Lukka 8 - Bibliyeeda Ghaydit

Gadeemga adeayi Yesu

¹ Iidu ghang'eat gwasik jeeda mujiinajeega ea gharang'weaka, gwarukwiida nea gweadu Giijasta Miy bea sugoocheanduumeeda ASEETA. Nea abeeda gwandeayi sea ginealangaaschi atamaniyeenya,

² nea abeeda goodeay gadeemsu mida jeeda gea siihaabwa meangeenda ea geeyoonung'weaka: Nea Mariyayda siguura Magdalena ghayi siiruuteawa meangeenda asispwa,

³ ea Yoana gatmooda Gusa, ea haghweadoocheanda haleanjeeda Herodehi, ea Susana, ea suuk gea saang'a, gadiydooscheesa saawa aba haleanjeeda mideawa.

Gida sigala siida weah histeayda

⁴ Iidu bwat geat Eemeetuw leabu mujiinajeega sean gaweesa buuneeda niny, ak gwarukusa galeega nea gwayeesha:

⁵ “Ghayi ghang'eat sih gawa histeayda; hita nea gwahista gwanda gea abitpisa heeda was naweeda, ak gealaaplaap aba geeshanga, nea ghwahita dariidaka humng'eeda ak ghwaak.

⁶ Gwanda eara gea abitpisa heeda was harearacheanda; ridu ghwasis aba gideaba mii nyeewaneat sigeeda.

⁷ Gwanda eara gea abitpisa jeeda geediga halaghweenga; iidu nea gwardu sea halaghweenga ghwariis geediga.

⁸ Gwanda eara giika abitpisa jeeda sigeeda miyaasiin ak gwardu, gaba ghealooni jih bughala.” Iing'ata rukunoodeaba ng'asheesu, goojuur nea gwayeesha, “Siida mideawa iidiga jea ghwayiinya, ea dayiing'shi.”

Gissibaysiina galoodeaba geat bea ng'asheega

⁹ Iidu ghoanyaash ginealangaaschi gidabaysiina galoodeaba geat bea ng'asheega,

¹⁰ gwayeesha, “Agoogeeni simeayneegwa makcheameeda sugoocheanduumeeda ASEETA; nea aba fih suuk geaghus eegala geat, aba gideaba eara iyang'wearda ea mayghwadaah, ama eara iiyiiy ea mayghwanal gidawas.

Yesu gwarugu ganeega gala siida weah histeayda

¹¹ Balooli gida sigala nihi: Histeanga geegala ng'asheanda ASEETA.

¹² Giika abitpisa naweedean fugiga ama iiyiin gil; hean ghwahidu meangeenda gageandeawa ng'asheandida gurooruunatka nyaawa, aba gideaba adaghamwas ak gealealu.

¹³ Nea giika abitpisa badayda harearacheandean, giika ama iiy ng'asheanda ghoang'waay nea gahoosaniini; ak ea mandeawana hawungeani, iissa ghamwas gilinuwaas ama duw nea geesimsim gabay gabiikta bwadaw.

¹⁴ Nea giika abitpisa jeeda geediga halaghweengean, ea giika ama iiy, iidu nea gaweay ghwariis mitagheasta muunda ng'eanyiida bea gasooda baruureega, ea haleanjeeda bwariiy sasanuuka nyaawa ak iidu haghweagaaschi ea mwaheasa.

¹⁵ Nea giika abitpisa jeeda sigeeda miyaasiin, giika ama iiy ng'asheanda, gabay ghoang'waay muuchi aba guroorooda miyiin, ak gwaji haghweega aba milikghteayda.

Gheaboong'nyeanda sidukuta

¹⁶ “Manda siida jea ghoayeat gheaboong'nyeanda ak gwadukuteawa dahuuda, ghana ghwayiin uuta bulaliida, geaghus ghwayiin uhuuda ghamarda, abeeda ghwadaah fuga buwa gah weeshinda.

¹⁷ Ea manda gidafunyaat ak ea majeenung' ghwadaajiit, ak ea manda gida wassean was makcheameeda jea ea majeatahaach ak geeyeadu heedeesh.

¹⁸ Asi ashageada aba gidoayiing'di; aba gideaba siisi agar gil gajeeheasa, nea siidida meagara giliin, eara gidida mideawean gajeegeanda.”

Gheamata Yesu ea orjooga geenyea Yesu

¹⁹ Iidu ghwahidu ghaamwat sea orjooga geenyea Yesu ghapka headaanyi, ak ea meanyasa gheata jea eehitaawa headaanyi aba seang'ayda eemeeda.

²⁰ Geerukusa nea geeyeesha, “Geamadu ea orjooga geamadu ghamiinaada aba jarooda, nea gagaseey.”

²¹ Ak gwayeesha Yesu saawa, “Iiya ea orjooga iyya gea iiy ng'asheanda ASEETA ak gwasiniin.”

Yesu ghwanung' ghahawda siilakghta basooda

²² Eaweecha gawa jeeda maleambooda sea ginealangaaschi, ak gwayeesha saawa, “Eakghaawana basooda eebu meatkweeda niirja.” Hean ghang'eatng'eat gaweay,

²³ damani beawaan abeeda ghoang'waay ruweanga. Gabalagu siilakghta aba jeeda basooda ak ghwanung' gwaneawiida beega ea gwaramagu ghwanyiit beega jeeda maleambooda nea gwanda jeeda washta.

²⁴ Geeweay ak ghwaheat nea geeyeesha, “Siida haw, siida haw, Siisheali!” Ghang'eat ak gwareekusa siilakghtida ea laweajajeegiga bea basoodean; ak ghwasiinda gwayi saw.

²⁵ Hean gwayeesha saawa, “Gwandeenu masaweegeagwa?” Hean ghabeal nea ghahamng'eanyi ak gaba siisi eesha nuut, “Siisi nih siida uurjiini, ammu gwareekusa jeameeda ea beegean, ak ghoawal gheang'dean?”

Yesu ghoahaap siida bearji meangeenda

²⁶ Iidu ghwahiita ng'eanyiida Gerasi, deaschi sea Galilaya.

²⁷ Rarang'aan ak ghoala ng'eanyiida ghajaam gwaroonyi siisi bearji meangeenda; leabu mujiini nea nigeawiit ea meakweala hang'weaka, ak ea moobiiteena eara ghoah goobiita heeda bung'eadinga.

²⁸ Daah siiteani Yesu goobeedeaysa madeadaanyi ak goojuur aba ghuuta haw nea gwayeesha, “Geendeayeesi naaha sea ang'iing'i Yesu Orjeeda ASEETA mida humng'eeda? Eaniyean adisawanyean.”

²⁹ Ghwanyaashtunu aba gideaba abeeda niyeesha Yesu meangeenda riteaysiina siisi. (Ak ea nibiiksa siisi nyaamoana; inyeesa geefur nea geerada aba munyaloalajeega ea biingu, ak gang'acheaweada sean ak ghwaat uurda meangeenda ea gawa eeshtearajeanda aba uurda meangeenda.)

³⁰ Ghoanyaash Yesu niny nea gwayeesha, “Gheawungaagu ng'eaha?” Gwayeesha siidida, “Aniini geeguureewean Lugooda”; aba gideaba gabearji meangeenda saang'a.

³¹ Gamearmearani Meangeenda nea gwayeesha, Geemuscheey, adiidu ginung' eeweaya jeeda shoomanda sheagi.

³² Aba damani gwanda hawanda ukurmajeega daghatpa heaya ghoajeada, ak gamearmearani meangeenda gideaba nung' eeweaya eapita jeedeaba ukurmajeesu. Ak ghwanung' gaweay.

³³ Gwariteawa meangeenda siidida ak ghoabita jeeda hawanda ukurmajeega, gwasalda hawanda ukurmajeega ghwararang'aadawa beareega heayeeda, ea ghoabita jeeda basooda ak goosha sean.

³⁴ Daah jeagiischoodiga gaweay gwarukuta gidabunu, gaweay mujiini ea jeeda ng'eanyiida.

³⁵ Iidu gaweay buuneeda ghwadaah gidabun, gaweay heeda Yesu, ak ghwadaah siidida siihaabwa meangeendean, nea goopteada aba murdeeda geeshanga Yesu, nea gookwa hang'daanyi, nea nibiiksa fughareadaanyi; ak geabeal.

³⁶ Nea fugiga daahiin gwarukwiida gideaba siidida bearji meangeendean siihaap.

³⁷ Hean gamus buuneesean mida geeng'oojiga Gerasi gideaba ng'amwana ng'eang'deanya; aba gideaba ning'ut muuwda; ng'ata gwading'da maleambooda ak gabiikta.

³⁸ Gamus siidida siihaabwa meangeendean iidaah nea gawa hean gwaneawsa geaw nea gagasa goodeayi, ghwanung' gawa nea gwayeesha,

³⁹ “Una gheang'u, ak girukwiidi giteena ng'asheega sean bea gida niweataneey ASEETA.” Ghang'eat gawa gwarukwiida aba mujiineesean giteena ng'asheega sean sissa Yesu.

Hudeaba Yayro ea gatmooda waas weeleeda Yesu

⁴⁰ Iidu nea gabiigu Yesu ghwadeapta eemeeda aba gideaba nigeawiit goomuuku sean.

⁴¹ Iidu ghwahidu heeda siisi siguura Yayro, nea abeeda ghoahaaghwa ghooriida siinealshacheewa; hidu goobeedeaysa geeshanga Yesu ak gamearmearani goodeayi gheanyi,

⁴² nea abeeda hudaanyi was haghasheeda, bea gweanyeew damaniyeenya, ghabwar miyeeda. Damani weewean ghwariis buuneeda Yesu aba murdajeega sean.

⁴³ Abeeda gwanda gatmooni areemi foojeanda gweanyeew damaniyeenya ak ea manda siida ammu ghoahaap.

⁴⁴ Ghwaat geeshta ak ghawaasa geaw weeleeda hang'daanyi; deagheata goosha giireemdida bea foojeandean aba geeshangiga.

⁴⁵ Ak ghoanyaashta Yesu nea gwayeesha, “Ghawaas ng'eaha?” Ghwashaang' buuneesean, gwayeesha Betaro, “Siida haw, eemeeda gwaneaweeseey nea ghwariisnyi!”

⁴⁶ Gwayeesha Yesu, “Gwanda siida niwaasan; aba gideaba ghaadaayi niriteawanean uurda.”

⁴⁷ Iidu nea ghwadaah Gatmoodida gideaba mudughoamu ghafuy geaw, gaweesa nea ghaboadanaada aba muuwda, ama hita ghoabeada aba madeadaanyi ak ghoadayda iita aba madeeda buuneesean gidawaasta, ea gidasiihaapta aba geeshangiga.

⁴⁸ Gwayeesha niny, “Huda gidahaapnyi masaweagaagu, una nea gibeahi hoyyoo.”

⁴⁹ Damani duu gabaloolean, ghwahidu siida leabu gheeda siida haw ahaaghwa gheeda siinealshacheewa ak geeyeesha, “Hudaang'u niibita; adagudideawiidi Giinealshoocheanda.”

⁵⁰ Iiy Yesu iidi ghwasha nea gwayeesha, “Adibeali, ang'iing'i mwasa abeeda gayghahaap.”

⁵¹ Hita ghoah ea mwanung' gaweay buuneeda gah sea niny, geaghus niny ea Betaro ea Yohana ea Yakobo, ea ghwaan ea gheamata baleanda.

⁵² Nea abeeda gooyeawda sean nea gagutu heareagaaschi; hean gwayeesha, “Adooyeawdi; aba gideaba miighami, gwalil.”

⁵³ Geebara reari, aba gideaba geanal goola ghami.

⁵⁴ Hita ghoang'waay geatinda ak gaguursa nea gwayeesha, “Jeepta, ng'eada.”

⁵⁵ Gabiiksa gurooroadaanyi, ak ghamiinaada aba geeshangiga; ak gwayeesha, oatawa gichea ghwaak.

⁵⁶ Ghahamng'eanyi ghaamwat ea ghwaan; ak gwayeesha, adiidu goorukusi sih ng'asheanji gwachi easinyiin.