bea muunda ng'eanyiidean abeeda gajea sirat aba hoowa bea humng'eedean, ak gida wassean iitini aba hiji bea muunda ng'eanyiidean abeeda gajeetin aba hoowa bea humng'eedean.”

²⁰ Iing'ata ghaweada muuchi giinealangaaschi ea marukusiina siida wassean gideaba niny Gristohi.

Yesu gabaloola iita sawanadeadaanyi ea miyeeda

²¹ Ghang'eada damandida gwarukusa Yesu giinealangaaschi gideaba gammiisa beata jea gawa Yerusalemu, ak aba hoowa gayghwanyas sawanadeeda haw aba heeda gweargwa ea ashoohoodiga hees ea ng'oorshoodiga, ak geenuus, ama eaweeteaba samwagu gwaduudu.

²² Ghwaat Betaro ea gameaji gwadilda ak goojuursa nea gwayeesha, “Mwayiinya ASEETA, Ng'utamiida! Ng'asheesu mayghwanyasnyi.”

²³ Gwayamsa geaw ak gwayeesha, Betaro, “Una badaydeanyu shataani! Adiruusean; aba gideaba mindani meatkweeda ASEETA, gindi dea buuneeda.”

²⁴ Damandida gwayeesha Yesu giinealangaaschi, “Siida wassean iigasa gweadu geeshteanyu ea dafoola geaw ak ghwasar beehiidaanyi ak gweadu geeshteanyu.

²⁵ Aba gideaba siida gasa ghoaghu eaweagaaschi gaygahuteawi, nea siida huteawi eaweagaaschi aba badaydeanyu, gayghwadaah.

²⁶ Ama siida gaygwaloosa naaha iinyas haleanjeeda sean bea muunda ng'eanyiida, amadu gahuteawi eaweagaaschi? Ghana siida gayghoadayda naaha ak ghoaghiisa eaweagaaschi?

²⁷ Aba gideaba Orjeeda Siida gayghoana giigheambiita Ghwaan nea goodeana malaykajeega ak abeeda gayghoadaw gilinyoo ea sihi gidageatindaanyi aba sinaweagaaschi.

²⁸ Aba huumwa geayeeshiineegwa, gwanda hiji bea jeedeang'wean fuga maygameewa, ea eaghus ea nidaah Orjeeda Siida nea ghoana jeeda sugoocheanduumeadaanyi.”