MALAKI 3 - Bibliyeeda Ghaydit

¹ “Ng'ula, Aniini gaydeajeagu giijasoocheandeanyu jea gwasinnean naweeda aba madeedeanyu, ak abeeda Ng'utamiida oogasayi gaygabay ghwahidu jeeda gheeda sibata ASEETA; nea giijasoocheanda neajeeda was dea oogasayi, ng'ula, ghwaan, gwarugu NG'UTAMIIDA bea lugweega.

² Ak gayghoamu ng'eaha ghamilikghta eaweeda hinoadaanyi, ak gayghoamu ng'eaha ghamiinaada iishuubean? “Niny gawuurji beasta gidayda ak gawuurji saabuuneeda mideawa uurda;

³ Gaygoobideadayda siida adeang'shachi nea goohuuni lapiya, ak gayghoamiidu orjooga Lawi ak ghoamiitaayda saawa dahaabu ea lapiya, ea ghoadaw NG'UTAMIIDA haleanjeeda doabiiw bea ghadooweeda.

⁴ Abeeda haleanjeeda ghadooweeda bea Yuda ea Yerusalemu gajea miyaasiin aba heeda NG'UTAMIIDA gawuurji gideaba garayi ea gidagweanyeeka ning'ata.

⁵ “Abeeda gaydaneekiiseegwa ak geargweakseegwa; ak gaydawoos muushoocheanda asas aba badahuuka beeneediga, ea aba badahuuka fuga mealuuli, ea fuga aga habeawooda ng'uyeega, ea badahuuka fuga sawan fuga gadiyeeda aba gidageatinda nyaawa, ea masiinung'weanda ea bananeeda, ea badahuuka fuga huteawi rabascheanda, nea meawala gheang'deanyu, gwarugu NG'UTAMIIDA bea lugweega.

Giidaydeayda gida aba jeeda gilatamanamughuush

⁶ “Aba gideaba aniini NG'UTAMIIDA meayami geaw; asi agooga, Ea orjooga Yakobo, nih gidamiyealasa uhuudeang'wa.

⁷ Gidang'eada damanda ghweanigeagwa noayami geat diigheanyeekeasu ak ea moang'waanyi. Ayamsean geat, ak gaydayamseegwa geaw, gwarugu NG'UTAMIIDA bea lugweega. Ak gooyeenyi agooga, ‘Gajeebiiktaaydan?’

⁸ Siida ghoamu gwajagwat ASEETA? Ak ghamneawa goojagwachean. Ak gooyeenyi, ‘Neada geejagwataneeyiin?’ Goojagwachi gideaba damanamughuush was haleanjeeda ghadooweeda.

⁹ Agooga simwaashtaneegwa, aba gideaba goojagwachean agoogeeda was eemeesean.

¹⁰ Ayeani haleanjeeda sean was gilba damanamughuush jeeda gijigooda, ak gwanda jeedeaba gheenyu hamita; ak abeeda goosimnyean, gwarugu NG'UTAMIIDA bea lugweega, ak ea meatineegwa seawuutka humng'eeda ak ghwanung' ghwahiing'aan ghawooda ghwahidu badahuukeagwa ea ghwanaawda.

¹¹ Ak gaydareekusa deashamga aba badahuukeagwa, ea mwaaga haghweega ng'eanyiideang'wa; nea sabiiboodeang'wa mida madamnyeanda ea mayghwashnya jeata, gwarugu NG'UTAMIIDA bea lugweega.

¹² Ak gaygaguureewaneey eemoojiga sean dea siitaw ghawooda, aba gideaba gaywoosa ng'eanyiida miy gwarugu NG'UTAMIIDA bea lugweega.

ASEETA gwaheeleesa baydeayda

¹³ “Ng'asheegeagwa nihang'oonyiidi aba badaydeanyu, gwarugu NG'UTAMIIDA. Ak gooyeenyi agooga, ‘Geerukuteaydi ng'asheega aba badaydaang'u?’

¹⁴ Gooyeenyi agooga, ‘Marachi gil gadiyeesiinda ASEETA. Ak ea sinyaschi naaha miy aba ging'ooyda ng'asheagaaschi ghana eabeada gilisigiisanyi aba madeeda NG'UTAMIIDA bea lugweega?

¹⁵ Ak ghamneawa geayeenyi fuga ghwarjeeda gea siitaw ghawooda; nea fuga sina ng'asheega munyas ea gea miyeeni amadu nea gwasin ASEETA gamng'aw.’”

¹⁶ Iidu fugiga awali gheang'da NG'UTAMIIDEAN goobaloola geat gideaba; NG'UTAMIIDA gwayiing'shi nea gooleeysiit saawa, ak geang'waar gitaabooda giipkeata aba madeadaanyi was fugiga awali gheang'da NG'UTAMIIDA nea goopkeadi gheawungaaschiin.

¹⁷ “Gayghoah fugeasu, gwarugu NG'UTAMIIDA bea lugweega, aba eaweeteanyu easini gadiyeeda, ak gaydaaghu saawa gawuurji siida aghu orjeedaanyi gadiyeesa niny.

¹⁸ Ak abeeda gajeamuusa ooheeleena fuga miyaasiin ea gea munyas, ak gooheeli siida bada ASEETA ea dea mabata niny.