Marko 1 - Bibliyeeda Ghaydit

Girukwiida Yohaneeda abaatiisachi

¹ Nih gidang'eata Giijasta Miy bea Yesu Gristohi was Orjeeda ASEETA.

² Gawuurji gissing'oarda aba jeeda gitaabooda sibaneeda siguura Isaya gideaba, Gwayi ASEETA, “Ng'ula gaydeajeagu giijasoocheanji iteanyu jea goosheedeawaneey, ak gayghoah Siichea gwasinney naweadaang'u.

³ Gwanda Siisi nyeara ghuuta jeeda dareapcheeda: Asisiina Ng'utamiida naweeda ooleapa naweadingaaschi–”

⁴ Yohaneeda Abaatiisachi geedeaksa jeeda dareapcheeda nea gwarukwiisa buuneeda gideaba aduukuunana ng'asheega munyas ak geepaatiisan ak gwasamsa ASEETA riing'eega nyaawa.

⁵ Gooreemsa Yohana Eemeetuw leabu ng'eanyiisean bea Yudeya ea ghoah fuga Yerusalemooda sean, ak geepaatiisan aba jeedeenda Yordani, nea gwaduukuuna riing'eega nyaawa.

⁶ Abeeda Yohana gookweali eaghwada sisna buudeega ngamiya nea gwaratiisa manandaanyi ghealooda, nea hamitaanyi ea deashamga gil ea maleeda dareabeeta.

⁷ Gwarukwiida Yohana ng'asheega nea gwayeeniisa, “Gwanda siichea ghwahidu jea ghwaduupnanaan geash. Siisi gaburdeawean uurda eara ak aniini ea mamiisean dahiiy geaw deatineada deanga geakaaschi.

⁸ Aniini geabaatiisananeegwa beega, Niny gaygoobaatiisananeegwa Guroorooda Ghaydit.”

Giibaatiisanda ea gissimsimda Yesu

⁹ Damandida ghwahidu Yesu nea gwaleabu Nasareteeda Galilaya, ak goobaatiisan Yohana aba jeedeenda Yordani.

¹⁰ Siyeeng'na jeedeenda deagheata ghwadaah nea ghwajaada bugusta humng'eeda ak gwashuubeesa Guroorooda Ghaydit nea gawuurji ghariibajeanda.

¹¹ Ghwanya ghuuta nyaasha humng'eeda nea gwayi, “Ang'iing'i guwoosi Orjeedeanyu aabwariinyi; gwadan jeedeanyu.”

¹² Miighoah gil ghwaat Guroorooda ea ghoahiita dareapcheeda.

¹³ Goobiida hoowa askwearjooji haradam nea gwasimsim Shataani. Abeeda aba hoowa gwandeaydooschi diyeanga jarooda, nea ghaweadaada giijasoodiga humng'eeda.

Yesu gaguursa fih ang'wan lealu ghweayeega

¹⁴ Iidu nea sijaksa Yohana ghealooniga gawa Yesu ng'eanyiida Galilaya, nea gwarukwiida Giijasta Miy bea ASEETA

¹⁵ nea gwayeeniisa, “Nigul damanda, nea gheambalmeeda ASEETA ea nineekiit, Aduukuunana riing'eega ak ghoamwaschi Giijasta Miy.”

¹⁶ Iidu nea gwasik ghuuta basooda Galilaya, ghwadaah Simon sea orjeeda ghaamwat siguura Andreya nea ghoabuuta gheareedanga nyaawa jeeda basooda; aba gideaba fuga lealu ghweayeega.

¹⁷ Gwayeesha Yesu, “Ayeani geeshteanyu. Gaydanung' ahuwa fuga jea gwalealu buuneeda.”

¹⁸ Gwanung'usa heeda gheareedanga nyaawa aba geeshangiga ak ghwaat geeshta.

¹⁹ Gawa Yesu mwadi gili mwanang' ak ghwadaah Yakobo ea Yohana, orjooga Sebedayo nea gwanda jeeda maleambooda nea ghwanapnap gheareedanga nyaawa.

²⁰ Deagheata gaguursa Yesu ak gwayeesha, ak ghwanung'wa heeda ghweanda nyaawa was Sebedayo sea fuga gadiyeeda jeeda maleambooda ak ghwaat geeshta Yesu.

Siida bearji meang'nyeandeenda

²¹ Ghwahita Yesu ea ginealangaaschi mujiineeda Gapernaumu. Hean hita eaweeda sabaato gawa Yesu jeeda ghooriida siinealshacheewa ak ghoang'eat giinealshooda.

²² Iiy buuneesean aleeysiit ghwanung' ghahamng'eanyi aba giinealshoadaanyi, aba gideaba niny moonealsheata giinealshoodiga diineeda Yahudi niny goonealsheata siida mideawa gheambalmeeda

²³ Deagheata gwarina jeeda ghooriida siinealshacheewa Siisi bearji meang'nyeandeenda

²⁴ Goojuur nea gwayi, “Geendeayeesi naaha sea ang'iing'i Yesuheeda Nasareti? Guwuni lasa uhuudeanya? Ghaanali siida uwoosi guwoosi siida Ghaydit bea ASEETA!”

²⁵ Goojuursa, Yesu meang'nyeandeenda nea gwayeesha “Siinda! Riteawana siisi.”

²⁶ Gooduumduum meang'nyeandeenda siidida ak googuul aba nyeashta haw ak gwariteaysa.

²⁷ Ghahamng'eanyi buuneassean, nea goonyeari geat, “Suh ana ng'asha? Heapi, nih giinealshooni bunu? Siisi gwandeawa gheambalmeeda ea jooriischooda hoana meangeenda nea ghoawal gheang'da!”

²⁸ Gabay gageawiit iita Yesu aba jeeda ng'eanyiida sean bea Galilaya.

Yesu ghoahaap fuga saang'a

²⁹ Deagheata gwariteawa Yesu jeeda ghooriida siinealshacheewa ak gawa nea goodeayi Yakobo ea Yohana ea gaweay jeeda gheeda geaba Simon bea Andreya

³⁰ Abeeda gwanda Gheamadoanagi agweaji Simon nea gwanda muunda gabearji sheagheeda ng'waan. Duu ghwahidu Yesu geebay eataw iita.

³¹ Gaweesa ak ghoang'waay geatinda ak gagatkat, ak gwariteaysa sheagheeda, ak ghang'eat gagadiiyeesa buuneeda.

³² Mikta aseeta ghapka buuneeda heeda Yesu nea geeyeassa fuga sean miyeani ea fuga bearji meangeeniga.

³³ Gabassa geat fuga sean bea mujiineedida madeeda gheeda.

³⁴ Ghoahaap Yesu fuga saang'a bearji geeyoonung'weaka sean nea ghahoan meangeeniga saang'a, ak ea meanung' ghwanya ghuusiga meangeenda aba gideaba ghwanal niny siida was.

Yesu gwarukwiida ng'asheega aba Galilaya

³⁵ Muchu nea gudea beashata gil gawa Yesu hichpa geaw ak ghamwaash ASEETA

³⁶ Gawa Simon nea goodeayi orjooga suurja gagasa Yesu

³⁷ Sidaah geeyeesha, “Gagaseadayeey Gilinyoo ea siida.”

³⁸ Gwayeesha Yesu, “Eesiipta eeweaya darooraw suuk darukuta ng'asheanda ASEETA eara aba hoowa aba gideaba gidaghayi aang'oarji gil.”

³⁹ Iidu gawa gwaneayeewa jeeda ng'eanyiida Galilaya sean nea gwarukwiida ng'asheega aba ghoorajeega nyaawa siinealshacheewa sean nea ghahoan meangeenda.

Yesu ghoahaap siida bearji udamusuura

⁴⁰ Iidu ghwahidu heeda Yesu Siisi beardooschi udamusuura hidu gwatkuy ak gamus nea gwayeesha, “Iigasayi giimuusi amiinaan!”

⁴¹ Ghabwayda Yesu siidideani, ak ghoahaakta geatindaanyi ak ghoang'waay ak gwayeesha, “Geagasayi miini!”

⁴² Gwariteaysa siida udamusuura aba geeshangiga ak ghamiidu.

⁴³ Hit ghamiin gheang'da ak ghwanung' gabay ghabeawa hoowa nea gwayeesha,

⁴⁴ “Asi una nea adirukusi sih ng'asheanji. Una ahiimsiina geaw ashoohoocheanda, ak giidaydi haleanjeeda siyeada ghadooweeda was gidaghayi rukuteayda Musa, eanal gideaba ang'iing'i nihaabi.”

⁴⁵ Beawa hoowa Siidida gwarukusa siisi roonyi sean, ea ghwayiiy gilinyoo ea siida gil. Iidu Yesu ea mudu ghwanung' ng'asheesu gabadaksa beata jeeda mujiini. Gwajiireada gawa hichpa geaw ak eara gwasa gooreemsiina buuneeda meadajeega sean aba hoowa midean.