Lukka 5 - Bibliyeeda Ghaydit

Yesu gaguursa giinealanga madeeda

¹ Eaweecha nea gwanda murdeeda basooda Genesareti gwaneaweesa buuneeda nea gooleeysiit ng'asheega ASEETA.

² Ghwadaa maleambaji iyeenya aba murdeeda basooda, nea abeeda ea niweay fiibwa goohuun gheareedanga nyaawa siing'oonya ghweayeega.

³ Gawa jeemba maleamboonagi was dea Simon, gwayeesha seabwa nung' goosiipta maleambooda gil mwanang' gawa jeeda basooda ak goopteada ak ghoanaal buuneeda nea gwanda jeeda maleambooda.

⁴ Rat ghuuta baloolda, gwayeesha Simon, “Asiipsiina heeda saang'a beega, ak ghoapuuti gheareedangeagwa alealni ghweayeega.”

⁵ Ghwasha Simon nea gwayeesha, “Siida haw, geegadiiyi eaweesean ak ea moang'waanyi gil! Ama ninyaashtunu gaydaabuuta gheareedanga.”

⁶ Iing'ata sinoodeaba nih, ghoang'waay ghweayeega saang'a; ea ghwariikghta gang'ada gheareedanga nyaawa,

⁷ Gang'wachsa geadi fiisu mida jeemba maleambooni neeki ghapka ghaweat. Geegawusa maleambajeega duwaawi ea gwaramagu gwalik beega.

⁸ Daah Simon Betaro ng'asheanji, goobeedeaysa madeeda Yesu nea gwayeesha, “Ea Ng'utamiida, asiipteawana heedeanyu, aba gideaba geabea riing'a.”

⁹ Ghahamng'eanyi sea fugiga sean mideayiin, aba ghweayeega siing'waay;

¹⁰ nea abeeda gwanda Yakobo ea Yohana was orjooga Sebedayo sinuudayi gadiyeeda sea Simon. Ng'ata gwayeesha Yesu Simon, “Adibeali; ghang'eada ghamneawa gaylealuuni buuneeda.”

¹¹ Aruuna maleambajeega nyaawa jeeda basooda ghang'eatng'eat gwanung'usa heeda haleanjeeda sean ak geayaat geeshta.

Yesu ghoahaap siida

¹² Eaweecha nea gwanda jeemba mujiinajean, ghwahidu headaanyi Siisi bearji udamusuura, dea Yesu, goobeedeaysa madeadaanyi ak gamus nea gwayeesha, “Ng'utamiida, iigasayi giimuusi amiinaan.”

¹³ Ghoahaakta geadi Yesu ak ghawaas nea gwayi, “Geagasayi; miini.” Deagheata gwariteaysa udamusuura.

¹⁴ Ghamiin gheang'da ea marukusiina sih; nea gwayeesha, “Una ahiimsiina geaw ashoohoocheanda, ak gisabi geadi haleanjeeda siyeada ghadooweeda was gidaghayi rukuteayda Musa, asi abeeda gajeadaah gideaba siimiineey.”

¹⁵ Ak gageawiit iita aba darooraka sean, ak ghapka eemeeda headaanyi gooleeysiit nea ghoahaap fuga bearji geeyoonung'weaka.

¹⁶ Iidu gwajiireada ak gawa dareapcheeda ghamwaash ASEETA.

Yesu ghoahaap siida abitu damealga

¹⁷ Eaweecheanjagi aba jeedeaba eawoojigiga goonealshi, abeeda goobiitpiit Farisaayajeega ea giinealshoodiga deaweeda leabu gilinyoo ea gharang'da Galilaya, ea Yudeya ea gealeabu Yerusalemu; nea gwandeawa uurda Ng'utamiida ak ghoahaap buuneeda.

¹⁸ Asi ng'ula, ghapka buuneeda nea gwasareena muunda siisi abitu damealga, ak geegasa gichea eayaata gah, ak geayiin madeeda Yesu;

¹⁹ iidu nea mwanyasa gheata gichea gweateayda gah aba seang'ayda eemeeda, gwading'da uhuuda gheeda ak geerareang'u sea muundaanyi gwasku seawadeeda ea eayiin madeeda Yesu.

²⁰ Daah masaweega nyaawa gwayi, “Siida, sisamsa riing'eagaagu.”

²¹ Goonyeari geat Farisaayajeega ea ng'oorshoodiga nea gwayeena, “Siisi ng'eaha ang'eawi ASEETEAN ghanyea manda siisi ammu gwasamsa riing'eeda geaghus ASEETA ak ghwahit.”

²² Jeeng'u Yesu ng'asheega anyeari geat gwayeesha, “Ghwasaan anda goonyearayi geat ng'asheesu aba gurooruunatkeagwa?

²³ Ea wusis aneeda, gideaba dayi, ‘Riing'eagaagu sisamsa,’ ghana dayi, ‘Ng'eada ak guwi’?

²⁴ Asi geagasayi anala gideaba Orjeeda Siida gwandeawa gheambalmeeda aba jeeda ng'eanyiida jea gwasamsiina riing'eega” iidu gwayeesha siidida abitu damealgeani, “geayi, ng'eada, sareana muundaang'u ak guwi ghoah.”

²⁵ Deagheata ghang'eat siidida aba madeenyaawa, ak ghwasar muundaanyi ak gawa ghoah nea ghoaghaambiit ASEETA.

²⁶ Ghahamng'eanyi sean, nea geakghambiit ASEETA nea ghang'ut muuwda nea geeyi, “Eanean sidaayi ng'asheega deamdeameadi.”

Yesu gaguursa Lawi

²⁷ Iidu gwarita jarooda ak ghwadaah siisi ang'oonyi gwaadi siguura Lawi, nea goopteada aba gheeda siing'waanya gwaadiin; ak gwayeesha, “Eani geeshteanyu.”

²⁸ Ghang'eat ak gwanung'usa heeda haleanjeeda sean, ak ghwaat geeshta.

²⁹ Gwasissa Lawi ghweelmeeda haw aba gheanyi; ak gweagiischi nea gambuuchi fuga saang'a ang'oonyi gwaadi ea buuneeda suurja.

³⁰ Hean gooniiksa Farisaayajeega ea ng'oorshoodiga nyaawa ginealangaaschi, nea gwayeesha, “Ghwasaan anda gooyeagiischi nea gooleeshi sea fuga ang'oonyi gwaadi ea fuga riing'eega?”

³¹ Ghwasha Yesu nea gwayeesha, “Fuga majeekcheewi magaseadayi meang'nyeanda geaghus gagasa gea miyeani.

³² Aniini mwaawuni daguursa fuga doobiiweadi, ghaawunyi daguursa fuga riing'eega gwaduukuuna riing'eega nyaawa.”

Iita giiluuldeaydeaba geaw

³³ Hean geeyeesha, “Anda giinealanga Yohana gooluuliida geat nea ghamwaash ASEETA, ak eara giinealanga Farisaayajeega gwasiniidunu, nea gaagu gweagiischi nea gwaleeshi.”

³⁴ Gwayeesha Yesu, “Ghoamu gwalilda rabasta nyeangiida nea gwandeayi sea siida geeshi?

³⁵ Amadu gwanda eaweeda jea eegeandeawa siida geeshi aba jeenyaawa, eaweecheanji gaygwalilda.”

³⁶ Hean gwarukusa galeega nea gwayeesha, “Manda siida jea ghabwaash weasta hang'deesh ak ghawaasa hang'da waas, iisindunu gayghabwaash dea eesh, ak abeeda weastida bea hang'deeshiin maygweateayi sea dea waas.

³⁷ Ak ea manda siida jea ghwayiin difaayeeda mii ghwaheas jeesinga ghadeatka woosi; iisindunu, gaygwanyarjeaweada difaayeeda mii ghwaheas ghadeatka ak gaygaweay difaayeeda, ak gwanyara ghadeatka.

³⁸ Difaayeeda mii ghwaheas geaghus eeyamsa jeesinga ghadeatka eeshish.

³⁹ Ea manda siida jea iing'ata leeyda difaayeeda heeseadi jea gagasa gea mii heeseadi; aba gideaba gaygwayi, ‘Gea heeseadi aamiyaas.’”