Lukka 24 - Bibliyeeda Ghaydit

Duunooda

¹ Iimuchu eaweeda madeeda bea wiikajeanda, nea ghaghar gayeew, gaweay heeda bung'eeda, nea ghwaat geediga ng'andidi nisin.

² Hean sihita geadaah lagheaneedida nea sisheagiida ghuuta shoomanda bung'eeda,

³ iidu nea gaweay jeeda shoomanda bung'eeda ea mwadaaha musta.

⁴ Damani duu ghahamng'eanyi aba ng'asheanjiin, hean ghamiinaada fih iyeenya aba murdeenyaawa nea gookwa hang'weaka meeng'meeng'i;

⁵ damanda duu ghang'uda muuwda nea ghwahiiy geat googeal iheenga nyaawa ng'eanyi, gwayeesha sih saawa, “Ghwasaan anda googaseadayi siida majeek aba jeeda fuga nimeewa?

⁶ Oapkaada gidaghayi rukuneegwa, damanda duu gwandeewa Galilaya,

⁷ gideaba, Orjeeda Siida gajeayiin geatinga fuga riing'eega, ak geengoor, ak gwaduudu eaweeteaba samwagu.”

⁸ Hean geapkaat ng'asheagaaschi,

⁹ biikna hooweani bea bung'eedean gaweay ghoadaw iita giinealangiga atamwanagiin ea buuneeda suurja.

¹⁰ Nea Mariya Magdalena gil, ea Yoana ea Mariya gheamata Yakobo, ea gadeemga suurja gwachi mideawean suh fuga rukusa giijasoodiga iiteaba ng'asheesuun gil;

¹¹ gawuurji ng'asheesu aba heanyaawa duguuga mwadaagha, ak ghanyea meamwasa.

¹² Ak gawuurji ng'asheega nyaawa aba heanyaawa duguuga mwadaagha, nea ghanyea mamwasa. Ng'ata ghang'eat Betaro ak ghafwach ea ghwahita heeda bung'eeda, ak ghwahiiy geaw goong'weersa jeeda, ghwadaah weageakiga sibung'dean ak ghwahit; hean ghang'eat gawa nea ghahamng'eanyi aba ng'asheega bunu.

Beata Emau

¹³ Eaweedida gaweay fih iyeenya aba jeenyaawa gharang'i siguura Emau, nea sheageewa Yerusalemu jea ghoahiita aseeta iyeenya hiteayda,

¹⁴ gabalooleadawa iiteaba ng'asheegiga indeareedida bunuun.

¹⁵ Aba damani balooleadawa nea goonyeari geadiin, gawa Yesu ea gwaneekiisa ak goodeayi.

¹⁶ Geedukuta gheanyanga nyaawa ea mwanala siida was.

¹⁷ Hean gwayeesha saawa, “Ng'asheespa naaha oobalooleadawi nea gooweayiin?” Ghamiinaada nea niikaroomnyi gheamamuunatka nyaawa.

¹⁸ Ghwasha Siyagi aba jeenyaawa, siguura Gleopa ak gwayeesha, “Neada ang'iing'i guwoosi rabascheanda nea gibwaageaw aba Yerusalemu mwanala ng'asheega sisiin aba hiji askwearjoojisu?”

¹⁹ Hean gwayeesha saawa, “Ng'asheespa naaha?” Geeyeesha niny, “Ng'asheega Yesuheeda Nasareti, ghayi was sibaneeda mideawa uurda sinooda ea baloolda aba madeeda ASEETA ea dea buuneesean,

²⁰ ea gidahaaktaayda ashoohoodigaasa hees ea fuga ahaaghwa ng'eanyiida ak ghoadayda eergweaksiina miyeeda, ak geengoor.

²¹ Nea abeeda aseasa geararji gideaba niny siichea ghoaghu Israeli gil. Gilinuut gicha askweareani ea deaba samwagu aba ng'eeta ng'eada ng'asheesu.

²² Gabiissa gwanda gadeem bea ng'eang'deanya gwachi nung' eabeala. Weay bung'eeda sakteayda duu

²³ ea mwadaaha mustaanyi; ak ghwahidu ak gwarugu gideaba niroonyi sea malaykajeanda eesha ea majeek.

²⁴ Eara fih suuk gicha gwachi sindeawi gaweay hoowa bea bung'eedean ak ghwadaakta gidagwachi rugu gadeemgiga; nea niny ea meadaaha.”

²⁵ Ng'ata gwayeesha saawa, “Ea fuga dasheahi, mideawa gurooruunatka hang'oonyi ak ea mamwasa eara ng'asheega ghayi rugu sibanga!

²⁶ Mamiisiina gideaba Gristo gayghwanyas sawanadeeda ama ng'ata gawa jeeda giigheambiitaanyi?”

²⁷ Hean ghoang'eada Musa ea sibanga sean, ak gwarukusa saawa ng'ooruutka sean bea ng'asheega badaydaanyi.

²⁸ Gaweay ea gwaneekiisa gharang'dida gwachi weayiin. Ak gwahinda geaw giligasa ghang'ata,

²⁹ hean geemearmearani nea geeyeesha, “Shinya eendeayeena, aba gideaba niisha aseeta ak ea nihidu eaweeda.” Hean gawa jeeda gheeda ak gwandeayi.

³⁰ Damandida mideayeewa aba agiischoodean gageanu mukaate ak gang'usha ak ghabwanach ak ghoadaw saawa.

³¹ Ghwajaada gheanyanga nyaawa, deagu ghwanal gideaba niny, ama ng'ata gwarooda gheanyanga nyaawa.

³² Goonyeari geat nea gwayeena, “Neada jeesingaasa ea mwayeadana beasta damandida gwachi abaloolaneasa aba naweedean, nea gang'acha iiteanya aba gidaghayi nyaah ng'ooruutka?”

³³ Ghang'eatng'eat damandida ak gabiikta Yerusalemu, ak ghwanyasa hoowa giika atamwanagiin nea gwandeawa giika eawoojisu mideaydooschiin,

³⁴ nea gwayi, “Huumwa gil niduudu Ng'utamiida, geabwada niihiimsa geaw Simon!”

³⁵ Hean ghoadayda iiteaba ng'asheegiga bussa aba naweedean, ea gida siyi bwak ea ghwanalda saawa gideaba niny damanda bwanaja mukaate.

Yesu gwaroonyi sea ginealangaaschi

³⁶ Damani duu gwandeawa jeedeaba balooliin, ghamiinaada Yesu aba bugusta nyaawa.

³⁷ Ghahamng'eanyi ak ghabeal muuchi, nea ghaghay gili dea maloonghajeanda.

³⁸ Gwayeesha saawa, “Ghwasaan anda ning'udeagwa muuwda, ak ghwasaan anda goonyearayi geat ng'asheesu aba jeesingeagwa?

³⁹ Oong'weersiina geatingeasu ea geeshangeasu, gideaba aniini gil; oang'waanya eara saseedeanyu ak ghoadaayi; aba gideaba maloonghajeanda mandeawana saseeda ea geeka gawuurji gidoadaaktanaan ghamneawa.”

⁴⁰ Iidu nea ning'ata rukunoodeaba ng'asheesu goohiimsa geatingaaschi ea geeshangaaschi.

⁴¹ Damani mii ghamwas aba hooseaneegean, nea ghahamng'eanyi nea gwayeesha saawa, “Goondeawi gichea ayaaga aba hiji?”

⁴² Geataw banajaneeda ghweayeanda sibeash.

⁴³ Gageanu ak ghwaak aba madeanyaawa.

⁴⁴ Hean gwayeesha saawa, “Suh ng'asheegeasu ghayi earukuneegwa, damanda sindeaydooscheewi, ak abeeda ng'asheega aba badaydeanyu aba jeeda deaweedeeda Musa ea sibanga ea gitaabooda Nyiigheega gajeahiit.”

⁴⁵ Ng'ata ghwajaat fughareenga nyaawa ghwanal ng'ooruutka.

⁴⁶ Ak gwayeesha saawa, “Nih gidaghayi sing'waarda gil gideaba Gristo gayghwanyas hang'weanidooda ak gwaduuna miyeeda eaweeteaba samwagu,

⁴⁷ ea gideaba duukuunooda ea samsiinda riing'eega gajeerukwiida aba gheawungaaschi, aba jeeda eemoojiga sean, ghang'eada Yerusalemu.

⁴⁸ Nea agooga goowooschi mushoodigeaba ng'asheesu.

⁴⁹ Ang'ula, geayeaneegwa heeleeda Bwaabwa; asi oopiidana mujiineani ea eegooneegwa uurda leabu humng'eeda.”

Yesu geayaat humng'eeda

⁵⁰ Ghoadoabiiw ea ghoahiita ng'eanyiida Betaniya, ak gagatkat geatingaaschi ak gang'usha.

⁵¹ Damani ng'ushiinean gooheeli geaw ak geetiing'da eayaat humng'eeda.

⁵² Ama ng'ata gabiigu Yerusalemu nea gahoosan muuchi,

⁵³ goobiita jeeda gheeda sibata ASEETA nea gwaduumsheesa ASEETA.