Lukka 21 - Bibliyeeda Ghaydit

Gidasabwa geadi gatmooni was masinung'weanda

¹ Ng'ata gang'ula ak ghwadaah gida iinda meanang'oodiga haleanjeeda sisapa geadi bea ghadooweeda jeeda gheaseeda.

² Ghwadaa eara masinung'weanji bwarbwar nea ghwayiin jeeda gida heelaji iyeenya ak ghwahit.

³ Ak gwayeesha, “Geayeeshiineegwa aba huumwa masiinung'weanji bwarbwariin ghoadayda gidahaw ea ghwalaabwa hoowa buuneesean;

⁴ Aba gideaba suurja ghoadayda gidabina jeeda baruureega nyaawa, sinung' niny aba jeeda barbarandaanyi niidayda gidamideawa sean.”

Yesu gabaloola nyarjeawda gheeda sibata ASEETA

⁵ Iidu nea gabaloola mwaatkwa gheeda sibata ASEETA, gida siitaamdaamda aba lagheanga miyaasiin ea haleanjeeda sisapa geadi bea ghadooweeda gwayeesha,

⁶ “Aba haleanjeeni oong'ulayiin, gayghwahidu damanda jea ea mayghoabit lagheana aba uhuumba nuut jea ea majeeng'adeasa ng'eanyi.”

Sawanadeeda ea ghabasta

⁷ Hean geanyaash niny nea geeyeesha, “Giinealshoocheanda, ng'asheesu gayghoah eeju, ak gwadeagoodeaba ng'asheesu ea naaha jea ghoahiimu gideaba hinnoodeaba ng'asheesu nineekiit?”

⁸ Hean gwayeesha, “Ashageada adagahutaneegwa siida; gwanda fuga saang'a jea ghapkaana gheawungeasu, nea gwayeena, ‘Siida aniini gil!’ nea ‘Damanda nineekiit!’ Adoayaachi geeshta.

⁹ Inyeesa gajayiinya iita ng'ucheeda ea jaleadinga, ea adoabeali; aba gideaba ng'asheesu gaygoosheeda ghwahidu, nea muudeanooda ea maygabay ghwahidu.”

¹⁰ Ng'ata gwayeesha saawa, “Gaygaba daroori ng'uchi daroar nuut, ea sugoocheanduumeeni ng'uchi sugoocheanduumeeda nuut;

¹¹ gaygwanda sawooda haw bea ng'eanyiida, ak gaygang'eeda geejeadinga aba darooraka sean ea geeyoonung'weaka; ng'asheega jea ghwanung' eahamng'eanyi, ea gwadeagwajeega hees leabu humng'eeda.

¹² Ak damanda mii gapnu ng'asheesu seaniin gajeang'waanyeagwa ak geesawaneegwa, nea geayaadeagwa gealga siinealshacheewa ak gajeejakseegwa ghealooniga ak gajeayadeagwa madeeda sugoodiga hees ea madeeda fuga hees ambaliischi aba gheawungeasu.

¹³ Ak abeeda gili gayghoah muuwuunooda aba heedeang'wa.

¹⁴ Asi oong'ooysiina jeesingeagwa ak ea adooteemshi aba gichea ashaayda ng'asheega;

¹⁵ aba gideaba gaydagooneegwa ng'asheega ea weaghuumeeda jea inyeesa eara weajoodigeagwa ghwaraay ng'alealeeda ghana gichea ghwashaang'da.

¹⁶ Ak gayghaghaseagwa ghweanigeagwa ea gheamadigeagwa ea orjooga geamadu, ea buweadeegeagwa ea fuga ooduupcheewi nea mwaatkwa gaygwanuuseegwa;

¹⁷ ak agooga gajeesteagwa aba gheawungeasu.

¹⁸ Ea mayghwaroat eara buudeanjagi bea iheengeagwa.

¹⁹ Ak agooga aba milikghteaydeang'wa gajookghuuha eaweegeagwa.

Yesu gabaloola nyarjeawda Yerusalemu

²⁰ “Asi iyoadaayi mujiineeda Yerusalemu nea nineaweesa lugooda, abeeda anala gideaba nineekiit nyaroadaanyi.

²¹ Nea fuga mida Yudeya ea dasalsiina iheenga giijeega, nea gea mida mujiini ea dariteaysiina nea gea mida gharang'da ea adiidu ghapka jeeni;

²² aba gideaba eawoojigiga gajea gea sawanadeeda ak ghoah gida nyaashta ng'ooruutka.

²³ Dashageada gadeemga mideawa diibiga ea gea areerji diibiga aba askwearjoojigiga! Aba gideaba gayghwadaah ng'asheanda ng'waan, aba gideaba gaygwanda sawanadeeda haw jeeda ng'eanyiida ea nyarasta aba badaydeaba fiisu;

²⁴ Ak gajeenuuseadawa ng'uta nea suuk geetabwaardaawa jeeda eemoojiga sean nea Yerusalemu gayghoala eemoojiga ea ghwahidu damanda fuga eemoojiga.

Hinooda Orjeeda Siida

²⁵ “Gajadaaha gwadeagwajeega aba gheang'da aseeta ea sheeda ea miinga, gayghwanyas eemoojiga jeeda ng'eanyiida sawanadeeda nea ghahamng'eanyi aba nyeashta laweajajeega basooda,

²⁶ buuneeda gaygoohiili aba muuwda aba giimuukghunooda gichea gwahissa ng'eanyiida, aba gideaba uurda mida humng'eeda gajeetuumduum.

²⁷ Ak gajeadaah Orjeeda Siida nea ghoana jeeda shamooghooda nea gwandeawa uurda ea giigheambiita haw.

²⁸ Asi ghamneawa ng'asheesu iihidu ghoahali geat, amiinaada ak goong'ulay humng'eeda, aba gideaba nineekiit lealnoodeang'wa.”

Gida anaal fih shaboogheecheanda

²⁹ Hean iidu gwarukusa saawa galeega nea gwayeesha, “Ang'ula shaboogheecheanda ea geediga suurja sean;

³⁰ Iyoadaayi nea ghafiirfiir seenga nyawiiri, abeeda goojeeng'u gideaba doomeelda nineekiit.

³¹ Asi eara agooga iyoadaayi ng'asheesu nea gapnu, anala gideaba sugoocheanduumeeda ASEETA nineekiit.

³² Aba huumwa geayeeshiineegwa jeacheeng'su bea ghamneawean mayghwanaawda nea mii adaaha ng'asheesu.

³³ Humng'eeda ea ng'eanyiida gaygamuudean. Duuku ng'asheesu ea maygamudean earahay.

Gammiisa giing'weernooda

³⁴ “Asi afura geat adagoobal gurooruunatkeagwa beeshkweeda ea booktuumeeda ea eaweesu bea ghamneawean, ea gwashameegwa eaweedida; gawuurji gida ang'oonyiida ghuduumbwaada haleanjeeda;

³⁵ aba gideaba nih gichea gwahissiinda fuga sean abiita badayda ng'eanyiisean.

³⁶ Asi agooga afura geat galeagasean, nea ghoamwaashchi ASEETA gagooneegwa uurda jea oataraamwa ng'asheesu sean jea gapnuun, ea aminaada aba madeeda Orjeeda Siida.”

³⁷ Inyeesa goonealshi askweari aba jeeda gheeda sibata ASEETA, nea eawa gwariteawa jeeda mujiini ak gawa goobiida uhuuda Giijeeda Saytuunajeega.

³⁸ Hean inyeesa sakteayda duw gaweay buuneesean headaanyi eeleeysiit aba jeeda gheeda sibata ASEETA.