Marko 10 - Bibliyeeda Ghaydit

Nung'wiischooda

¹ Hean ghabeawa Yesu hoowa ak gawa ng'eanyiida Yudeya, ea ghwahita giigheawda eenda Yordani. Gooreemsa eemeetuw headaanyi gicha. Hean gabiissa gooneali buuneeda ng'asheega gicha gawuurji gida eawoojisu sina.

² Ng'ata gaweay fuga Farisaayo heeda Yesu ak gwasim nea gwayeesha, “Heapi ghwadoabiiwi gideaba gayghwanung' siida gatmoadaanyi?”

³ Gwayeesha Yesu saawa, “Deaweedeeda ghayi gooneegwa Musa aneeda gil?”

⁴ Gwayeesha Saawa niny, “Musa ada ghayi gagoaneasa gheata nea gwayi siida dang'waara barawajeanda jea ghwanung'wa gatmoadaanyi.”

⁵ Gwayeesha Yesu saawa, “Musa niny ghayi gagooneegwa gheadi nea gweagu hang'ooynacheeka jeesingeagwa.

⁶ Nea aba gidaghayi sibwata ng'eanyiida, gwasin ‘ASEETA ng'eedeeda ea gatmooda.’

⁷ ‘Asi aba deascheani Siida gaygwaheeli ghwaan ea ghaamwat ak gaygoodeayi sea gatmoadaanyi,

⁸ Fiisu asiyeenyean gayghoah siyagi.’ Asi fiisu mudea fih iyeenya gil niiw siyagi.

⁹ Asi fuga niroochi ASEETA adagooheeli sih.”

¹⁰ Iidu nea gabiikta gicha gah ghoanyaash giinealanga iiteaba ng'asheanji.

¹¹ Ghwalamda niny ak gwayeesha, “Siida nung'usa heeda gatmoadaanyi ak ghaghi nuut goodiiysa gatmoadaanyi aba mealuuleega.

¹² Gwasunu eara Gatmooda nung'wa heeda siyeadaanyi ak gawa gheemba siinuut gatmooni gamealuul.”

Yesu ghoadaw diibiga manang'i ghawooda

¹³ Muchu gweadu buuneeda diibiga manang'i heeda Yesu ghoang'waay iheenga, ak goowoowsa giinealanga buuneeda.

¹⁴ Daah Yesu gissin ginealangaaschi gwanyareeksa ak gwayeesha, “Anung'waada diibiga ghapka heedeanyu adoakghuumnyi, aba gideaba Gheambalmeeda ASEETA gammiisa fuga uurji suh.

¹⁵ Aba huumwa Gearukuneegwa gideaba siida mamwasta ng'asheega ASEETA baleanda mwanang' siisi maygawa jeedeaba Gheambalmeani.”

¹⁶ Iidu Ghwadeapta diibiga ak gabeashsa geatingaaschi ak ghoang'waanyaada iheenga, ak ghoadawaada ghawooda.

Siida was meanang'ocheanda

¹⁷ Ng'eat Yesu nea gaygawa bareanyeakaaschi, gafaju sih ama hidu gwatkuy aba madeadaanyi ak gwayeesha, “Ea Giinealshoocheanda waam, ak gaydasin naaha iijeadanyas eaweega manda muudeanooda?”

¹⁸ Gwayeesha Yesu, “Ghwasaan inyas giguureewean siida Waam? Siida waam geaghus ASEETA.

¹⁹ Digheanyeeka ginali, ‘Adimealuuli, adinuusi siida, adijagwadiischi, adinabayi ng'uyeega, adireenganayi siida, sisiina mureeda gweanu ea geamadu.’”

²⁰ Gwayeesha Siidida, “Ea Giinealshoocheanda, diigheanyeeksu miighanyi danaawa eara ghayi aba jeepcheanduumeedeanyu.”

²¹ Hean goong'weersa Yesu siidida nea nibwariiy ak gwayeesha, “Ghwashoadeaweey gilagi, una ak gishaaydi haleanjeadaang'u indeawi sean amahit gigeanu lapiyeedida ak giidawaadi fuga barbari. Abeeda gaynyasa baruureega aba humng'eeda. Hit ginyuunyi eani geeshteanyu.”

²² Iiy Siidida ng'asheanji gafu duwunda ak ghang'eat gawa nea nigiisan, nea gwasin gideaba abeeda siidida meanang'ocheanda gil.

²³ Ghwasach ghaat Yesu gang'ula ginealangaaschi ak gwayeesha, “Ghamneawa ghoanali gidahang'waayda beata jea gaweay meanang'oodiga jeeda Gheambalmeeda ASEETA!”

²⁴ Iiy giinealanga ng'asheanji ghahamng'eanyi. Nea Yesu niny gabiikta ak gwayeesha, “Ea diibigeasu ghamneawa ghoanali gidahang'waayda beata jeeda Gheambalmeeda ASEETA.

²⁵ Beata jea gawa meanang'ocheanda jeeda Gheambalmeeda ASEETA ahang'waay ea ghang'wana eara beata jea gwasik ngamiya gheang'da sidageeda.”

²⁶ Aba deascheani ghahamng'eanyi giinealanga muuchi. Goonyeari geat nea gwayi, “Abeeda iisunu gwanda siichea ghaghu?”

²⁷ Gwayeesha Yesu saawa nea gang'ula gheanyanga nyaawa, “Huumwa gil aba siida mwadaagha ng'asheanji maygwaroochi. Nea aba ASEETA nih ea miigili. ASEETA manda gichea gwadilna.”

²⁸ Ghwalamda Betaro ak gwayeesha, “Ama aseasa? Ang'wearda sinung'wi heeda haleanjeedeanya sean ak geeyeadu geashtaang'u!”

²⁹ Ghwalamda Yesu ak gwayeesha, “Aba huumwa geayeeshiineegwa, Siida wassean nung'usa heeda gheeda, ghana orjooga ghaamwat ghana haweega ghaamwat, ghana ghaamwat, ghana ghwaan, ghana diibiga, ghana madameega aba badaydeanyu ea Giijasta miy,

³⁰ aba damani bea ghamneawean, gajeataw niba bughala, ea ghwanaawa damani bea ghamneawean gheeda, ea orjooga ghaamwat, haweega ghaamwat, ghaamwat, diibiga, ea madameega ea sawanadeeda ama damanda jea ghwahidu gayghwanyas eaweega manda muudeanooda.

³¹ Amadu fuga saang'a mida madeedeaba suurja, gaygahuydeana sean. Nea fuga saang'a huuydeanayi, iimuchu gayghoah fugeaba mwadi.”

Yesu gabiikta deaba samwagu gabaloola miyeeda ea duunoadaanyi

³² Abeeda nea gwanda naweeda Yesu sea ginealangaaschi nea gagal Yerusalemu, nea abeeda goosheedeawa Yesu saawa. Ghang'ut ginealangaaschi muuwda nea eara fuga aat geeshta ea ning'ut muuwda. Ghwasach Yesu gicha fugiga atamaniyeenya was giinealangaaschiin, ak gabiissa gwarukusa ng'asheega jea ghwanyas.

³³ Gwayeesha, “Heapi oaleaydiit! Ghamneawa Geeweayi Yerusalemu. Nea aba hoowa Orjeeda Siida gajeayiin geatinga ashoohoodiga hees ea giinealshoodiga diineeda Yahudi. Fiisu gayghoahaakta eenuus ak geayiin geatinga fuga eemoojiga.

³⁴ Ak gaygwajuuga, nea goong'uriisa ng'usheega nea geabwar aba mughoowooda ak gwanuus. Amadu eaweeteaba samwagu gaygwaduudu.”

Gidamus Yakobo ea Yohana

³⁵ Hean gaweay geaba Yakobo ea Yohana was orjooga Sebedayo ama hita heeda Yesu gwayeesha, “Ea Giinealshoocheanda, gwanda gili sigasayi eemuseey.”

³⁶ Ghwalamda Yesu ak gwayeesha, “Googasayi dasinneegwa naaha?”

³⁷ Ghwalamda Saawa ak gwayeesha, “Eaniyean nung' goobiida siyagi meatkweadaang'u bea geatinda dugwa, nea goobiida niirja meatkweadaang'u bea geatinda ghaadaam eaweeda siikghaambiidaneey.”

³⁸ Ghwalamda Yesu ak gwayeesha, “Agooga eara gidaghamneawa oomuschi moanali! Heapi ghoamuuschi aleayda bayookteanyu bea sawanadeeda? Ama giibaatiisandida jea eebaatiisanan aniini agooga gajeepaatiisaneegwa?”

³⁹ Gwayeesha Saawa Yesu, “Ea geamuuschi.” Gwayeesha Yesu, “Huumwa gil gikoombeeyda jea daleayda eara agooga ghoamuuschi gideaba gajaleayda Eara giibaatiisandida jea eebaatiisananiin gajeepaatiisananeegwa eara agooga.

⁴⁰ Ak gajea ng'eaha siida jea goobiida meatkweedeanyu bea geatinda dugwa, ghana meatkweedeanyu bea geatinda ghaadaam. Nih mii gadiyeedeanyu jea dasin gil, geaghus eataw fuga ghayi bay gwararsa ASEETA.”

⁴¹ Iiy giinealanga suurja atamanamughuush gwanyareesi iidaah gissin Yakobo ea Yohana.

⁴² Gaguursa Yesu ak gwayeesha, “Ghoanali gideaba fugiga sighay gili sugoodiga eemoojigean iissa ghoahaaghwiida fuga nyaawa uurda, nea fiisu heesiin iissa goombal fuga nyaawa gharbeeda.

⁴³ Duuku agooga ea mii gichea awuurjeewana. Aba siida gasa hawunda aba jeedeang'wa doawa siideang'wa bea gadiyeeda.

⁴⁴ Siida gasa ghang'ata mwadi gayghoah soomjeanda buuneesean.

⁴⁵ Aba gideaba Orjeeda Siida ghayi moani eegadiyeesa. Ghayi ghoan niny gagadiiyeesa buuneeda nea ghoan gabeagu eaweagaaschi aba giitinooda fuga saang'a.”

Yesu ghoahaap siida ng'oaw siguura Bartimayo

⁴⁶ Geahita mujiineeda Yeriko, iidu ghang'eat Yesu sea ginealangaaschi ghabeawa hoowa nea goodeayi eemeetuw. Geanyasa gheata naweeda siisi ng'oaw musiisachi siguura Bartimayo was orjeeda Dimayo.

⁴⁷ Hean iiy gideaba ghang'ata Yesuheedida leabu Nasaretiin gabiissa Goojuur nea gwayeesha, “Ea Yesu, Orjeeda Dawdi, eaniyean bwaydanaan!”

⁴⁸ Goojuursa fugiga saang'aan nea geeyeesha, siinda, sirukusa ghoaraanya giijuureanda muuchi nea gwayeesha, “Ea Orjeeda Dawdi, eaniyean bwaydanaan.”

⁴⁹ Hean gawus Yesu ghamiinaada ak gwayeesha buuneeda, “Aguursiina.” Hean geeguursa siidida ng'oawiin nea geeyeesha, “Amiini uhuudaang'u ng'eada ak guwi gaguuru.”

⁵⁰ Gwajaksa ng'eanyi hang'daanyi. Gootkweal ak gawa heeda Yesu.

⁵¹ Ghoanyaash Yesu nea gwayeesha, “Gigasayi dasineey naaha?” Gwayeesha siidida ng'oawiin, “Ea Giinealshoocheanda, aniini geagasayi dabiikta daang'wearda.”

⁵² Ghwalamda Yesu ak gwayeesha, “Una, ang'iing'i niihaapnyi masaweagaagu.” Miighoah gil gabiikta gicha Siidida ng'oawiin ghoang'wearda ghang'eat ak ghoang'waay naweeda ghwaat geeshta Yesu.