Lukka 22 - Bibliyeeda Ghaydit

Geamwaal gichea eenuusta Yesu

¹ Hean abeeda ea nineekiit ghweelmeeda mukaatajeega miyeayiin hamiira siguura Basaaka.

² Nea ashoohoodiga hees ea ng'oorshoodiga abeeda gwanda jeeda gasooda gichea ghoang'waayda ak gwanuus; ak iidu ghoawal buuneeda.

Yuda ghwamwas ghwalabwadaw Yesu

³ Hean ghoabita Shataani jeeda Yudayda siguura Iskariyote, nea gaba jeedeaba fugiga atamaniyeenyean;

⁴ Ng'ata gawa goobalool ashoohoodiga hees ea shirikareeda hees gida jea ghwalaapta bwadaw niny aba saawa.

⁵ Gahoosan saawa muuchi ak gwaheeleesa gideaba gajeataw lapiya.

⁶ Hean ghamwas ak gagasa gheata jea ghoalaapta bwadaw nea manda hiji eemeeda.

Yesu ghang'aap agita hamita Basaaka

⁷ Ghwahidu eaweeda ghweelmeeda mukaatajeega meayiina hamiira, nea eaweeda sinuusa dayeenda gisilleanda ghweelmeeda Basaaka gil.

⁸ Iidu goojeakta Yesu Betaro ea Yohana nea gwayeesha, “Aweayeena asisina heechea eeyeaksiina Basaaka.”

⁹ Ak geeyeesha, “Gigasayi eang'aabwa aba yeenu?”

¹⁰ Gwayeesha saawa, “Ang'ula, iyoahiti mujiini gajaroonyeewana ng'eedeeda sar sirbiida beega; ghoayaachi geeshtaanyi ea ahita gheeda jea gawa jeeda,

¹¹ gooyeeshi siida bea gheeda, ‘Gwayi Giinealshoocheanda, abwaara ghooriini siyeaksi Basaaka aniini ea giinealangeasu?’

¹² Ak gayghoahiimneegwa ghooriini haw sideeksa uhuumba nuut, ak ea siitaamdaam; ak goosisi jeeni.”

¹³ Hean gaweay ea mwahita ghwadaakta ng'asheega sean gidagwachi rukuteayda; hean gwasisin Basaaka.

Hamita Ng'utamiida

¹⁴ Hita damanda agiischooda goopteada niny ea giijasoodigaaschi gweagiischi.

¹⁵ Ak gwayeesha, “Neagasayi muuchi daak Basaakeeni aniini ea agooga heeda miidanyasa hang'weanidooda;

¹⁶ aba gideaba geayeeshiineegwa, maygutaak ea eahiit aba jeeda sugoocheanduumeeda ASEETA.”

¹⁷ Hean gageanu gikoombe, ak gabadiischeesa ak gwayeesha, “Oang'waanya gili, ak goolakiisiina geat;

¹⁸ aba gideaba geayeeshiineegwa, maygutali mideega haghweega sabiibu, ea ghwahidu sugoocheanduumeeda ASEETA.”

¹⁹ Ak gageanu mukaate, ak gabadiischeesa ak ghabwanach ak ghoadawaada saawa nea gwayeesha, “Nih saseedeanyu gil siitayda aba badahuukeagwa. Ahindunu aba giipkeateanyu.”

²⁰ Ak gwahindunu eara gikoombe iing'ata agiischooda gwayi, “Bayoogi geahiida aba badahuukeagwa neajeeda eesh aba foojeandeanyu.

²¹ Ak goong'ulayi geatinda siichea ghwalaabwan bwadaw geambuucheewi aba hiji.

²² Asi Orjeeda Siida gayghabeada gidaghayi sibean eerarsiinda ak ea dashageada siidida jea ghwalaabwan bwadaw!”

²³ Gabiisa goonyeari geat saawa, nea gwayi, Ng'eaha nih aba jeedeanya jea gwasin ng'asheanjiin.

Sheang'nyeeda hawunda

²⁴ Iidu gwardu sheang'nyeeda aba jeenyaawa gideaba aahaw ng'eaha aba jeedeanya.

²⁵ Gwayeesha saawa, “Sugoodiga eemoojiga inyeesa goombaliischi aba heanyaawa; giika mideawa gheambalmeedean aba heanyaawa geeguura fuga weeda buuneeda.

²⁶ Agooga ea mii gichea awuurjeewana; aba agooga siida gasa hawunda dawuurjeewana siida mwanang'eawa sean, nea siida gasa ghang'ata mwadi dawuurjeewana siida gadiyeeda.

²⁷ Aba gideaba aahaw ng'eaha, siida apteada ak gweagiischi, ghana siidida gadiyeesa buuneedean? Ak ghaaghanyi gajea siiteani agiischiini. Ak aniini aba jeedeang'wa geawuurjeewi siida gadiyeeda.

²⁸ “Agooga goowooschi fuga ghayi milikiida galeagasean sea aniini aba jeeda simsindeanyu;

²⁹ gawuurji gidaghayi goondaneani Bwaabwa sugoocheanduumeeda, eara aniini gaydagooneegwa,

³⁰ Ak gajayeagiischeena nea gooleeshi aba jeeda sugoocheanduumeedeanyu, nea goopiitpiidi hoorgajeega sugoodiga ak goorgweaksi dooshin damaniyeenya bea Israeli.

Yesu ghwaramoar gideaba Betaro gayghwashaang'an

³¹ “Simon, Simon, ng'ula, Shataani gagaseegwa ghoalealdaneegwa ngaano,

³² ak aniini ea naamwaashchi ASEETA ea mwasuunya masaweagaagu, ama iibiiksean giimajeegi orjooga geamadu.”

³³ Hean gwayeesha niny, “Ng'utamiida, geawooschi hidaat eara eeteayeena ghealooniga ghana dami.”

³⁴ Gwayeesha, “Geayeeshiineey, Betaro, eanean maygooguul nghaghooda eaweani nea mii shaang'aan niba samwagu gideaba ginalaan.”

Shageeda ea sandakwajeanda ea ng'uta

³⁵ Gwayeesha saawa, “Damanda eajeakteawaneegwa, nea moondeawani shageeda ghana sandakwajeanda ghana geeka, abeeda gwanda gida niishoadeeweegwa?” Geeyeesha, “Mandana.”

³⁶ Gwayeesha saawa, “Ghamneawa siida mideawa shageeda daada, ak gwasunu eara dea mideawa sandakwajeanda. Nea siida mandeawana ng'uta ea dashaayda hang'daanyi ak ghwasha.

³⁷ Aba gideaba geayeeshiineegwa ng'ooruutsu majaghanyi ea meahiida aba badaydeanyu, ‘Aba gideaba geegalageat sea fuga munyas’; aba gideaba gising'waar aba badaydeanyu gwanda mudeanoadaanyi.”

³⁸ Hean gwayeesha, “Ng'utamiida, ang'wearda, hiji gwanda ng'utkeak iyeenya.” Gwayeesha saawa, “Gwadeay”.

Yesu ghamwaash ASEETA aba Giijeeda Saytuunajeega

³⁹ Iidu gwarita ak gawa gawuurji gideaba eawoojisu, ea ghwahita Giijeeda Saytuunajeega, nea ghwaat geeshta giinealanga.

⁴⁰ Hita hooweani gwayeesha saawa, “Amwaasha ASEETA adiidu geesimeegwa ak ghoapiti jeeda simsimda.”

⁴¹ Ghwanung'wa saawa heeda, ak ghwaloat geash gili ayang'da jakteayda lagheaneeda, ak ghang'uda gutung'weakaaschi ng'eanyi ak ghamwaash ASEETA, ak gwayi,

⁴² “Bwaabwa, iigidibwariiydi gil giischoarjaan bayoogi; nea adaghoah gida eagasiidi, nung' ghoah daang'u.” [

⁴³ Hean ghwahidu malaykajeanda leabu humng'eeda ak ghoadaw uurda.

⁴⁴ Iidu nea gwanda jeeda sawanadeeda, hean ghamwaash ASEETA muuchi; ak gawuurji gheawoocheandaanyi foojeanda nea goobitpisa ng'eanyi.]

⁴⁵ Ng'eada mooshta ASEETA, nea gabiikta heeda giinealanga, ghwahita nea nilil aba gideaba ning'ut giiseaneega,

⁴⁶ ak gwayeesha, “Ghwasaan anda goolili? Ang'eatng'eada amwaasha ASEETA adiidu ghoapiti jeeda simsimda.”

Ging'ooyda Yesu

⁴⁷ Miighoabit ghuuta aba baloolda ghwahidu eemeeda nea goodeana siisi siguura Yuda, bea jeeda giinealanga atamaniyeenya, nea gooshooyna saawa. Gwaneekiisa Yesu ak ghwasam gheata;

⁴⁸ gwayeesha Yesu, “Yuda ghamneawa gilaabi bwadaw Orjeeda siida aba samita gheata?”

⁴⁹ Deagu fugiga mideawean gwayeesha, “Ng'utamiida gajeabwarana ng'utkeaka?”

⁵⁰ Gafagu siyagi ng'utaanyi ak ghwalas soomjeanda ashoohoocheanda haw ak gwalaksa ng'eanyi iita geatinda dugwa.

⁵¹ Gwayeesha Yesu, “Anung'waada nideay!” Ghoang'waay iita ak ghoahaap.

⁵² Ng'ata gwayeesha Yesu ashoohoodiga hees, ea shirikareeda gheeda sibata ASEETA ea gweargwa, buwa ghoang'waay niny, “Ghoapkaandi gili oapkaanji oang'oanya mareanghweanda, nea gooyeadu ng'utkeaka ea gulupkeaka?

⁵³ Eawoojisu nea geendeaydooschi galeagasean aba jeeda gheeda sibata ASEETA, ghanea miyoang'wanyaan ak ghamneawa nih ea damandeang'wa gil ea uurda misaneeda.”

Betaro ghwashaang' Yesu

⁵⁴ Hean geang'waay ak geayaat ea eayaat gheeda Ashoohoocheanda haw. Gamaseaw Betaro nea sheagi;

⁵⁵ iidu geayeat beasta aba bugharjeanda daghata gheeda nea geendeayi sean, ak eara Betaro gwanda hiji.

⁵⁶ Ng'ata ghwadaah hutpa gadiyeeda nea gwanda heedeesh ak goohang'ooysa ghaang' ak gwayeesha, “Eara siisi gwandeaydooschi sea niny.”

⁵⁷ Ghwashaang' nea gwayeesha, “Gatmooda, siisi aniini mwaanali.”

⁵⁸ Miigageawiit ghwadaah siinuut ak gwayeesha, “Eara ang'iing'i gibeahi jeedeaba fugiga.” Gwayeesha Betaro, “Siida meabeahi.”

⁵⁹ Iidu nea ning'ata aseedeanagi gwayeesha siinuut, “Aba huumwa siisi earada goodeaydooschi niny; aba gideaba niny siida Galilaya.”

⁶⁰ Gwayeesha Betaro, “Siida, mwaanali eara gida inyaashi.” Deagheata damani duu gabaloolean, googuul nghaghooda.

⁶¹ Ghwayam geaw Ng'utamiida ak gang'ula Betaro. Ghoapkaat Betaro ng'asheanda Ng'utamiida, gidaghayi rukusiinda gideaba, “Eanean heeda miigooguula nghaghooda gajea niheawanaan niba samwagu.”

⁶² Hean gwarita jarooda ak gooyeawda muuchi.

Yesu geeshka nea geabwar

⁶³ Ghwahita fugiga gwachi ang'waay Yesuun ak gwashika nea ghabwar;

⁶⁴ Geegeanu ak geedukuta gheanyanga ak geepearsa nea geeyeesha, “Heapi rukuneasa siida lasnyi?”

⁶⁵ Ak geerukusa ng'asheega saang'a bea giing'weaka.

Yesu geayaat madeeda girgweageeda

⁶⁶ Sakteayda nea goorearu aseeta, gabadageat gweargwa sea ashoohoodiga hees, ea ng'oorshoodiga, ak geeyeadu madeeda girgweageeda, ak geeyeesha,

⁶⁷ “Iiwoosi Gristo, girukuneasa.” Gwayeesha saawa, “Eara darukuneegwa, majaghanyi amwasa;

⁶⁸ ak eara daanyaashcheegwa ng'asheanda ea mwajashaaha.

⁶⁹ Nea gidang'eada ghamneawa Orjeeda Siida gaygoopteada aba meatkweeda geatinda dugwa bea ASEETA hoauur.”

⁷⁰ Gwayeesha sean, “Aba seareani guwoosi Orjeeda ASEETA?” Gwayeesha saawa, “Goorugu agooga gideaba geawooschi.”

⁷¹ Hean geeyi, “Asi gudeegassa mushooduspwa naaha? Aba gideaba siyiing'si geat ng'asheega ghuutaanyi.”